Tunis
(Ar. Tunis edo Tunus) Tunisiako hiriburua eta portua, estatuaren iparraldean, Mediterraneo itsasoaren ondoan, izen bereko golkoaren eta aintziraren ertzean. 596.654 biztanle (1.200.000 biztanle ditu hirialdeak). Unibertsitatea. Nazioarteko bi aireportu. Tunisiako administrazio-, finantza-, merkataritza-, industria- eta turismogune nagusia da. Metalurgia, eraikuntzarako gaiak, janari industria, kimika industria, tresneria elektrikoa eta mekanikoa, burdinbiderako gaiak eta ehungintza dira industria garrantzitsuenak. Hiritik 10 km-ra dagoen Halq al-Wadiko portutik nekazaritza produktuak esportatzen dira (olibak, garia, garagarra, olioa). Afrikako iparraldeko kostaldeko hiri zaharrenetakoa da eta garai askotako monumentuak kontserbatu ditu. Aipagarriak dira, besteak beste, erromatarren garaiko termak (II. m.) eta akueduktua, VIII. mendeko az-Zaytunah mezkita eta hiriko arkeologia museo aberatsa. v Historia. Libiarrek sortu zuten Tunis eta K.a. IX. mendean Tirotik zetozen feniziarren esku utzi zuten. Feniziarrok Kartagoko hiria sortu zuten Tunisetik hurbil. K.a. 146. urtean erromatarrek bi hiriak suntsitu zituzten. Tunis berriro eraiki eta hiri oparoa izan zen Inperioko azken garaiak arte. VII. mendean arabiarrek konkistatu zuten eta Ifriqiya probintziako hiriburua izan zen. 1236-1574 artean iritsi zen oparotasun maila gorenera, hafsitar dinastiaren agintaldian hain zuzen. XVI. mendean birritan egon zen espainiarren mende, baina 1574. urtean otomandarrek inbaditu zuten. 1881ean Frantziaren protektoratu bihurtu zen eta egoera horretan iraun zuen 1956. urtean Tunisiaren burujabetasuna aldarrikatu zen arte. Bigarren Mundu Gerran zehar alemaniarren esku egon zen.
