Lurralde Plangintza eta Hiri Agenda

Zuzendaritza Kontseilua honako hauek osatuko dute:

1. Kontseiluburua: Eusko Jaurlaritzako lehendakaria.

2. Kontseiluburuordea: Emakunde-Emakumearen Euskal Erakundeko zuzendaria.

3. Kontseilukideak:

   • Euskal Autonomia Erkidegoko Administrazioak sei ordezkari izango ditu, hain zuzen ere hezkuntza, enplegua, osasuna, industria, kultura eta gizarte arazoen arloetako eskumenak dituzten sailburuek izendatutako sei sailburuorde.

   • Foru-administrazio bakoitzak hiru ordezkari izango ditu: organo eskudunek izendatutako foru-diputatuak izango dira.

   • Toki-administrazioek hiru ordezkari izango dituzte, Euskal Autonomia Erkidegoan ordezkaritza handiena duen udal elkarteak izendatuak.

   • Eusko Legebiltzarrean emakumeen eta gizonen berdintasunaren arloan eskuduna den Batzordeak ordezkari bat izango du; legegintzaldi bakoitzean, legebiltzarkideetako bat hautatuko da ordezkari.

   • Eusko Legebiltzarrak sei ordezkari izendatuko ditu, legegintzaldi bakoitzean; izendapenerako, pertsona horiek emakumeen eta gizonen berdintasunaren alde arlo pertsonalean edo profesionalean egindako lana hartuko da kontuan.

   • Emakunderen Aholku Batzordeak ordezkari bat izango du.

4. Idazkaria: Emakunde-Emakumearen Euskal Erakundeko idazkaria izango da; hitza izango du, baina botorik ez. Kanpoan edo gaixorik dagoenean, edo kargua bete gabe dagoenean, kontseilukiderik gazteena ariko da idazkari-lanetan.

Hona Zuzendaritza Kontseiluaren eginkizunak:

1. Emakumeen eta Gizonen Berdintasunerako Plana onestea, gero Jaurlaritzari aurkezteko.

2. Euskal Autonomia Erkidegoko emakumeen egoerari buruzko ebaluazio-txostena eta herri-botereek arlo horretan izandako jardunari buruzko memoria onestea, gero Jaurlaritzari aurkezteko.

3. Emakumeen eta gizonen berdintasunaren arloko arauen proiektuak onestea, gero Jaurlaritzari aurkezteko.

4. Erakundearen jardunari buruzko urteko memoria onestea.

5. Emakumeen eta Gizonen Berdintasunerako defendatzailea proposatzea.

1. – Zuzendaritza Kontseiluak ohiko bi bilkura egingo ditu urtean, gutxienez: bata, lehenengo seihilekoan eta bestea, bigarrenean.

2. – Horiez gainera, bilkura bereziak egin daitezke ondokoek eskatuta:

   1. Kontseiluburuak, edo

   2. Kontseiluko kideen bi herenak.

3. – Eskaera idatziz egin behar da b) idatz-zatiko kasuan, eta bertan, aztertu nahi diren gaiak proposatu behar dira eta zergatik aztertu nahi diren azaldu. Kontseiluburuak eskaera jaso eta hamabost egun igaro baino lehen deituko du bilkura berezia. Gai-zerrendan, nahitaez agertu behar dira eskatutako aztergaiak, eta kontseiluburuak gehiago ere sar ditzake.

4. – Kontseiluaren ohiko bilkuretarako deialdiak kontseiluburuak egin behar ditu, edo kontseiluburuordeak, haren lekuan ari denean.

   Zuzendaritza Kontseiluaren bilkuretarako deialdia bilkuraren eguna baino hamar egun lehenago egin behar da, gutxienez. Kontseiluburuak bilkura bat presazkotzat jotzen badu, nahikoa izango da deialdia lau egun lehenago egitea. Horrelako kasuetan, deialdian bertan azaldu behar da zergatik den presazkoa.

   Deialdia idatziz egin behar da; bertan, bilkura non, noiz eta zer ordutan izango den zehaztu behar da, eta aztertuko diren gaien zerrenda agertu behar da. Horrekin batera, Kontseiluko kideek bilkura prestatzeko behar dituzten agiriak eta txostenak ere banatu behar dira.

5. – Bilkuretako gai-zerrenda kontseiluburuak finkatuko du, edo kontseiluburuordeak, haren lekuan ari denean. Kontseiluko kideek gai zehatzak aztertzeko egiten dituzten proposamenak zerrenda prestatu baino lehen aztertuko dira. Nolanahi ere, kideen heren batek, gutxienez, formalki proposatzen dituen gaiak nahitaez sartu behar dira zerrendan.

6. – Zuzendaritza Kontseiluaren bilkurak, normalean, Emakunderen egoitzan, Gasteizen, egingo dira. Aparteko kasuetan, kontseiluburuak bidezko arrazoia dela-eta aginduta, bilkura Euskal Autonomia Erkidegoko beste toki batean egin daiteke.

7. – Kontseilua legez eratutzat jotzeko, ezinbestekoa da bilkuran, lehenengo deialdian, kontseiluburua, edo haren ordezkoa, eta gainerako kideen erdia egotea, gutxienez.

   Lehenengo deialdian aurrekoa gertatzen ez bada, ordubete geroago bilduko da Kontseilua, eta orduan nahikoa izango da kideen heren bat bertan izatea, kontseiluburua edo haren ordezkoa barne.

1. – Kontseiluak bilkuran diren kideen gehiengo soilaren aldeko botoez hartuko ditu erabakiak. Salbuespen bat dago: Emakumeen eta Gizonen Berdintasunerako Plana onesteko, gehiengo osoaren aldeko botoak beharko dira. Berdinketa gertatuz gero, kontseiluburuak ebatziko du bere kalitatezko botoarekin.

2. – Idazkariak izan ezik, Kontseiluko kide bakoitzak botobana edukiko du.

3. – Botazioak besoa jasoz egingo dira; aldeko edo aurkako botoa eman daiteke, eta abstenitu ere egin daiteke.

4. – Kontseiluburuak, bere ekimenez zein bilkuran bertan dauden kideen bosten batek eskatuta, botoa idatziz eta sekretuan emateko agindu dezake.

5. – Idazkariak emango du botazioen emaitzen berri.

6. – Zuzendaritza Kontseiluko kideek gehiengoaren erabakiaren aurkako boto partikularra aurkez dezakete, edo iragarri, betiere bilkura amaitutzat jo baino lehen. Norbaitek hori eginez gero, botoa idazki batean bidali behar dio Kontseiluko Burutzari, hiru egun igaro baino lehen. Epe horretan boto partikularraren idazkia aurkeztu ezean, uko egin zaiola pentsatuko da.

7. – Eguneko gai-zerrendan ez dauden gaiez ezin da baliozko erabakirik hartu, non eta kontseilukide guztiak bertan ez dauden, eta gehiengoaren aldeko botoaren bidez gaia presakoa dela deklaratzen ez den. Erabakiak gehiengoaren botoen bidez hartuko dira.

1. – Idazkariak bilkura guztien akta egingo du; akta horietan ondokoak jasoko ditu: bilkuran izan direnen izenak; aztertu diren gaiak; botazioen emaitzak, eginez gero, eta hartutako erabakiak.

2. – Kontseiluko kideek erabakien aurkako botoa agerraraz dezakete aktan, bai eta boto hori emateko arrazoiak ere.

3. – Bilkuren aktak Kontseiluak onetsi behar ditu, idazkariak sinatu eta kontseiluburuak berretsi baino lehen.

15. artikuluan azaldutakoez gainera, kontseiluburuak eskumen hauek ditu:

    1. Organoaren ordezkari nagusia izatea.

    2. Ohiko eta ohiz kanpoko bilkurak noiz egingo diren adostea, eta bilkura horietarako gai-zerrenda finkatzea; gainerako kideek egiten dituzten eskaerak ere kontuan hartuko ditu, baldin eta behar hainbesteko aurrerapenez egiten badituzte.

    3. Kontseiluaren bilkuretan buru aritzea, deliberamenduak zuzentzea, eztabaidak moderatzea, bilkurak bertan behera uztea horretarako arrazoirik egonez gero, eta, oro har, behar diren ahalmenak erabiltzea bilkurak ondo burutzeko.

    4. Berdinketak bere kalitatezko botoarekin ebaztea.

    5. Legeak betetzen direla ziurtatzea.

    6. Organoaren erabakiei buruzko aktak eta egiaztagiriak ikus-onestea.

    7. Kontseiluburuari dagozkion gainerako zereginak burutzea.

Kontseiluburua ez dagoenean, kontseiluburuordea ariko da haren eginkizun guztietan.

Hauek dira idazkariaren zereginak:

1. Bilkurak prestatzea.

2. Kontseiluaren bilkuretako aktak egitea.

3. Kontseiluaren erabakien ziurtagiriak ematea.

4. Kontseiluak izapidetzen dituen espediente guztiak bultzatzea, eta haien jarraipena egitea.

5. Aurreko idatz-zatietan azaldutako egintzak jasotzen dituzten dokumentuak biltzea eta zaintzea.

6. Kontseiluburuak agintzen dizkion kudeaketa- eta koordinazio-egintza guztiak egitea, bai eta karguari dagozkionak ere.

1. – Kontseilukideek eginkizun hauek dituzte:

   1. Bilkuretara joatea eta eztabaidetan aritzea.

   2. Bidezkoak jotzen dituzten proposamenak aurkeztea Kontseiluari.

   3. Dekretu honetako 9.2. artikuluan ezarritako ekimena abiaraztea.

   4. Botoa ematea, haren zentzua adierazita, eta boto partikularra ematea, gehiengoarekin bat datorrena zein ez datorrena.

   5. Kide anitzeko organo bateko kide diren aldetik dagozkien beste eginkizun guztiak.

2. – Kontseilukideek diru-konpentsazioa jaso dezakete bidaia-gastuengatik eta bilkuretan izateagatik, Emakunde-Emakumearen Euskal Erakundearen aurrekontuaren kargura.

Zuzendaritza Kontseiluak kontseiluburuordeari eskuordetu ahal dizkio erabaki bidez finkatzen dituen eginkizun guztiak.

1. – Emakundeko zuzendaria dekretu bidez izendatuko da, baita kargutik kenduko ere. Ondorio guztietarako, zuzendariaren maila sailburuordearena izango da.

2. – Hona zuzendariaren eginkizunak:

   1. Emakunde-Emakumearen Euskal Erakundearen legezko ordezkaria izatea.

   2. Emakunde-Emakumearen Euskal Erakundearen eginkizunetatik berariaz Zuzendaritza Kontseiluaren edo Idazkaritza Nagusiaren eskumenekoak ez direnak burutzea.

   3. Euskal Autonomia Erkidegoan emakumeen eta gizonen berdintasunerako politikak gainbegiratzea eta zuzentzea.

   4. Neurrien plana, ebaluazio-txostena eta herri-botereen jardunari buruzko memoria prestatzea (Emakunde sortu duen Legeko 4. artikuluan ezarri dira), gero Zuzendaritza Kontseiluak onets ditzan.

   5. Emakumeen eta gizonen berdintasunaren arloko arau-proiektuak prestatzea eta Zuzendaritza Kontseiluari aurkeztea, gero Jaurlaritzaren Kontseiluak onets ditzan.

   6. Emakunderen helburuak lortzea xede duten akordioak edo hitzarmenak sinatzea, eta horretarako administrazio-ebazpenak ematea.

   7. Emakunderen administrazioa zuzentzea, bai eta bere zerbitzuen jardueren kudeaketa eta barne-ikuskapena ere.

   8. Emakunderen urteko kudeaketari eta jardunari buruzko memoria prestatzea, eta aurrekontuaren aurreproiektua onartzea.

   9. Ordenamendu juridikoaren arabera erakunde autonomoek ondareaz eta kontratazioaz dituzten eskumenak erabiltzea, eta, bereziki, bere eginkizunak betetzeko behar dituen kontratu publiko eta pribatu guztiak egitea Emakunderen izenean. Horrek ez du esan nahi, hala ere, Jaurlaritzaren Kontseiluak eta Ogasun eta Herri Administrazio Sailak ekainaren 5eko 136/1996 Dekretuak eman dizkien eskumenak erabiliko ez dituztenik (136/1996 Dekretua, Euskal Autonomia Erkidegoko Administrazioaren kontratazio-araubideari buruzkoa).

   10. Emakunderen pertsonal-politika zuzentzea, eta hari atxikitako langileak izendatzea eta kargutik kentzea, bai eta langileon egoerak adieraztea ere; horrek ez du esan nahi, hala ere, Jaurlaritzaren Kontseiluak eta Ogasun eta Herri Administrazio Sailak Funtzio Publikoaren alorrean dituzten eskumenak erabiliko ez dituztenik.

   11. Bere eginkizunak ondo burutzeko, beharrezkotzat jotzen duen emakumeen eta gizonen egoerari buruzko informazio guztia eskatzea Jaurlaritzako sailei eta gainerako herri-botereei, batez ere arlo horretan egiten dituzten jarduerei buruzkoa; horretarako egokitzat jotzen dituen komunikazio-mekanismoak ezarriko ditu.

   12. Emakumeen eta Gizonen Berdintasunerako Erakunde arteko Batzordeko buru eta etxeko tratu txar eta sexu erasoen biktima diren emakumeei eskaintzen zaien laguntza hobetzeko Erakunde arteko Akordioaren Jarraipen Batzordeko buru aritzea.

   13. Zuzendaritza Kontseiluko eta Emakumeen eta Gizonen Berdintasunerako Sail arteko Batzordeko buruaren ordezkoa izatea.

   14. Euskal Autonomia Erkidegoko Administrazioak Emakumeen eta Gizonen Berdintasunerako Defentsa Erakundearekin eta Emakumeen eta gizonen berdintasunerako Legeko 24.5. artikuluan ezarritako erakundearekin izango dituen harremanetan bitartekari aritzea.

   15. Emakumeen eta gizonen berdintasunaren arloko arau-hauste arina egiten dutenei zehapenak ezartzea.

   16. Zuzendaritza Kontseiluak eskuordetzen dizkion eginkizunak eta ordenamendu juridikoaren arabera dagozkionak egikaritzea.

   17. Idazkari nagusia ez dagoenean, gaixorik dagoenean eta kargu hori bete gabe dagoenean, arau honetan hari emandako eginkizun eta eskumen guztiak burutzea, egoerak dirauen artean.

3. – Aurreko paragrafoko f), i) eta j) idatz-zatietan adierazitako egitekoen inguruan zuzendariak ematen dituen ebazpenek administrazio-bideari amaiera ematen diote.

1. – Idazkaritza Nagusiaren buru idazkari nagusia izango da; dekretu bidez izendatuko da, eta bere maila zuzendariarena izango da ondorio guztietarako.

2. – Idazkaritza Nagusia Zuzendaritzaren menpe egongo da zuzen-zuzenean, eta egiteko hauek izango ditu:

   1. Zuzendaritzak eskuordetuta, Emakunderen ordezkari aritzea Eusko Jaurlaritzako sailekiko eta beste administrazio eta erakunde publiko zein pribatuekiko harremanetan.

   2. Emakunderen zerbitzuak bultzatzea, koordinatzea eta gainbegiratzea arlo hauetan: ekonomiaren eta finantzen kudeaketa; ondarearen eta aurrekontuaren kudeaketa; plangintza, azterketak eta dokumentazioa; lege-aholkularitza eta informazioa; programazioa eta beste erakunde batzuekiko lankidetza.

   3. Ondokoak bultzatzea, koordinatzea eta gainbegiratzea: kudeaketa-prozedurak eta laguntza informatikoak, bai eta Emakunderen azpiegiturak eta baliabide materialak beharrizanetara egokitzen direla ere.

   4. Ekonomiaren eta finantzen arloko xedapenak, egintzak, kontratuak eta espedienteak izapidetzeko eta erregistratzeko barne-prozedurak prestatzea, eta gastuak baimentzeko eskumena erabiltzea, baldin eta eskumen hori legez beste organo bati ez badagokio.

   5. Emakundeko langileak administratzea eta kudeatzea, eta haiek trebatzeko eta hobetzeko planak eta programak prestatzea, arlo horretan Herri Arduralaritzaren Euskal Erakundeak dituen eskumenak eragotzi gabe.

   6. Begira-Berdintasuna Garatzeko Iragarkien Aholkularitza zuzentzea, eta batzorde horren administrazio-kudeaketaz arduratzea.

   7. Zuzendaritza Kontseiluko, Emakumeen eta Gizonen Berdintasunerako Erakunde arteko Batzordeko, Emakumeen eta Gizonen Berdintasunerako Sail arteko Batzordeko eta etxeko tratu txar eta sexu erasoen biktima diren emakumeei eskaintzen zaien laguntza hobetzeko Erakundeen arteko Akordioaren Jarraipen Batzordeko idazkari aritzea, eta horien guztien administrazio kudeaketaz arduratzea.

   8. Txostenak egitea, batez ere 2. artikuluko d) eta e) idatz-zatietan aipatuak eta emakumeen eta gizonen berdintasuna bultzatzen duten irabazi-asmorik gabeko erakundeak herri onurakotzat jotzeko prozeduretakoak.

   9. Emakumeen eta gizonen berdintasunaren arloko arau-hausteak zehatzeko espedienteak izapidetzea.

   10. Emakundeko Zuzendaritzari laguntza teknikoa eta administratiboa ematea hark eskatzen duenean, eta Zuzendaritzak berariaz eskuordetzen dizkion eginkizunak eta ordenamendu juridikoaren arabera dagozkionak burutzea.

   11. Erakundeko zuzendaria ez dagoenean, gaixorik dagoenean eta kargu hori bete gabe dagoenean, arau honetan hari emandako eginkizun eta eskumen guztiak burutzea, egoerak dirauen artean.

   12. Administrazioa aldatzeko eta eraberritzeko organo eskudunak ezartzen dituen ekimenak eta arauak garatzeko eta betetzeko behar diren oinarriak bermatzea. Helburua: erakundearen jardute-eremuan Jaurlaritzaren programako aurreikuspenak —arlo horri dagozkionak— garatzea.

   13. Herritarrei informazioa eta arreta emateko erakundeak dituen zerbitzuen funtzionamendu ezin hobea bermatzea (Jaurlaritzako Zuzenean-Herritarrei arreta emateko zerbitzuaren 2. eta 3. mailak), eta erakundearen eskumeneko gaietan solaskide eragileak egongo direla ziurtatzea.

Kudeaketa-programak garatzeko, administrazio-unitateak sortuko dira, eta unitate horiek Idazkaritza Nagusiaren menpe egongo dira zuzenean. Unitateok, bada, Funtzio Publikoaren Legea garatzeko eta betearazteko ematen diren xedapenen bitartez eta lanpostu-zerrendei buruzko dekretuen bitartez sortu eta azkenduko dira, eta eginkizunak ezarri ere xedapen eta dekretuon bitartez ezarriko zaizkie.