Nortzuek eman dezakete botoa?

Hauteskunde Orokorretan, atzerritik bozkatu ahal izango dute Euskadiko edozein udalerritan jaiotako herritarrek eta horien ondorengoek, baldin eta, Espainiako nazionalitatea izanik eta adin nagusikoak izanik, atzerrian bizi badira etengabe eta atzerrian bizi diren Egoiliarren Hautesle Erroldan (CERA) inskribatuta badaude.

Nola eta noiz bozkatzen da?

1. CERAn izena emanda dagoela egiaztatzea

   Atzerrian bizi bazara  2024ko ekainaren 9ko hauteskundeetan eman dezakezu botoa; horretarako, lehenik eta behin, dagokion kontsulatuan edo enbaxadan egiaztatu beharko duzu atzerrian bizi direnen hautesle-erroldan (CERA) inskribatuta zaudela. Datuak zuzenak ez badira, erreklamazioa aurkeztu beharko duzu legez ezarritako epean.

2. Lehenengo bidalketa (maiatzaren 4tik 10era)

   Hautesle-erroldaren Bulegoak honako agiri hauek bidaliko dizkizu, ofizioz, posta ziurtatu bidez, zure inskripzio-helbidera:

   • Botoa emateko gutun-azala, dagozkion hauteskundeetarako.
   • Hautesle-erroldan izena eman izanaren bi ziurtagiri. Horietako batek taloi bat darama, frankeo-gastuak itzultzeko eskatzeko. Botoa postaz bidaltzen bada bakarrik erabiliko da taloia.
   • Dagokion Hauteskunde-batzordeko zuzendaritzarekin eta hauteslea inskribatuta dagoen ordezkaritza diplomatikoaren karrerako bulego kontsularraren edo atal kontsularraren zuzendaritzarekin.
   • Boto-eskubidea erabiltzeko moduari buruzko informazio-orria eta behin betiko hautagai-zerrendak erakutsiko dituen web-orriaren helbidea. Orri horretan, deskarga daitezkeen boto-orriak egongo dira eskuragarri, lehiatzen diren hautagai-zerrenda guztiekin, bai eta abian diren hauteskunde-prozesuei buruzko beste edozein informazio ere.
   • Kontsuletxeko barrutian botoa hautestontzian uzteko gaitutako zentroen zerrenda.
   • Gainera, Bulego Kontsularrek baliabide informatikoak izango dituzte botoa emateko beharrezkoa den CERAko inskribapenaren ziurtagiriak deskargatu eta hautesleei emateko.

3. Bigarren bidalketa posta arruntez (maiatzaren 15etik 25era).

   Bertan, aldarrikatutako hautagaiei dagozkien papeletak bidaliko dira.

   Papeleta-sorta osoa ere deskarga daiteke telematikoki.

4. Botoa ematea

   Bertan ez dauden egoiliarrek bi bide dituzte: postaz edo hautestontzian, kontsulatuetan edo horretarako prestatutako lekuetan.

   1. Botoa posta ziurtatu bidez ematea (ekainaren 4an). Honako hauek jaso behar dituzu:
      • Dagokion Hauteskunde-batzordeari zuzendutako gutun-azalean, bozkatzeko gutun-azala, erroldan izena eman izanaren bi ziurtagirietako bat eta agiri hauetako bat: Espainiako agintariek emandako NANa edo pasaportea, Espainiako nazionalitatearen ziurtagiria edo Matrikula Kontsularraren Erregistroan izena eman izanaren ziurtagiria.
      • Bulego Kontsularrari zuzendutako gutun-azalean, Hauteskunde-batzordeari zuzendutako gutun-azala, lehen aipatutako agiriak, hautesle-erroldako beste inskripzio-ziurtagiria eta sinatutako frankeo-gastuak itzultzeko eskaeraren taloia jasotzen dituena.

   2. Kontsulatu edo zentro gaituetan bozkatzea (ekainaren 1etik 6ra, biak barne)

   Aurrez aurre entregatu behar dituzu lehen aipatutako gutun-azalak eta agiriak, inskribatuta egoteagatik dagokien bulego edo atal kontsularretan edo horretarako izendatutako lekuetan.

   Kontsulatuko funtzionarioak zure nortasuna egiaztatzeko eskatuko dizu, legez baliozkoa den agiri baten bidez (NANa, pasaportea, nazionalitate-ziurtagiria edo Matrikula Kontsularraren Erregistroko inskripzio-ziurtagiria), eta aurrez jaso duen egoiliarren erroldako inskripzio-ziurtagirietako bat erakusteko eta emateko.