Raffles, Thomas Stamford
Ingeles estatu gizona (Port Morant-etik hurbil, Jamaika, 1781 - Londres, 1826). 1810ean Ekialdeko Indietako konpainian sartu zen eta Kalkutara joan zen. Ingalaterraren eta Frantziaren arteko gerra hasi zenean ingelesei Java inbaditzeko bidea antolatzeaz arduratu zen; Javako gobernari izendatu zuten lehenik (1811-1816) eta Sumatrakoa ondoren (1817-1818). Ingalaterrako bandera paratu zuen 1819an Singapurren, eta administrazioa antolatu zuen. Portu librearen maila eman zion hiriari eta txinatar etorkin ugari hurbildu ziren hara. Hizkuntzalaria eta naturista ere bazen, eta hil aurretik Londresko Elkarte Zoologikoa sortu zuen (London Zoological Society).
