Gizarte Segurantzako afiliazioa %1,2 hazi zen azaroan

Gizarte Segurantzak 1.022.898 afiliazio izan zituen azaroan, serie historiko osoko kopururik handiena. Urte arteko tasan neurtuta, hazkundea %1,2 izan zen, eta tasa hori aurreko hiru hilabeteetan erregistratutakoen oso antzekoa da. Beraz, administrazioaren erregistro horrek beheranzko bilakaera txiki bat erakutsi zuen urtearen hasieran, baina orain bere hazkunde erritmoa egonkortu du.

Inflazioak bost hamarren egin du gora urrian

Euskadiko KPIa bost hamarren igo zen urrian, eta %2,3an kokatu zen, EBZk ezarri zuen %2,0ko helburuaren zertxobait gainetik. Gorakada horrekin, KPIak galgatu egin du EAEn erakutsi duen moteltzeko bidea, zeren eta maiatzeko tasa %3,9 izan baitzen eta irailekoa, berriz, %1,8.

EAEtik atzerrian saldutako esportazioak %5,0 jaitsi ziren urtarriletik irailera bitartean

Eustatek argitaratutako datuen arabera, urtarriletik irailera bitarteko atzerrirako esportazio guztiak %5,0 jaitsi ziren, eta pandemiaz geroztiko lehen uzkurdura izan zen. Hala ere, garrantzitsua da kontuan hartzea alderaketa 2023ko aldi berarekin egiten dela, orduan esportazioak maila historikoetara iritsi baitziren, 24.500 milioi eurora hurbilduz. Izan ere, 2024an saldutako 23.000 milioi euro baino gehiago hirugarren erregistrorik onena da serie historiko osoan.

Euskadik I+Gan eginiko gastua 2.000 milioi eurotik gorakoa izan da lehen aldiz

Eustatek argitaratu dituen datuen arabera, ikerketa eta garapenean (I+G) eginiko gastua (2.000 milioi eurotik gorakoa izan zen 2023. urtean, eta inoizko diru kopururik handienera iritsi zen. Datu horrek %11,6ko igoera adierazten du, 2022an 1.794,7 milioi euro bideratu baitziren horretara, hau da, 208 milioi euro gehiago. Urteko hazkunde tasa hori gutxienez 1993. urtetik inoiz jaso den gehikuntza esanguratsuena da.

Euroaren eremuko jarduera ekonomikoa berriz ere murrizten ari da

Azaroan, euroaren eremuko PMI indize konposatua 48,1ean kokatu zen, hau da, aurreko datua baino ia bi puntu beherago eta azken hamar hilabeteetako mailarik baxuenean. 50 puntuetatik behera dagoenez, euroguneko jarduera ekonomikoa uzkurtzen ari da. Eskura dagoen informazioaren arabera, manufakturek ez dute suspertzeko inolako zantzurik erakusten eta 45,1eko balioa jaso dute; zerbitzuek, berriz, atzerapausoa eman dute eta 49,2ra jaitsi dira, bi puntutik gorako jaitsierarekin.

Europako Batzordearen arabera, datozen urteetan ekonomiak hobera egingo du

Europako ekonomien hazkunde erritmoak neurrizkoa izaten jarraitzen du 2024ko lehen hiruhilekoetan, nahiz eta, Europako Batzordearen azken aurreikuspenen arabera, urte amaiera mesedegarriagoa izango den, barne eskariak gora egingo duelako. Dinamika hori datozen bi urteetara zabalduko da. Urte horietan, kontsumo pribatua handitzeaz gain, inbertsioak ere gora egin ahal izango du. Horrela, 2024an jardueraren hazkundea %0,9 izango da, eta bizkortu egingo da, 2025ean %1,5 eta 2026an %1,8 handitu arte.

Taula makroekonomikoa. Eustat

Urte arteko aldakuntza tasa