Kontziliazio-neurriak hainbat ekimen dira, pertsonek beren bizitza osatzen duten eremuetako –pertsonala, familiakoa eta lanekoa– premiei erantzun ahal izateko eta eremu bakoitzean erabat garatu ahal izateko.

Kontziliazio-neurriak eskaintzen duten malgutasun motaren arabera sailka ditzakegu, eta, beraz, lan egiten den lekua malgutzera bideratutako neurriez ari gara (urrutitik egindako lana, egoitzara hurbiltzea, etab.), lan egiten den denboraren antolaketari eragiten diotenak (ordutegi-malgutasuna, lanaldi-murrizketa, eszedentzia, ordu-poltsak, lanaldi-egokitzapena...), eta beste hobekuntza mota batzuk eskaintzen dituztenak (laguntza ekonomikoak, onurak eta bonu sozialak...).

Baina, era berean, nola hornitzen diren eta eskaintzen duten erabilera-bermearen mailaren arabera sailka ditzakegu. Hala, hiru motatako uztartze-neurriak ditugu:

• Baimenak: edozein langilek balia ditzakeen eskubideak, legez ezarritakoak. Hainbat baimen-mota daude, eta baimen horiek zer egoeratan erabil daitezkeen eta zer muga dituzten zehazten dute. Gainera, kasu batzuetan, horiek erabiltzeak ondorio ekonomikoak (soldatarik eza edo murrizketa) edo lanekoak (eszedentzia mota batzuek, adibidez, ez dute lanpostua gordetzea bermatzen) ekar ditzake.
• Hitzarmen kolektiboetan sartutako kontziliazio-neurriak: hitzarmen kolektibo batzuek hobekuntzak ezartzen dituzte baimenak erabiltzeko baldintzetan, edo ekimen espezifikoak sektoreko langileentzat (malgutasunari, ordutegiei, lanaldiei, kontziliazioari laguntzeko baliabideei eta abarri buruzkoak). Garrantzitsua da jakitea zer neurri biltzen dituen bertako lan-baldintzak arautzen dituen hitzarmen kolektibo aplikagarriak.
• Enpresaren berezko kontziliazio-neurriak: erakunde batzuk sentsibilizatuta daude beren langileen kontziliazio-beharrekin, eta kontziliazio-neurri propioak eskaintzen dituzte, araudiak eta aplikatu beharreko hitzarmenak ezarritakoez gain:
  • Neurri horiek, batzuetan, negoziazio kolektiboaren bidez lortu dira, eta beste batzuetan, enpresak bere borondatez ezarri ditu.
  • Plantilla osoarentzat edo lanpostu edo egoera jakin batzuetarako izan daitezke. Enpresaren ezaugarriek (bezeroei arreta emateko ordutegia, erabilgarritasuna, ekoizpen-mota, txandak, etab.) eta erakundean dauden lanpostuek kontziliazio-neurri batzuk ezartzeko aukera muga dezakete. Adibidez, ezinezkoa da telelana eskaintzea zainketa-eremuko langileei edo makinen edo erreminten manipulazio zuzenean inplikatuta dauden profesionalei. Gerta daiteke, halaber, neurri jakin batzuk lanpostu mota jakin batzuei soilik eskaintzea (industria-enpresa bateko bulegoko langileek, adibidez, telelana egin dezakete zenbait egoeratan).