DESKRIBAPENA

Lehen amatasun- eta aitatasun-baimenak bereizten zituen baimen hori martxoaren 1eko 6/2019 Errege Lege Dekretuaren bidez aldatu zen Langileen Estatutuan. Erreforma honen bidez, erantzunkidetasunaren printzipioa bete da, gurasoen adingabeen jaiotzagatiko baimenen iraupena parekatuz, emakumeen eta gizonen arteko benetako berdintasun eraginkorra lortzeko.

Hala, 2021eko urtarrilaren 1etik aurrera, guraso bakoitzak lan-kontratuaren 16 asteko etenaldi bera izango du, horietako bakoitzarentzako nahitaezko sei baimen-aste barne, jaiotzen denetik zenbatzen hasita. Aste horiek lanaldi osoan hartuko dira, eta ezin izango dira asteak alde batetik bestera laga.

ONURADUNAK

Jaiotzagatiko eta adingabea zaintzeagatiko baimena ama biologikoak eta ama biologikoaz bestelako gurasoak hartu ahal izango dute erditzeagatik, eta adopzioaren, adopzio-helburuko zaintzaren eta harreraren kasuetan, adopzioa eratzen duen ebazpen judizialaren edo adopzio- edo harrera-helburuko zaintzaren administrazio-erabakiaren ondoren.

LAN-KONTRATUA AMAITZEA

• Jaiotzagatik, adopzioagatik, adopzio-helburuko zaintzagatik edo harreragatik kontratuaren etenaldiak amaitu ondoren kaleratzea deuseztzat jotzeko epea 12 hilabetekoa da.
• Babes hori luzatu egiten da langilea adingabea zaintzeko eszedentzia- edo murrizketa-egoeran badago.
• Probaldiak irauten duen bitartean, kontratua enpresak eskatuta suntsiaraztea deuseza izango da haurdun dauden langileen kasuan, eta haurdunaldia hasten denetik erditu arte, haurdunaldiarekin edo amatasunarekin zerikusirik ez duten arrazoiak egiaztatzen ez badira.

PRESTAZIO EKONOMIKOA

Etenaldi horretan, langileak oinarri arautzailearen % 100eko prestazio ekonomikoa izango du Gizarte Segurantzan.

Gizarte Segurantzako Institutu Nazionalak (GSIN) kudeatuko du. Informazio gehiago hemen. Informazio gehiago hemen.