Wuhan
Txinako erdialdeko hirialdea eta ibai portua, Hupeh-eko probintziako hiriburua, Wu-Txang, Han-Yang eta Han-k’eu hiriek osatua, Yangtse ibaiaren bi aldeetara hedatzen dena, Yangtse eta Han ibaien bilgunean. 3.191.000 biztanle. Bi unibertsitate. Errepide eta burdinbide gune garrantzitsua. Industria (ehungintza, altzairugintza, burdingintza, kimika industria, nekazaritzarako makineria, burdinbiderako gaiak, janari industria, tabakogintza, automobilgintza, destilategiak, eraikuntzarako gaiak, armagintza), merkataritza (nekazaritza eta industria produktuak) eta administrazioa dira ekonomia jarduera nagusiak. XIX. mendeaz geroztik Txinako erdialdeko merkataritza eta administrazio gune garrantzitsuena da.
