Saint-Just, Louis Antoine
Frantses politikaria (Decize, Nièvre, 1767 - Paris, 1794). Soissons eta Reims-ko hirietan egin zituen ikasketak. 1789an iraultzaren alde jarri zen adore handiz. Satira poema bat idatzi zuen urte hartan, Organt, eta 1791. urtean Esprit de la Révolution et de la Constitution de France (Frantziako Iraultzaren eta Konstituzioaren izpiritua) lana idatzi zuen, Frantziako Iraultzaren teorialari gazteenetako bat bihurtu zuena. 1792an Konbentzioko diputatu aukeratu zuten Aisne-ko departamenduan, eta menditar jakobinoen artean guztiz nabarmendu zen: erregearen heriotza eskatu zuen, epaiketarik gabe, eta girondarren konstituzio federalistaren aurkari sutsuena izan zen. Comité de santé publique («Herri osasunerako batzordea») batzordeko kide izendatu zuten, eta Frantziako gudarosteaz eta barne arazoez arduratu zen. 1794ko otsailean Konbentzioko lehendakari egin zuten, eta iraultzaren aldeko diktadura indartu zuen Robespierre-rekin batera: ekonomiaren erreforma (alde egindako aberatsen ondasunak pobreen artean banatzeko agindua) eta alderdien zapalkuntza (hebertisten eta dantonisten aurkako kanpainak). Robespierre-rekin batera hartu zuten preso, Thermidor-aren 9an (1794ko uztailaren 27an), eta biharamunean hil zituzten biak gillotinan.
