Wiebe, Rudy
Kanadar eleberrigilea (Fairholme, Saskatchewan, 1934). Ingelesez idazten du. Albertako Unibertsitatean ikasi zuen 1953-1956 bitartean eta Tübingenekoan, Alemanian, 1957-1958 urteetan. Kanadara itzuli zenean, eskolak eman zituen Mennonite Brtethren Bible Collegen eta Goshen Collegen. 1967. urteaz geroztik ingeles irakaslea da Albertako Unibertsitatean. Bai forma aldetik bai estilo aldetik bide berriak saiatu zituen arren, bere narratiba kristau ikuspegiak zedarritua dago. Zazpi eleberri idatzi ditu, horien artean Peace shall destroy many (1962, Bakea askoren suntsitzaile), The blue mountains of China (1970, Txinako mendi urdinak), The temptations of Big Bear (1973, Hartza Handiaren tentazioak), The mad trapper (1980, Ehiztari zoroa) eta My lovely enemy (1983, Nire etsai maitea). Gainera kontakizunak eta antzerki lanak ere idatzi ditu; lehenen artean Where is the voice coming from? (1974, Nondik heldu da ahots hori?) da aipagarrienetako bat, eta antzerki lanen artean, berriz, Far as the eye can see (1977, Begiz ikus daiteken lekuraino). Bestalde, zenbait kontakizun bilduma apailatu ditu: The story makers (1970, Ipuin kontalariak), Stories from western Canada (1972, Kanada mendebaldeko kontakiziunak), Double vision: twentieth century stories in English (1976, Ikuspegi bikoitza: Hogeigarren mendeko istoriak ingelesez), eta Getting here: Edmonton story anthology (1977).
