Euskararen tresnak

Lur hiztegi entziklopedikoa

Kultura eta Hizkuntza Politika Saila

Neves, Tancredo de Almeida

Brasildar politikaria (São João del Rei, Minas Gerais, 1910 - São Paulo, 1985). Belo Horizonteko Unibertsitatean zuzenbideko doktoregoa eskuratu zuen. Katoliko sutsua zen, eta bere karrera politikoa eten egin zuen 1937-1945 bitartean, Getúlio Vargas-en diktaduraren garaian. Baina ondoren alderdi sozial-demokratarekin bat egin zuen erregimenaren demokratizazioaren garaian. 1947an diputatu hautatu zuten, eta orobat 1951n. Handik bi urtera Justiziako ministro izendatu zuten. 1954an Vargas presidentea lagundu zuen bere burua hil aurreko orduetan eta agintari sozialistaren oinordeko politikotzat hartu zuten. Tancredo Neves João Goulart presidentearen Lehen Ministro bihurtu zen 1961ean. Militarren mendeko agintaldian (1964-1984) Brasilgo higikunde demokratikoaren diputatu izan zen (oposizioko alderdia, legez onartu zen bakarra) eta Minas Gerais estatuko gobernadore izendatu zuten 1982an. Demokratizazioaren garaian, Errepublikako lehendakari hautatu zuten 1985ean, baina urte horretan bertan hil zen.