Sabatier, Paul
Frantses kimikaria (Carcassonne, 1854 - Okzitaniako Tolosa, 1941). Frantziako Collègen egin zituen kimikako ikasketak eta Okzitaniako Tolosako unibertsitatean irakasle izan zen. Katalisiaren azterketan jardun zuen batez ere. Jean-Baptiste Senderens frantses kimikariarekin batera nikel erreduzituaren ezaugarriak zehaztu zituen, eta hidrokarburo askoren sintesia egitea lortu zuen horrenbestez. Oxido metalikoek lehen mailako alkoholetan duten eragina ere ikertu zuen hidrokarburo etilenikoak lortzearren. Kimikako Nobel saria irabazi zuen 1912. urtean Victor Grignard frantses kimikariarekin batera.
