Valladolid
Espainiako erdialdeko probintzia, Gaztela-Leongo Autonomia Erkidegoan. Mugak: iparraldean, Leon eta Palencia; ekialdean, Burgos eta Segovia; hegoaldean, Segovia, Avila eta Salamanca; mendebalean, Zamora. 8.201 km2 eta 503.306 biztanle. Hiriburua, Valladolid. Hiri nagusiak: Medina del Campo, Iscar, Medina del Rioseco, Peñafiel eta Tordesillas. Ordoki zabal batek hartzen du ia probintzia osoa. Tierra de Campos, Tierra del Vino, Duero ibaiaren eta honen adarren (Pisuerga, Eresma, Esgueva, Valderaduey) arroak dira probintziako eskualde nagusiak. Klima kontinentala du: hotz handiko neguak eta bero handiko uda lehorrak. Laborantza (garia, garagarra, oloa, barazkiak, azukre kanabera, artoa, alpapa, mahatsa) eta industria (janari industria, metalurgia, ehungintza, kimika industria, ardogintza, eraikuntzarako gaiak, automobilgintza) dira ekonomia jarduera nagusiak.
