Arreta Soziosanitarioa

1. Dekretu honek Haur Hezkuntzako goi-mailako teknikariaren tituluari dagozkion Lanbide Heziketako irakaskuntzetarako curriculuma ezartzen du Euskal Autonomia Erkidegorako.

2. Ikastetxeak duen autonomia pedagogikoaren eta antolamendukoaren ildotik, hari dagokio bere Ikastetxearen Ikasketa Proiektua ezartzea, eta proiektu horretan ezarriko ditu bere irakaskuntza-lanaren ezaugarriak eta nortasuna zehazteko, eta lanbide-moduluen programazioak prestatzeari buruzko irizpideak finkatzeko beharrezko erabakiak.

3. Ikastetxearen Ikasketa Proiektuaren esparruan, heziketa-zikloaren ardura duen irakasle-taldeari eta, zehazki, irakasle bakoitzari dagokio programazioak prestatzea. Horretarako, ezartzen diren helburu orokorrak kontuan izan beharko ditu, lanbide-modulu bakoitzean bildutako ikaskuntzaren emaitzak eta edukiak errespetatu beharko ditu, eta (oso garrantzitsua) irakaskuntzen erreferentziazko lanbide-profila hartu beharko du euskarri.

Heziketa-zikloaren irakaskuntzetan honako alderdi hauek sartzen dira:

1. Heziketa-zikloaren helburu orokorrak:

   1. Programazioaren elementuak identifikatu eta zehaztea, eta horiek taldearen eta testuinguruaren ezaugarriekin lotzea, haurrei zuzendutako hezkuntzako esku-hartzea eta arreta soziala programatzearren.

   2. Baliabide didaktikoak identifikatu eta hautatzea, eta horien ezaugarriak eta aplikazioak deskribatzea, jardueraren eta hartzaileen arabera horiek antolatzearren.

   3. Baliabide eta estrategia metodologikoak hautatu eta aplikatzea, eta, dagokion testuinguruan, haiek haurren ezaugarriekin lotzea, jarduera programatuak egitearren.

   4. Komunikatzeko eta parte hartzeko dinamikak hautatu eta aplikatzea, testuinguruaren aldagaiak aztertuta eta familiekin esku hartzeko ezarritako prozedurari jarraituz.

   5. Beste profesional edo zerbitzu batzuen parte-hartzea eskatzen duten haurren eta familien beharrak identifikatzea, eta diagnostikorako eta jardunerako baliabideak zehaztea, horrela, erantzun egokia ematearren.

   6. Ebaluazioko teknikak eta tresnak hautatu eta aplikatzea, horiek aldagai garrantzitsuekin lotzea eta emaitzak esku hartzeko prozesuan ezarritako estandarrarekin alderatzea.

   7. Informazioa emateko estrategiak hautatu eta aplikatzea, eta irakatsi beharreko edukiekin, horien xedearekin eta hartzaileekin lotzea, zerbitzuaren kalitatea hobetzearren.

   8. Bizitza osoan ikasteko baliabideak eta estrategiak antzematea, eta horiek dagokion lanbide-konpetentziaren alderdiekin lotzea, ezagupen zientifikoak eta teknikoak eguneratuta mantentzearren.

   9. Erakundearen helburuetan egiten duen ekarpena identifikatu eta ebaluatzea, eta bere lanbide-jarduera helburu horiek lortzeari dagokionez baloratzea.

   10. Talde-lanaren ezaugarriak identifikatzea eta horien garrantzia baloratzea, hezkuntza-jarduna hobetzearren, eta esku-hartze planifikatua, koherentea eta partekatua lortzearren.

   11. Talde-dinamikak eta lan-taldean komunikatzeko teknikak aplikatzea, eta informazioa eta esperientziak trukatzea, proiektuan koherentzia erraztearren.

   12. Esku hartzeko espazioak eta materialak aztertzea, eta arriskuen prebentzioaren eta segurtasunaren arloan indarrean dagoen legeriari dagokionez egunean jartzea, haurren osasuna eta segurtasuna zaintzearren.

   13. Ikasi eta enplegatzeko aukerak identifikatu eta baloratzea, lan-merkatuko eskaintzak eta eskaerak aztertuta, enplegatzeko aukerak hobetzearren.

   14. Gizarteko agente aktibo gisa dituen eskubideak eta betebeharrak onartzea, herritartasun demokratikoan jardutearren.

   15. Lehen laguntzetako teknikak aplikatzea, lan-jardueran larrialdietako eta osasunerako arriskuko egoerei erantzuteko ezarritako protokoloak erabilita.

2. Honakoa da heziketa-zikloa osatzen duten lanbide-moduluen zerrenda:

   1. Haur-hezkuntzaren didaktika.

   2. Haurraren autonomia pertsonala eta osasuna.

   3. Haur-jolasa eta bere metodologia.

   4. Adierazpena eta komunikazioa.

   5. Garapen kognitiboa eta motorra.

   6. Garapen sozioafektiboa.

   7. Gizarte-trebetasunak.

   8. Familiekin lankidetzan aritzea eta arrisku sozialean dauden adingabeei arreta eskaintzea.

   9. Haurrei arreta eskaintzeko proiektua.

   10. Lehen laguntzak.

   11. Ingeles teknikoa.

   12. Laneko prestakuntza eta orientabidea.

   13. Enpresa eta ekimen sortzailea.

   14. Lantokiko prestakuntza.

       1. eranskinean zehaztu da lanbide-moduluen ordu-esleipena eta lanbide-moduluak zein kurtsotan eman beharko diren.

          Hezkuntza, Unibertsitate eta Ikerketa Sailak arautu ditzakeen heziketa-eskaintzen arabera egokitu ahal izango da moduluen ordu-esleipena eta moduluak zein kurtsotan emango diren, dekretu honen 11. artikuluan xedatutakoarekin bat eginik.

3. Lanbide-modulu bakoitzerako, ikaskuntzaren emaitzak (prestakuntzaldia amaitzean ikasleak jakin, ulertu eta egin dezan espero dena deskribatzen dutenak), eta ebaluazio-irizpideak eta eman beharreko edukiak ezartzen dira. II. eranskinean ezartzen da hori guztia.

4. Lantokiko prestakuntzako modulua bigarren kurtsoko azken 13 asteetan garatuko da, eta ikastetxean egindako lanbide-modulu guztien ebaluazio positiboa lortu ondoren egingo da. Nolanahi ere, komenigarritzat joz gero, bi fasetan garatu ahal izango da. Lehen faseak 4 asteko iraupena izango du eta bigarren kurtsoaren hasieran landuko da. Bigarren fasea bigarren kurtsoko azken 9 asteetan garatuko da, eta ikastetxean egindako lanbide-modulu guztien ebaluazio positiboa lortu ondoren egingo da.

5. Europako Batzordeak ezarritako oinarrizko konpetentziak garatzeko eta sakontzeko gomendioei jarraituz eta lehentasuneko arloekin lotzen den prestakuntzaren garapenaren indarrez, curriculumean Ingeles teknikoa modulua txertatuta landuko da heziketa-ziklo horretan atzerriko hizkuntza, betiere Kualifikazioei eta Lanbide Heziketari buruzko ekainaren 19ko 5/2002 Lege Organikoaren hirugarren xedapen gehigarrian ezarritakoaren arabera.

Prestakuntza garatzeko, eta ezarritako emaitzak eta konpetentziak lortzeko gutxieneko espazioak eta ekipamenduak III. eranskinean zehazten dira.

1. Heziketa-zikloko modulu bakoitzerako irakasleen espezialitateak eta irakasteko eskumena IV. eranskinaren 1. atalean ezartzen dira.

2. Irakaskuntza-kidegoetako irakasleei oro har eskatzen zaizkien titulazioak otsailaren 23ko 276/2007 Errege Dekretuaren 13. artikuluan ezartzen dira. Irakasleen espezialitateetarako 1. atalean adierazten diren titulazio baliokideak (irakaskuntzaren ondorioetarako) IV. eranskinaren 2. atalean jasotzen dira.

3. Hezkuntzakoaz bestelako administrazioetan barne hartuta dauden titulartasun pribatuko nahiz titulartasun publikoko ikastetxeetako irakasleentzat, titulua osatzen duten lanbide-moduluak emateko beharrezko titulazioak eta beste edozein eskakizun IV. eranskinaren 3. atalean zehazten dira.

Heziketa-ziklo honetan sartzeko lehentasuna izango dute Giza eta Gizarte Zientzien Batxilergoko modalitatea egin duten ikasleek.

Haur Hezkuntzako goi-mailako teknikariaren titulua edukitzeak:

1. Goi-mailako edozein heziketa-ziklotara zuzenean sartzeko aukera ematen du, betiere ezartzen diren sarbide-baldintzetan.

2. Graduko unibertsitate-tituluetara bideratzen duten irakaskuntzetara zuzenean sartzeko aukera ematen du, betiere ezartzen diren onarpen-baldintzetan.

3. Hezkuntza, Unibertsitate eta Ikerketa Sailak zehaztuko du Haur Hezkuntzako goi-mailako teknikariaren titulua dutenen eta horiekin lotzen diren graduko unibertsitate-titulua dutenen arteko baliozkotze-erregimena. Baliozkotzeko erregimena errazteko, 120 ECTS kreditu esleitu dira dekretu honetan ezarritako irakaskuntzetan, heziketa-ziklo honetako lanbide-moduluen artean.

1. Zenbait heziketa-ziklok komunak dituzten lanbide-moduluak baliozkotu egingo dira, baldin eta izen berekoak, eduki berekoak, ikaskuntzaren emaitza gisa adierazitako helburu berekoak, ebaluazio-irizpide berekoak eta antzeko iraupenekoak badira. Nolanahi ere, maiatzaren 3ko 2/2006 Lege Organikoaren babesean Laneko prestakuntza eta orientabidea modulua edo Enpresa eta ekimen sortzailea modulua gaindituta dituenak modulu horiek baliozkotuta izango ditu lege horren babespeko beste edozein ziklotan.

2. Urriaren 3ko 1/1990 Lege Organikoaren babesean ezarritako lanbide-moduluen eta maiatzaren 3ko 2/2006 Lege Organikoaren babesean ezarritakoen arteko baliozkotzeak V. eranskinean adierazten dira.

3. Otsailaren 26ko 32/2008 Dekretuaren 27. artikuluan ezarritakoaren arabera, «Lantokiko prestakuntza» lanbide-modulua osorik edo zati batean salbuestea erabaki ahal izango da, baldin eta heziketa-ziklo honekin lotutako lan-esperientzia egiaztatzen bada, artikulu horretan jasotako baldintzen arabera.

4. «Laneko prestakuntza eta orientabidea» modulua baliozkotu ahal izateko, abenduaren 15eko 1538/2006 Errege Dekretuaren 45.3 artikuluan ezarritako eskakizunak betetzeaz gain, gutxienez urtebeteko lan-esperientzia egiaztatu eta laneko arriskuen prebentzioko oinarrizko mailako teknikari-ziurtagiria izan beharko da. Ziurtagiriak prebentzio-zerbitzuen araudia onartzen duen urtarrilaren 17ko 39/1997 Errege Dekretuan xedatutakoaren arabera luzatua izan behar du.

5. Enpresa eta ekimen sortzailea modulua baliozkotu ahal izateko, abenduaren 15eko 1538/2006 Errege Dekretuaren 45.3 artikuluan ezarritako eskakizunak betetzeaz gain, gutxienez 3 urteko lan-esperientzia egiaztatu beharko da.

6. Titulu honen profilarekin lotzen diren konpetentzia-atal guztiak Aintzatespen eta Ebaluazio Sistemaren bidez egiaztatu dituztenek Ingeles teknikoko modulua baliozkotzea eskatu ahal izango dute, baldin eta proiektuko lanbide-modulua gainditzen badute. Edonola ere, gutxienez 3 urteko lan-esperientzia egiaztatu beharko dute, abenduaren 15eko 1538/2006 Errege Dekretuaren 45.3. artikuluan xedatutakoaren indarrez.

7. Ekainaren 19ko 5/2002 Lege Organikoaren 8. artikuluan ezarritakoaren arabera egiaztatzen diren konpetentzia-atalen eta moduluen arteko egokitasuna (horiek baliozkotzeko), eta titulu honetako lanbide-moduluen eta konpetentzia-atalen arteko egokitasuna (horiek egiaztatzeko) VI. eranskinean jasotzen dira.

Hezkuntza, Unibertsitate eta Ikerketa Sailak ziklo honetako irakaskuntzak araubide orokorrean ezarritakoaz bestelako eskaintza osoaren modalitatean eta urrutiko irakaskuntzan edo beste modalitate batzuetan eskaini ahal izateko baimena eta eskaintza horren oinarrizko alderdiak (hala nola, moduluen iraupena eta sekuentziazioa) arautuko ditu, hala badagokio.