Polinesia Frantsesa
Frantziaren administraziopean dauden Polinesiako hainbat uhartedik osatutako lurraldea, Ozeano Barean. Bost uharteditan banatutako 130 bat uhartek osatzen dute, eta 4.000 km2 hartzen dute guztira. Uhartediak: Societé (Tahiti), Gambier, Markesa uharteak, Tuamotu eta Tubuai. 137.382 biztanle. Hiriburua, Papeete (Tahiti). Batzuk lauak (kareharrizkoak edo koralezkoak) dira, eta besteak garaiak (Tahiti, Bora Bora, Markesa uharteak); hauek sumendi jatorrikoak dira. Klima tropikala da. Polinesiar jatorrikoak, asiarrak eta frantsesak dira biztanleak; mestizoak ere asko dira. Nekazaritza (kokoak, patata, kopra, bainila), arrantza eta turismoa dira ekonomia jarduera nagusiak. v Historia. XVI. mendean zehar hasi ziren europarrak hara heltzen; Tahiti 1842an frantses babespeko herrialde bihurtu zen, eta 1880an kolonia. Bertako gobernuan aldaketa handiak izan ondoren, Frantziako administraziopeko lurralde izendatu zituzten eta autonomia estatutua lortu zuten 1977. urtean.
