Zaratamo
Bizkaiko erdialdeko udalerria, Nerbioi ibaiaren eskuinaldean (Bilboaldea). Mugak: iparraldean Basauri eta Galdakao, ekialdean Galdakao, mendebalean Basauri eta Arrigorriaga eta hegoaldean Zeberio. Garaiera, 170 m. 9,99 km2. 1997ko datuen arabera, 1.619 biztanle (zaratamarrak). Auzo nagusiak: Zaratamo-Etxalde (herriburua), Arkotxa, Burbustu-Altamira, Gutiolo eta Moiordin-Barrondo. Udalerritik Nerbioi (mendebaletik) eta Ibaizabal (iparraldetik) ibaiak igarotzen dira. Euskara, bizkaiera; euskaldunak, % 45. Hizkuntza banaketa 1996an: 596 euskaldun, 278 ia-euskaldun eta 690 erdaldun. Ekonomia jarduera nagusia industrian (altzairugintza, industria kimikoa, zurgintza; langileen % 75) oinarritua da. Aipagarriak dira San Lorentzo martiriaren parrokia eliza (XIX. mendean zaharberritua) eta Jasokunde, San Bizente eta San Migel ermitak.
