Schumann, Robert
Alemaniar musikagilea (Zwickau, 1810 - Endenich, 1856). Zuzenbide ikasketak utzi zituen pianoa ondo ikasteko F. Weick-ekin lehenbizi, eta emaztearen aitarekin gero. Hatzak arinago mugitzeko asmatu zuen tresna baten erruz, hatz baten mugimendua galdu zuen. Harrezkero musika eta kritika idazten hasi zen. Neue Zeitschrift für Musik (Musika Aldizkari Berria) sortu zuen eta musikaz zituen irizpideak argitaratu zituen, baita Brahms eta Mendelssohn-i zien mirespena adierazi ere. 1843. urtean Mendelssohn-ek irakasle postua eskaini zion Leipzig-eko kontserbatorioan. Handik urtebetera postua utzi behar izan zuen, 1833. urtetik aurrera jaiotzetik zuen buru gaixotasunak eragiten zizkion nerbio krisialdiak zirela eta. 1844. urtean Dresden hartu zuen bizilekua piano irakasle gisa eta geroago, 1850. urtean, Düsseldorf-eko musika zuzendari izendatu zuten. 1854, krisialdi larriago batean, Rhin ibaira bota zuen bere burua, baina salbatu zuten. Eroetxe baten sartu zuten eta hantxe hil zen bi urte geroago. v Erromantizismoko musikagilerik bikainetako bat izan zen Schumann. Aipagarriak dira, batez ere, pianorako musika, abestiak (Lieder) eta orkestrarako musika. Pianorako musika lan ezagunenak bere emaztearentzat idatzi zituen. Lan aipagarriak dira, besteak beste: ahotserako lied-ak, Emakume baten maitasun eta bizitza (1840), Poetaren maitaleak (1840); Romanzak eta baladak (1841-1847) bilduma; hirurogeita hamabi koru a capella; hamazazpi duo, hiru trio, hogeita hamaika kuarteto pianoarekin; oratorioak, Paradisua eta Peria (1841-1843); Manfred (1849); Migno-nentzako requiema (1849); Genoveva (1847-1850) opera. Pianorako lanen artean berriz, aipagarriak dira: Pinpilipauxak (1829-1832); Kapritxoak (1833); 12 Estudio sinfoniko, (1834); Inauteria (1834-1835); Haur eszenak (1838); Kreisleriana (1838); Albuna gazteriarentzat (1848); Basoko eszenak (1848-1849). Organorako Sei fuga Bach-en izenaren inguruan (1845) idatzi zuen. Ganbera musika, lau sinfonia, oboe eta pianorako, eta biolontxelo eta pianorako lanak ere idatzi zituen.
