Joana
Napoliko bi erreginen izena. v Joana I. Napoliko erregina eta Provenzako kondesa 1343-1382 urteetan (Napoli, 1326 - Aversa, 1382). Roberto Anjoukoa bere aitonaren ondorengoa izan zen. Senarra, Hungariako Andres, hil zuelako salaketa egin zioten eta Proventza aldera jo behar izan zuen babes bila. Kargurik gabe utzi zuen Klemente VI.a Aita Santuak eta erreginak Avignongo hiria saldu zion ordainez. Bigarren senarra, Luis Tarantokoa, hil ondoren (1362), Mallorcako Jakue III.arekin ezkondu zen. 1370. urtean Karlos Durazzokoa izendatu zuen oinordeko eta 1376an Otto Brunswickekoarekin ezkondu zen. Lotura horren ondoren, Klemente VII.a Avignongo Aita Santuaren alde jarri zen eta oinordeko berri bat hautatu zuen Napolirako, Luis Anjoukoa. Karlos Durazzokoak ez zuen onez hartu neurri hori eta, Urbano VI.a Erromako Aita Santuak lagundurik, Napoliko erresumaz jabetu eta Joana erregina hilarazi zuen, lepoa bihurriturik. Tragedia bat idatzi zuen Frédéric Mistral idazle okzitaniarrak Joana I.aren bizitzan honetan oinarrituta (1890, La Rèino Jano). v Joana II. Napoliko erregina 1414-1435 urteetan (Napoli, 1371 - Napoli, 1435). Karlos III.a Durazzokoaren alaba eta anaia Ladislasen ondorengoa zen. Alfontso V.a Aragoikoa erregea onartu zuen oinordekotzat (1421), baina gerra baten ondoren, erabaki hura ezetsi eta Luis III.a Anjoukoa eta René I.a izendatu zituen oinordeko. Joana II.a hil ondoren (1435) Alfontso V.a jabetu zen Napoliko erresumaz.
