jakut, jakuts
edo sakha. iz. Siberiako herri handiena, kulturari dagokionez oso errusiartua gaur egun. 328.000 lagun (1979). XV. mendetik aurrera zabaldu ziren jakutak mendebaletik Baikal aintziraren iparraldeko lurraldeetara eta Lena ibai arroaren erdialdeko lurraldeetan finkatu ziren XVII. mendean. Jakutak turkiarrak dira jatorriz, familia horretakoa da beren hizkuntza, eta evenk izeneko herri siberiarrarekin nahasi ziren. Oraindik orain, jakutak erdi-nomadak eta aberezainak dira, eta, Siberiako beste herri batzuek ez bezala, zeramika eta burdina lantzen dituzte aspaldidanik. Guztiz bizkortu da jakuten errusiartzea XX. mendean zehar. v Jakut hizkuntza. Jakuten hizkuntza nazionala, 316.000 pertsonak hitz egiten dutena. Altai eskualdeko hizkuntza da eta Errusia barneko Jakutiako Errepublika Autonomoan, jakuten herrian, hitz egiten da. Berezitasun ugari ditu jakutak Siberiako eta beste herrietako hizkuntza turkiar gehienen aldera, geografian ere guztiz bereizirik baitago Jakutia gainerako herri turkiarretatik.
