Mahaiko kideen gida
Zenbaketa
- Botoak zenbatzea
- Mahaiko hauteskunde-emaitzak jendaurrean iragartzea
- Mahaiko bilkura-akta idaztea eta sinatzea
Botoak zenbatzea
Aurreko hauteskunde-lanak amaitu eta gero, hauteskunde-mahaiko lehendakariak bozketa amaitu dela adieraziko du eta botoak zenbatzen hasiko da. Hori egin bitartean, nahi duen pertsona guztiak egon daitezke, betiere hauteskunde-aretoan sartzen badira.
Hauteskunde-mahaiko lehendakariaren ustez, aretoko giroa aztoratu bada eta botoak ezin badira zenbatu, jendea bertatik ateratzeko agindu dezake. Hori gertatuz gero, hauek bakarrik geratuko dira:
- Hauteskunde-mahaiko bokalak.
- Hautagai-zerrenden lurralde-ordezkariak.
- Ikuskatzaileak eta ahaldunak.
- Notarioak.
- Hauteskunde-mahaiko lehendakariak eskatutako agintaritzaren agenteak.
- Hauteskunde Batzordeetako kideak.
- Instrukzioko epaileak edo haien delegatuak.
- Euskadiko administrazioko ordezkariak.
Hauteskunde-mahaiko lehendakariak banaka aterako ditu gutun-azalak hautestontzitik eta zenbatzen hasiko da. Ireki eta gero, ozen irakurriko du bozkatu den hautagai-zerrendaren izena eta boto-txartela erakutsiko die hauteskunde-mahaiko bokalei, ikuskatzaileei eta han dauden ahaldunei. Gainera, boto baliogabeak eta boto zuriak bereiziko ditu.
Hauek izango dira BOTO BALIOGABEAK:
- Ofiziala ez den gutun-azala edo boto-txartela.
- Gutun-azalik gabe emandako boto-txartelak edo hautagai-zerrenda ugariko boto-txartel bat baino gehiago dituen gutun-azala. Hautagai-zerrenda bereko boto-txartel bat baino gehiago dituen gutun-azala badago, HAUTAGAI ZERRENDA HORREN BOTO BALIODUN BAKARRA zenbatuko da.
- Izenak aldatuta edo ezabatuta edo ordena aldatuta duten boto-txartelak.
- Irainak edo botoarekin zerikusirik ez duen edozein esamolde dituztenak.
- Kanpo aldetik ezagutzeko zeinuak dituzten gutun-azalean emandako botoak.
EZ DIRA BOTO BALIOGABEAK hautagai-zerrendako izenen baten ondoan seinale edo gurutze bat duten boto-txartelak, betiere boto-txartelaren konfigurazioa aldatzeko modukoak ez badira edo hautagai-zerrendako kideren bati edo haien talde politikoari gaitzespena agertzeko ez badira (Konstituzio Auzitegiaren 123/2011 epaia, uztailaren 14koa, eta Hauteskunde Batzorde Zentralaren 1/2012 instrukzioa, martxoaren 15ekoa)
Hauek izango dira BOTO ZURIAK:
- Boto-txartelik ez duten gutun-azaletan emandakoak.
- Hauteskunde-barrutian legez kenduta dagoen hautagai-zerrenda baten alde emandakoak.
Zenbaketa amaitzean:
- Hautestontzitik ateratako gutun-azalak eta Mahaiko Zerrenda Zenbakidunean erregistratutako boto-emaileen kopurua bat datozela egiaztatuko da. Hala ez bada, gertaeraren berri Bilkura Aktan jasoko da eta gutun-azalen zein Mahaiko Zerrenda Zenbakidunean erregistratutako boto-emaileen kopurua adieraziko dira.
- Mahaiburuak galdetuko du boto-zenbaketaren inguruko kexarik dagoen. Kexak gehiengoz erabakiko dituzte hauteskunde-mahaiko lehendakariak eta hauteskunde-mahaiko bokalek.
Mahaiko hauteskunde-emaitzak jendaurrean iragartzea
Hauteskunde-mahaiko lehendakariak boto-zenbaketaren inguruko datuak ozen emango ditu:
- Mahaiko Hauteskunde Erroldako hautesleen kopurua (Hauteskunde Erroldaren Bulegoaren informazio-oharrean dauden datuak, Hauteskunde Erroldako zerrendekin batera jasotzen dena).
- Mahaiko Zerrenda Zenbakidunean erregistratutako boto-emaileen kopurua.
- Boto baliogabeen kopurua.
- Guztira, emandako boto baliodunen kopurua.
- Boto zurien kopurua.
- Hautagai-zerrenda bakoitzaren botoen kopurua.
Mahaiak hauxe egiaztatuko du:
Zerrenda Zenbakituan jasotako boto-emaileen kopurua = Boto baliogabeak + Boto baliodunak
Era berean:
Boto baliodunak = Boto zuriak + Hautagai-zerrendek lortutako botoak
Mahaiko boto-zenbaketaren behin-behineko jakinarazpena betetzea eta euskal administrazioko ordezkariari eta eskatzen duten ikuskatzaileei eta ahaldunei ematea.
Behin zenbaketa amaituta, hauteskunde-mahaiko lehendakariak Boto-zenbaketaren behin-behineko jakinarazpena bete eta eman beharko dio Euskal Administrazioak izendatutako pertsonari, aurrez ordezkaritza egiaztatuta, Eusko Jaurlaritzak behin-behineko emaitzen berri ematearren.
Horretaz gain, hauteskunde-mahaiko lehendakariak, okerrik egin gabe, behin-behineko jakinarazpen hauek egin beharko ditu.
- Boto-zenbaketaren behin-behineko jakinarazpena, kanpo aldean edo mahaiaren sarreran jartzeko.
- Boto-zenbaketaren behin-behineko jakinarazpenak, eskatzen duten ikuskatzaile, ahaldun eta hautagaientzat; hautagai-zerrenda bakoitzeko jakinarazpen bat bakarrik emango dela kontuan hartuz.
Mahaiko bilkura-akta idaztea eta sinatzea
Mahaian emandako botoak zenbatu eta Boto-zenbaketaren behin-behineko jakinarazpena egin eta gero, bilkura-akta idatzi behar da, hauek zehaztuko dituena:
- Mahaiko Hauteskunde Erroldako hautesleen kopurua.
- Boto-emaileen kopurua = hautestontzitik ateratako gutun-azalen kopurua.
- Boto baliogabeen kopurua.
- Boto baliodunen kopurua = boto zuriak + hautagai zerrenda guztiek lortutako botoen kopurua.
- Boto zurien kopurua.
- Hautagai-zerrenda bakoitzak lortutako boto-kopurua.
- Mahaiko Zerrenda Zenbakidunean jasotako boto-emaile guztien kopurua.
- Hauteskunde Erroldan alta diren aurkeztutako errolda-ziurtagiri berezien kopurua.
- Aurkeztutako epai judizialen kopurua.
- Mahaiko boto-emaileen zerrenda zenbakidunean egonda baina Mahaiko errolda-zerrendetan egon gabe boto eman duten ikuskatzaileen kopurua.
Halaber, aktan hauek jasoko dira: gertaerak, protestak eta erreklamazioak, hain zuen, zerrenden ordezkariek, hautagai-zerrendetako kideek, bere ahaldunek eta ikuskatzaileek eta hautesleek bozketaren eta zenbaketaren inguruan egingo dituztenak; baita ere, mahaiak horien gainean hartutako erabakiak eta boto partikularrak, egonez gero
Hautestontzitik ateratako gutun-azalen kopurua eta Mahaiko Zerrenda zenbakidunean erregistratutako boto-emaileen kopurua bat ez badatoz, bilkura-aktako gertaeren atalean adieraziko da.
Era berean, bilkura-aktarekin batera gordeko dira ikuskatzaileak izendatzearen inguruko taloi-orriak edo izendapenaren kopia, eta, halakorik ezean, hauteskunde-mahaiko lehendakariari emandako izendapen-agiriak.
Bilkura-akta bete eta gero, hautagai-zerrendetako ordezkariek eta kideek zein haien ahaldunek eta ikuskatzaileak aktaren kopia jasotzeko eskubidea izango dute.
Azkenik, boto-txartelak hautsi egingo dira edonola, baina ez honako hauek:
- Balioa ukatutako boto-txartelak (boto baliogabeak).
- Erreklamazioa edo zalantza sortu dutenak.
Hautsi gabeko boto-txartelekin hauxe egingo da:
- Hauteskunde-mahaiko lehendakariak eta hauteskunde-mahaiko bokalek boto-txartelak atzealdean sinatuko dituzte.
- Bilkura-aktarekin batera gordeko dira (zenbaketa amaitzean, akta idazten denean).
