Zornotza
Bizkaiko erdialdeko udalerria (Durangaldea). Amorebieta-Etxano du izen ofiziala. Mugak: iparraldean, Larrabetzu, Morga eta Muxika; ekialdean, Muxika eta Durango; mendebalean, Larrabetzu, Galdakao eta Lemoa; hegoaldean, Dima eta Durango. Garaiera, 70 m. 58,69 km2. 1997ko datuen arabera, 16.228 biztanle (zornotzarrak). Herrigune hauek osatua da Zornotzako udalerria: Zornotza (herriburua), Aldama, Astepe, Antzagana, Bernagoitia, Boroa, Etxano, Euba, Gumuzio, Leginetxe, Montorra, Nafarroa, Oromiño eta San Migel. Ibaizabal ibaia igarotzen da udalerritik. Euskara, bizkaiera. Hizkuntza banaketa 1996an: 8.438 euskaldun, 2.634 ia-euskaldun eta 4.714 erdaldun. Industria (altzairugintza, zurgintza, papergintza, janari industria, eraikuntza, ehungintza, industria kimikoa; langileen % 70) eta zerbitzuen alorra (oinarrizko zerbitzuak; langileen % 22,5) dira ekonomia jarduera nagusiak. Aipagarriak dira XVI. mendeko Andra Maria eliza Zornotzan, Etxanoko X. mendeko Ama Birjina eliza (XVI. mendean berreraikia), XVIII. mendeko karmeldarren komentua eta Bernagoitiako XIII. mendeko San Migel Goiaingeruaren eliza. v Historia. XIII. mendeko dokumentu batean aipatzen da lehen aldiz Zornotzako herria. XVIII. mendean zehar Bizkaiko jaurerriko elizate oparoenetakoa zen, garrantzi handiko bidegurutzean baitago. 1441. urtean jaso zuen hiri-gutuna Joan II.a erregearen eskutik.
