Lurralde Plangintza eta Hiri Agenda

Dekretu honen helburua da Euskal Autonomia Erkidegoko nekazaritzako eta elikagaigintzako elkarte adierazgarriak aitortzea eta erroldan inskribatzea arautzea.

Dekretu honen eranskinean ezarritako tipologiari jarraiki sailkatuko dira nekazaritzako eta elikagaigintzako elkarteak.

Nekazaritzako eta elikagaigintzako elkarte eta federazio profesionalek eta enpresarialek baldintza hauek bete behar dituzte nekazaritzako eta elikagaigintzako elkarte adierazgarritzat hartzeko:

Helburu eta jarduera sozialek zerikusia izatea nekazaritzako eta elikagaigintzako sektoreen defentsarekin eta horiek ordezkatzearekin.

Legearen arabera eratuta eta inskribatuta egotea dagokien erregistroan.

Euskal Autonomia Erkidegoan izatea egoitza soziala, eta, halaber, kideen % 70ek gutxienez Euskal Autonomia Erkidegoan izatea egoitza.

Zerga-betebeharrak eta Gizarte Segurantzarekikoak egunean izatea.

Jardueraren lurralde-eremuak lurralde historiko bat baino gehiago hartzea, baldin eta elkartearen produkzioa edo jarduera ez bada lurralde bakar batera mugatzen.

Azpisektore jakin bateko ekoizleen edo operadoreen gutxieneko kopuru baten ordezkari izatea edo gutxieneko negozio-bolumenarena, hurrengo artikuluan ezarritakoaren arabera.

Nekazaritza-erakunde profesionalak adierazgarriagoak izango dira Nekazaritza eta Elikagaigintza Politikari buruzko abenduaren 23ko 17/2008 Legearen 87. eta 88. artikuluetan aurreikusitako baldintzak betetzen badituzte.

Nekazaritzako eta elikagaigintzako elkarteek honako obligazio hauek bete beharko dituzte, euren jardueraren barruan:

Emakumeenganako eta gizonenganako tratua berdina izatea esparru guztietan, kanpoko zein barruko esparruetan.

Dekretu hau aplikatzetik sortuko diren administrazio publikoekiko harremanetan, idatzizkoetan zein ahozkoetan, pertsona fisikoek eta pertsona juridikoen ordezkariek euskara eta gaztelania erabiltzeko eskubidea eta aukeratuko duten hizkuntzan arreta jasotzeko eskubidea izango dutela bermatzea. Eta Kontsumitzaileen eta Erabiltzaileen Estatutuari buruzko abenduaren 22ko 6/2003 Legeak dakartzan hizkuntza-betebeharrak ere zaindu beharko ditu.

Dekretu honen eranskineko I. ataleko azpisektoreetako elkarteek (ekoizleen elkarteak) baldintza hauetakoren bat bete behar dute:

Gutxienez, 200 kide izatea, eta kide horiek izatea EAEko Nekazaritza Ustiategien Erregistro Orokorrean inskribatuta dauden ustiategietako titularrak edo titularkideak; edo

Gutxienez, azpisektore horren ustiapenaren % 25 hartzea bere baitan, edo azpisektorearen fakturazioari dagokionez, gutxienez, % 25 fakturatzea.

Dekretu honen eranskineko II. ataleko azpisektoreetako elkarteek (nekazaritza- eta elikagaigintza-industrien elkarteak) baldintza hauetakoren bat bete behar dute:

Azpisektoreko elkarte bakarra izatea, edo

Azpisektoreko enpresen % 45en ordezkari izatea, edo

Fakturatzea, gutxienez, azpisektorearen % 25.

Euskal Autonomia Erkidegoko nekazaritzako edo elikagaigintzako elkarte adierazgarritzat hartzeko eskabidea nekazaritzaren arloko eskumena duen Sailaren Kabinetearen Zuzendaritzara helarazi behar da, eta Herri Administrazioen Araubide Juridikoari eta Administrazio Prozedura Erkideari buruzko Legearen 38.4 artikuluan ezarritako edozein baliabideren bidez aurkeztu ahal izango da.

Nekazaritza eta elikagaigintza sektoreetako elkarte eta federazio profesional eta enpresarialen kasuan, eskabidearekin batera, honako agiri hauek aurkeztu behar dira:

Erakundearen estatutuak.

Dagokion erregistroan inskribatuta dagoela adierazten duen agiriaren kopia eta Identifikazio Fiskalaren Kodea.

Beren baitan hartzen dituzten ekoizpen-motak, jarduerak edo sektoreak.

Erantzukizunpeko adierazpena, kide-kopuruari buruzkoa (sexuaren arabera bereizita).

Zuzendaritza- eta gobernu-organoen osaera, sexuaren arabera bereizita.

Kide direnen ekoizpenaren edo jardueraren negozio-bolumena.

Aurreko ekitaldian egindako jardueren memoria.

Nekazaritza-erakunde profesionalen kasuan, eskabidearekin batera, honako agiri hauek aurkeztu behar dira:

Erakundearen estatutuak.

Dagokion erregistroan inskribatuta dagoela adierazten duen agiriaren kopia eta Identifikazio Fiskalaren Kodea.

Erantzukizunpeko adierazpena, kide-kopuruari buruzkoa (sexuaren arabera bereizita).

Zuzendaritza- eta gobernu-organoen osaera, sexuaren arabera bereizita.

Aurreko ekitaldian egindako jardueren memoria.

Euskal Autonomia Erkidegoko nekazaritzako eta elikagaigintzako elkarte adierazgarriaren aitorpena, hala badagokio, ebazpen bidez egingo da, eta nekazaritzaren arloko eskumena duen Saileko Kabinetearen Zuzendaritzako titularrak emango du ebazpena.

Aitorpena emateko edo ukatzeko ebazpena, gehienez, eskabideak aurkezteko epea bukatu eta hiru hilabeteko epean eman eta jakinaraziko da. Epealdi horretan berariazko ebazpenik izan ezean, eskabidea onartutzat hartuko da, Herri Administrazioen Araubide Juridikoari eta Administrazio Prozedura Erkideari buruzko Legearen 43.2 artikuluaren arabera.

Nekazaritzako edo elikagaigintzako elkarte adierazgarriaren aitorpena izateak berekin dakar erakunde hori ofizioz eranstea Euskal Autonomia Erkidegoko Nekazaritzako eta Elikagaigintzako Elkarteen erroldan, Nekazaritza eta Elikagaigintza Politikari buruzko abenduaren 23ko 17/2008 Legearen 86. artikuluan xedatutako erroldan, hain zuzen.

Horretaz gainera, nekazaritzako edo elikagaigintzako elkarte adierazgarriaren aitorpena izateak berekin dakar, Euskadiko Nekazaritzako eta Elikagaigintzako Kontseiluan parte hartzeari dagokionez, euskal administrazio publikoen kontsultak erantzutea eta haiekin elkarrizketak egitea, Nekazaritza eta Elikagaigintza Politikari buruzko abenduaren 23ko 17/2008 Legearen VII. tituluan adierazitakoekin bat.

Aitorpena duten nekazaritzako edo elikagaigintzako elkarteek ez badute dekretu honen 2. artikuluan xedatutako baldintzaren bat betetzen, izaera hori galduko dute.

Agerian badago edo zantzurik badago aitortuak izan diren nekazaritzako eta elikagaigintzako elkarte adierazgarriek utzi egin diotela dekretu honen 2. artikuluan aurreikusitako obligazioren bat edo baldintzaren bat betetzeari, aitorpen hori kentzeko prozedurari emango zaio hasiera, nekazaritzaren arloko eskumena duen Sailaren Kabinetearen Zuzendaritzak emango duen ebazpen baten bidez. Ebazpen horretan interesdunei jakinaraziko zaie zeintzuk diren prozedurari hasiera emateko arrazoiak, eta hilabeteko epea emango zaie komenigarritzat jotzen dituzten alegazioak egiteko.

Behin alegazioak jasota, edo epea halakorik aurkeztu gabe igarota, nekazaritzaren arloko eskumena duen Sailaren Kabinetearen Zuzendaritzako titularrak dagokion ebazpena emango du. Nekazaritzako edo elikagaigintzako elkarte adierazgarri moduan duten aitorpena kenduz gero, erroldan ere baja emango die, ofizioz, erroldaren arduradunak.

Euskal Autonomia Erkidegoko Nekazaritzako eta Elikagaigintzako elkarte adierazgarrien errolda publikoa da eta haren egitekoa da, hain zuzen, dekretu honetan ezarritakoari jarraiki nekazaritzako edo elikagaigintzako elkarte adierazgarritzat hartu direnak inskribatzea; eta errolda-zenbaki bana emango zaie horiei.

Nekazaritzaren arloko eskumena duen Saileko Kabinetearen Zuzendaritzako titularra izango da erroldaren arduradun, eta zuzendaritza horretako langileek egingo dute lan bertan.

Erroldaren arduradunak egingo du ofizioz inskripzioa erroldan, baldin eta nekazaritzako edo elikagaigintzako elkarte adierazgarritzat hartu bada eta dekretu honen 2. artikuluan ezarritako baldintzak betetzen baditu.

Erroldan inskripzio-liburu bat egongo da, eranskinean jasotzen diren atal eta elkarte-mota guztiekin, eta bertan jasoko dira dekretu honetan ezarritako baldintzak betetzen dituzten nekazaritzako edo elikagaigintzako elkarte adierazgarriak, halakotzat aitortuak izan direnak.

Inskripzio-liburuak honako datu hauek jaso ditu idatziz:

Nekazaritzako edo elikagaigintzako elkarte adierazgarriaren izena, erakunde-mota eta identifikazio fiskaleko kodea.

Lurralde-eremua.

Helburu eta jarduera sozialak.

Entitatea noiz eratu zen eta noiz aitortu zen.

Kide kopurua eta bazkideen zerrenda, eta zuzendaritza eta gobernu organoen osaera, guztiak sexuaren arabera bereizita.

Kide direnen ekoizpenaren edo jardueraren negozio-bolumena, halakorik balego.

Hasieran erregistratutako datuetan egindako aldaketak eta, egonez gero, datuen deuseztapenak eta noiz deuseztatu ziren.

Inskribatuta dauden nekazaritzako eta elikagaigintzako elkarte adierazgarriek eguneratuta eduki behar dituzte erroldako datuak, eta erakundearen estatutuetan aldaketarik eginez gero, edo zuzendaritza- eta gobernu-organoetan aldaketarik gertatuz gero, bertako arduradunari eman behar diote horien berri.