Uhartehiri
Nafarroa Behereko ipar-ekialdeko udalerria, Donibane-Garaziko kantonamenduan. Uhart-Mixe du izen ofiziala. Mugak: iparraldean, Donapaleu; ekialdean, Larribarre-Sorhapürü eta Lohitzüne-Oihergi (Zuberoa); mendebalean, Ostankoa eta Izura-Azme; hegoaldean, Arhantsusi eta Phagola. 11,74 km2. 1999ko datuen arabera, 210 biztanle (uhartearrak/uhartehiriarrak). Biduze ibaiak hegoalde iparralde igarotzen du udalerria. Euskara, behe-nafarrera; euskaldunak, % 99. Laborantza (artoa, barazkiak, bazkarako landareak) eta abere hazkuntza (ardi eta behi azienda) dira ekonomia jarduera nagusiak.
