Savoia Garaia
(Fr. Haute-Savoie). Frantziako hego-ekialdeko departamendua [74] (Rhône-Alpes), antzinako Savoiako lurraldearen iparraldean. 4.598 km2 eta 494.505 biztanle. Mugak: iparraldean eta ekialdean, Léman aintzira eta Suitza (Geneva-Vaud); hegoaldean, Savoia, eta mendebalean, Ain. Hiriburua: Annecy. Hiri nagusiak: Bonneville, Saint-Julien-en-Genevoix, Thonon-les-Bains, Chamonix-Mont-Blanc, Sallanches, Évian-les-Bains. Lurralde menditsua da. Bi alde bereizten dira: Alpe aurreko mendialdeak mendebalean (Bauges, Annecy aintziraren hegoaldean; Bornes, eta Chablais, Léman aintziraren hegoaldean), eta Alpe mendiak ekialdean, Mont-Blanc mendialdea hego-ekialdean (4.807 m, Europako mendi garaiena) eta Aiguilles-Rouges ipar-mendebalean. Oso haran sakonak dira han. Turismoa guztiz garrantzitsua da (mendiko eta neguko kirolak).
