Kordoba
Espainia hegoaldeko probintzia, Andaluziako Autonomia Erkidegoan dagoena. 13.718 km2 eta 732.000 biztanle (1981). Mugak: iparraldean Ciudad Real eta Badajoz, ekialdean Jaen eta Granada, mendebalean Badajoz eta Sevilla, eta hegoaldean Sevilla, Malaga eta Granada. Hiriburua: Kordoba. Hiri nagusiak: Lucena, Puente-Genil, Montilla, Cabra, Baena eta Priego de Kordoba. Guadalquivir ibaia igarotzen da probintziatik. Hiru eskualde nagusi bereizten dira Kordobako probintzian: Campiña izeneko ordoki zabala, Guadalquivir ibaiaren ezkerraldean; Sierra Morenako mendi apalak iparraldean eta Betika mendiak hegoaldean (La Horconera, 1570 m). Klima kontinentala, lehorra eta eguzkitsua da. Nekazaritza (olibondoak, mahastiak, laboreak, eta kotoia), abeltzaintza (zerri, behi eta ardi azienda). Industria Kordoba eta Peñarroya hirietara bildu da nagusiki.
