Travis, Randy
(Jaiotza izena, Randy Bruce Traywick). Estatubatuar musikaria (Ipar Karolina, 1959). Aitaren gidaritzapean, zortzi urterekin, gitarra jotzen hasi zen, eta urte pare bat geroago, Ricky anaiarekin, The Traywick Brothers bikotea osatu zuen. Hamasei urterekin Charlottera joan zen, eta tabernetan jotzen hasi zen. 1978an kontratu bat izenpetu zuen Paula Records diskoetxearekin, eta hurrengo urtean bi abesti grabatu zituen. Horietako batek, "She's my woman" abestiak, country musikako zerrendetan sartzea lortu zuen. 1982an Nashwillera joan zen; sukaldari gisa aritu zen lanean eta bere kabuz bere lehen diskoa argitaratzea lortu zuen, Randy Ray izenpean: Randy Ray Live. 1985ean Warner Brothersek fitxatu zuen eta Randy Travis izena hartu zuen. Hurrengo urtean argitaratu zuen lehenengo diskoa: Storms Of Life, hiru milioitik gora disko saldu zituen, eta iraultza handia gertatu zen country musikan. 1987an Always & Forever argitaratu zuen, eta disko horretako lehen abestiaren argitalpenetik 1989. urtea arte zazpi alditan iritsi zen musika zerrendetako lehen postura. Hura izan zen Travisen karrerako unerik gozoena. Old 8X10 (1988) eta No Holdin' Back (1989) diskoek ez zuten halako arrakastarik izan, baina haietatik ere lehen postuetara iritsi ziren abestiak atera ziren. Laurogeita hamarreko hamarraldia Hard Rock Bottom Of Your Heart diskoarekin hasi zen, bere disko arrakastatsuenarekin. 1992an Wind In The Wire argitaratu zuen, oharkabean igaro zena, eta bi urte geroago, berriz, This Is Me, arrakasta handikoa. 1996an Full Circle plazaratu zuen, Warner Brothers etxearekin argitaratu zuen azkena. Dreamworks konpainiak kontratatu zuen orduan, eta You and You Alone argitaratu zuen harekin, 1998an.
