Bangkok
(izen ofiziala Krung-thep) Thailandiako erreinuko hiriburua, Menam Txao Phraya ibaiaren behe arroan, Siam Golkoaren ondoan. 5.174.682 biztanle (1984). Ospe handiko unibertsitateak (Txulalongkorn eta Thammasat). Nazioarteko aireportua. Ubide ugarik zeharkatzen duten hiri zaharraren eta modernoaren artean alde handiak daude. Monumentu ugari daude XVIII. mendekoak (errege jauregia) eta XIX. mendekoak (ehundaka tenplu budista). Thailandiako kultura hiri nagusia izateaz gainera, nazioarteko erakunde batzuen egoitza da (SEATO; CEAEO). Garrantzi handia du ekonomian, Thailandiako ia industria gehienak bertara biltzen baitira. Thailandiako portu garrantzitsu bakarra da (inportazioen % 95 eta esportazioen % 75).
