Antioquia
Kolonbia ipar-mendebaldeko departamendua, 62.870 km2 eta 3.557.000 biztanle. Hiriburua, Medellin. Kolonbiako hirugarren departamendua hedaduraz eta bigarrena biztanleriari dagokionez. Hamar probintzia eta 96 udalerri. Lurralde menditsua (Pico Frontino, 4.080 m). v Klima. Hiru klima eremu nagusi: 1.000 metrotik behera, klima tropikal bero hezea; 1.000 eta 2.000 metro bitartean, ez hain beroa; 2.000 metrotik gora, hotza. Euri ugari (1.500 mm Atrato haranean eta 3.000 mm Urabá golkoan). v Ekonomia. Garrantzi handiko nekazaritza (kafea, artoa, patata, garia eta garagarra) eta meatzeak (urrea, beruna). Petrolioa eta energia elektrikoa. Medellin hiriko ehungintza Hego Ameriketako garrantzitsuena da.
