Moya, Luis
Espainiar arkitektoa (Madril, 1904 - 1990). 1922an hasi zituen arkitektura ikasketak Madrilgo Goi Mailako arkitektura eskolan. 1927an lortu zuen arkitekto titulua Mausoleoa eta Auditoriuma Beethovenentzat Vienan proiektuarekin, eta Aníbal Álvarez saria irabazi zuen. Ikasle zen bitartean, Pedro Mugurazaren estudioan lan egin zuen. 1928. urtetik aurrera bere kabuz hasi zen lanean eta hainbat lehiaketatan parte hartu zuen. Hasierako lanetan modernotasunaren kontrako joera erakusten du, eta forma klasikoen eta Espainiako tradizioaren aldeko jarrera: Amerikako museoa (1942); Marianisten eskolan Carabanchelen (1942-1944), San Agustin eliza (1945), Madrilen guztiak, eta Xixongo Unibertsitate laborala. 1955etik aurrera Moyaren arkitekturak erabateko aldaketa erakusten du, eta bere eraikinak arkitektura modernoaren barruan sailka daitezke. Horren erakusgarri dira garai horretako hainbat proiektu: Pilarko Andre Mariaren eliza (1959-1960), Chaminade goi mailako eskola Madrilgo Unibertsitatean (1963). Liburutegi Nazionaleko arkitekto kontserbatzaile izan zen, eta hainbat berrikuntza eta hobekuntza lan egin zituen, liburuen gordailua zabaltzea eta sarrera berritzea besteak beste. Madrilgo arkitektura eskolako konposizio katedraduna izan zen 1963-1966 urteen bitartean. Estetika eskolak eta doktorego ikastaroak eman zituen Nafarroako Unibertsitateko Arkitektura eskolan.
