Koartango
Arabako mendebaleko udalerria (Añana). Kuartango du izen ofiziala. Mugak: iparraldean, Berberana (Burgos), Arrastaria, Urkabustaiz eta Zuia, ekialdean, Badaia mendilerroa, mendebalean, Gaubea eta Berberana (Burgos) eta hegoaldean, Erribera Goitia. Garaiera, 580 m. 85,07 km2. 1997ko datuen arabera, 361 biztanle ditu (koartangarrak). Hizkuntza banaketa 1996an: 40 euskaldun, 16 ia euskaldun eta 283 erdaldun. Honako herrigune hauek osatua da Koartangoko udalerria: Anda, Andagoia, Aprikano, Artxua, Arriano, Katadiano, Etxebarri-Koartango, Jokano, Luna, Santa Eulalia, Sendadiano, Tortura, Urbina Eza, Villamanca eta Zuhatzu-Koartango (herriburua). Baia ibaiak igarotzen du udalerria. Laborantzan (garia, garagarra, patata, azukre erremolatxa) eta abere hazkuntzan (ardi, zerri eta behi azienda) oinarritua da ekonomia jarduera nagusia.
