Vienne
Frantziako ekialdeko suprefetura hiria, Isèreko departamenduan (Rhône-Alpes), Rhône ibaiaren ertzean. 28.753 biztanle. Industria (ehungintza, metalurgia, kimika industria, nekazaritzarako makineria) da ekonomia jarduera nagusia. Aipagarriak dira Saint-André-le-Bas eliza erromaniko gotikoa (XII. mendeko klaustro erromanikoa), XII-XV. mendeetako Saint-Maurice eliza, VI-IX. mendeetako Saint-Pierre eliza (XII. mendeko kanpandorrea) eta erromatarren garaiko hondakinak: Augusto eta Livioren tenpluko arrastoak, ateak eta Pipet mendiaren magaleko teatroa.
