Rysanek, Leonie
Austriar sopranoa (Viena, 1929 - Viena, 1998). Txekiar jatorriko familia pobre batean jaio zen eta haurtzaro zaila izan zuen. Zortzi urte zituela Beethovenen Fidelio ezagutu zuen eta horrela sortu zitzaion musikarako zaletasuna. Gerra garaian, arma lantegi batean lan egin zuen, eta ez zituen musika ikasketak hasi gerra amaitu zen arte. Alfred Jerger (bere lehenengo senarra izango zena) eta Rudolf Grossmanni esker, Vienako Musika Akademian sartu zen. Debuta Innsbrucken egin zuen, 1949an, Agataren paperean (Freischütz). Ondoren Sarrebruckeko Operan (1950-1952) kantatu zuen, eta gero Stuttgarten. Garai hartan hasi zen ospea hartzen eta Munich, Londresko Covent Garden (1953), Vienako Opera (1954), New Yorkeko Metropolitan Opera (1954) eta San Franciscoko Opera antzokietan (1957) aritu zen kantari. Verdi, Puccini eta Txaikovski izan ziren gehien kantatu zituen musikagileak. Hala ere, Wagner eta Richar Strauss zituen gustukoen. Rysaneken teknika oso sendoa zen eta trebetasun handiz antzezten zituen bere paperak. Salzburgoko entzuleek ordu erdiko txaloak eskaini zizkioten 1996an.
