Serre, Jean-Pierre
Frantses matematikaria (Bages, Frantzia, 1926). Nîmes-ko lizeoan eta Parisko École Normale Supérieure-n egin zituen lehenengo ikasketak. Doktoregoa 1951n egin zuen Sorbonan, eta Ikerketa Zientifikorako Zentro Nazionalean aritu zen 1948-1954 urteetan. Hurrengo urteetan Nancy-ko Unibertsitatean lan egin zuen, eta 1956tik aurrera Aljebra eta Geometriako katedradun izan zen Frantziako Collège-an, 1994an erretiratu zen arte. Bitartean bisitaldi asko egin zituen Princetonera eta Harvardera. Serre-k Jean Leray frantses matematikariak asmatutako sekuentzia espektralak aztertu zituen, eta lan horri esker aurrerapen handiak egin ziren topologian. Aldagai konplexuen alorrean ere ekarpen garrantzitsuak egin zituen. Lan horiengatik, 1954ko Matematikarien Nazioarteko Kongresuan Fields domina jaso zuen. Serrek lan ugari argitaratu ditu, besteak beste, Cours d'arithmétique (1970, Aritmetika ikastaroa), Représentations linéaires des groupes finis (1971, Talde finituen irudikapen linealak), Arbres, amalgames, SL2 (1977, Zuhaitzak, amalgamak, SL2), Lectures on the Mordell-Weil theorem (1989, Mordell-Weil-en teorema) eta Topics in Galois theory (1992, Galois-en teoriari buruz). Fields dominaz gainera, Steele saria (1995), Gaston Julia saria (1970) eta Balzan saria ere (1985) irabazi ditu. Horrez gainera, Errege Elkarteko kide hautatu zuten 1974an, eta, besteak beste, Ohorezko Legioko kide ere bada. Frantziako, Suediako, Estatu Batuetako eta Holandako Zientzia Akademietako kidea da.
