Carey, Peter
Australiar eleberrigilea eta ipuin idazlea (Bacchus Marsh, Victoria, 1943). Monash Unibertsitatean egin zituen ikasketak. Hemezortzi urterekin graduatu ondoren, Sidneyko enpresa batean hasi zen lanean, publizitateko erredaktore gisa. Hirurogeiko hamarraldiaren azken aldera, Londresa joan zen eta han bizi izan zen urte pare batez. 1965ean hasi zen idazten. Careyren lehen ipuin liburuek -The Fat Man in History (1974, Gizon gizena historian), eta War Crimes (1979, Gerrako krimenak)- oso kritika onak izan zituzten, eta Australiako egungo idazleen artean berritzaileenetako eta garrantzizkoenetakotzat jo zuten, berehalaxe, literatura adituek. Haren estiloan, errealismoa eta fantasia nahasten dira askotan, eta surrelismoa, zientzia-fikzioa eta alegiak ere lantzen ditu. Careyren lehen eleberria, Bliss (1981, Zoriona), egileak berak zinemarako egokitu ondoren, film bilakatu zen, 1985ean, Ray Lawrencen zuzendaritzapean. Bigarren eleberrian -Illywhacker (1985)-, 139 urteko australiar abenturazale baten ibilerak kontatzen dira, umore pikaroz, eta Australiako aitzindarien inguruko mitoak eta gezurrak salatzen dira. Hurrengo eleberriarekin -Oscar and Lucinda (1988)-, Booker saria irabazi zuen. The Tax Inspector (1991, Haziendako ikuskaria) argitaratu zuen hurrena, baina laugarren eleberri honek kritika txarrak gehiago izan zituen aldekoak baino. The Unusual Life of Tristan Smith (1994, Tristan Smithen ezohiko bizitza) eta Jack Maggs (1998) dira Careyren azken eleberriak. Careyk idatzi zuen, orobat, zientzia-fikzioko Munduaren azkeneraino filmaren gidoia, Wim Wendersek zuzendu zuena (1991).
