Propertzio
(Lat. Sextus Aurelius Propertius). Poeta latinoa (Asis, Unbria, K.a. 47 - Unbria, K.a. 15). Erromara jo zuen K.a. 34. urtean, eta Mezenasek babestu zuen. Idatzi zituen lau elegia liburuak jakintza handikoak eta idazkera dotorekoak dira. Lehen bi liburuetan maitasuna da gai nagusia; gai abertzaleak eta mitologikoak landu zituen beste bi obretan. Eragin handia izan zuen Ovidio, Petronio eta beste zenbait idazle erromatarrengan.
