Tesalia
(Gr. Thessalia). Greziako iparraldeko antzinako eskualdea, Olinpo, Pindo eta Otris mendialdeen artean, Egeo itsasoaren ertzean, Karditsa, Larisa, Trikala eta Magnesiako nomo edo probintziek osatua. 14.037 km2 eta 731.030 biztanle. Hiri nagusiak: Larisa eta Volos. Laborantza (garia, mahatsa, tabakoa, olibondoak) eta abere hazkuntza dira ekonomia jarduera nagusiak. Industria (ehungintza, janari industria, eraikuntzarako gaiak) aurreratu gabe dago. v Historia. Tesaliako Neolitos garaiko hiriak dira antzinako Greziako hiri zaharrenak. K.a. 2600. urte aldera, pelasgoak joan ziren Asia Txikitik Tesaliara. Heleniarrak kokatu ziren ondoren eta haiekin batera bizi izan ziren. Herri hauek bereizten ziren historiaurrean: mirmidoniarrak edo akkaiarrak, miniarrak, eoliarrak, beoziarrak, dolopoak eta perrebearrak. Ospe handia zuten Tesaliako zaldiek eta zaldizkoek. K.a. XIV. mendean, Troiako gerraren ondoren, doriarrak nagusitu ziren Tesalian eta aristokrazia militar batek izan zuen agintea hurrengo mendeetan. K.a. IV. mendean, Espartaren aurka borrokatu ziren Tesaliako herriak eta K.a. 342. urtean mazedoniarren mende geratu zen lurralde osoa. K.a. 146. urtean Mazedoniako herrialde erromatarraren barnean geratu zen eta Bizantzioko inperioaren barnean V. mendetik aurrera. XI. mendean valakiarrek hartu zuten. 1349an serbiarren inperioaren barnean geratu zen, eta 1393an turkiarren mende. 1831-1881 bitartean Tesaliako lurralde guztiak Greziako estatu modernoan sartu ziren.
