Caravaggio
(Michelangelo Merisi edo Amerighi, Caravaggio deitua). Italiar pintorea (Caravaggio, Bergamo, 1573 - Porto Ercole, 1610). Bergamako Simone Petazzorekin ikasi zuen; Lonbardiako eskolaren naturalismoaz gainera, Veneziako Tintoretto eta Bassanoren eta Cambiasoren eragina izan zuen. Haiengandik ikasi zuen argia lantzen eta argiaren adierazkortasun indarra erabiltzen. 1589. urte aldera Erromara jo zuen. Lehen obrak argi betekoak eta kolore bizikoak diren arren (Bako, Madalena lotan, Atsedena Egiptorako ihesean), 1600. urtetik aurrera argiaren ikusmoldea aldatu egin zuen: alboko argi bortitz batek hartzen du eszena nagusia, hondo ilunaren eta mugimendu argiaren artean erabateko kontrakotasuna eraginez (San Mateoren martirioa, 1600; San Mateo eta Aingerua, 1602). Akademiakoek gogor eraso bazioten ere, eutsi egin zion adierazpide horri, eta, argiaren baliabide horrez baliatuz, gaitzat erlijioa eta mitologia zuten koadro bortitz patetikoak egin zituen (San Pauloren konbertsioa, San Petriren gurutziltzea, Dabid, …). Liskartia izaki, Napolira alde egin behar izan zuen, borroka batean pertsona bat hil ondoren. 1606an Zigorraldia eta zazpi Urrikalmendu Obrak margotu zituen, eta ondoren Malta (San Joan Bataiatzaileari lepoa moztea) eta Siracusa eta Messinatik (Lazaroren piztuera) igaro zen. Napolira itzuli ondoren (1609), Erromarako bidean hil zen, hango barkamena lortu ondoren. v Caravaggioren estiloak, tenebrismoak, arrakasta handia izan zuen Europa osoan, Espainian batez ere (Riberarengan nagusiki) XVII. mendean.
