Google Chrome

Google Chrome Googlek garatutako kode itxiko doako web nabigatzailea da. Hainbat sistema eragileentzako bertsioak ditu (Windows, Android, MacOS, iOS, Linux) eta 2019an mundu mailan erabiltzaile gehien dituen nabigatzailea da. Euskadi.eus-eko bisitarien artean, %59k erabili zuen nabigatzaile hau.

Google Chromeren atzean dagoen software libre proiektuak Chromium izena du eta BSD eta Creative Commons Aitorpena lizentzien menpe dago. 

Google Chrome ez dago euskaraz eskuragarri (bai, ordea, Chromium proiektua).

Safari

Safari Applek MacOS eta iOS sistema eragilerako garatutako web nabigatzailea da, eta Windows sistema eragilerako bertsioa ere badu. Bere azken bertsioan, HTML5 eta CSS3 estandarrak onartzen ditu.

Euskadi.eus-eko bisitarien artean %13k erabili zuen nabigatzaile hau 2019an.

Safari ez dago euskaraz eskuragarri.

Microsoft Internet Explorer

Internet Explorer (IE edo MSIE ere deitzen zaio) Microsoftek garatutako web nabigatzaile bat da, Windows sistema eragileekin batera banatzen dena. 1995ean sortu zuten, Microsoftek Mosaic nabigatzailearen kodea erosi eta gero. Internet Explorer izena eman zioten Netscape Navigatorekin lehiatzeko asmoz. Interneteko nabigatzailerik erabiliena izan zen XX. mende hasieran, baina gaur egun bere merkatu-kuota asko murriztu da, eta Euskadi.eus-eko bisitarien artean %11k erabili zuen nabigatzaile hau 2019an. Microsoftek iragarri du 2019tik aurrera ez duela IEren bertsio berririk kaleratuko, eta hortik aurrera bakarrik Edge nabigatzailea erabiliko duela.

Eusko Jaurlaritzako ordenagailuetan instalatutako bertsioak 9 (Windows 7 duten ordenagailuetan) eta 11 (Windows 10ean) dira. Eusko Jaurlaritzako barne aplikazioentzako nabigatzaile "ofiziala" da. 8.0 bertsioak ez du HTML5 eta CSS3 estandarrak betetzen.

Internet Explorer euskaraz erabiltzeko Windows sistema eragile osoa euskaraz jarri beharko da. Horretarako, jar zaitez harremanetan zure Saileko arduradun informatikoarekin.

Mozilla Firefox

Mozilla Firefox Mozilla Fundazioak garatutako web nabigatzaile librea da, edonork lagundu dezakeena bere bilakaeran, eta euskaraz ere eskaintzen dena. Mozilla Application Suite-en ondorengoa da, eta gaur egun, Mozilla Korporazioak bilakatzen du. Euskadi.eus-eko bisitarien artean, %10ak erabili zuen nabigatzaile hau 2019an.

Firefox hainbat plataformatan erabil daitekeen web nabigatzailea da, eta Windows, Android, MacOS, iOS eta GNU/LINUX oinarritutako beste hainbat sistemetako, bertsio desberdinetarako baliagarria da. Bere iturri kodea librea da, GPL/LGPL/MPL hirukoitza baten mendean publikatutakoa. 

Firefox euskaraz eskuragarri dago. 

Microsoft Edge

Microsoft enpresak Windows 10ean txertatutako nabigatzailea da, Microsoft Internet Explorer ordezatzeko. Eusko Jaurlaritzaren barruan Windows 10 duten ordenagailu guztiek dute nabigatzaile hau eskuragarri. Hortaz aparte, Android eta iOS inguruneentzako bertsioak ditu. Euskadi.eus-eko bisitarien artean %4k erabili zuen nabigatzaile hau 2019an.

Edge euskaraz erabiltzeko Windows sistema eragile osoa euskaraz jarri beharko da. Horretarako, jar zaitez harremanetan zure Saileko arduradun informatikoarekin.

Opera

Opera Opera web nabigatzaile eta Interneteko ''suite'' bat da, Opera Sofware enpresa norvegiarrak sortua. Aplikazio hau doainekoa da 8.50 bertsioa kaleratu zenetik, aurretik shareware edo adware izanda, eta 26 bertsioa baino lehen, bakarrik ordainezkoa izanda. Euskadi.eus-eko bisitarien artean, %1ek erabili zuen nabigatzaile hau. Bere azken bertsioan CSS3 eta HTML5 estandarrak betetzen ditu.

Opera ez dago euskaraz eskuragarri.