Tuterako merindadea
Nafarroako hegoaldeko merindadea. Mugak: iparraldean, Erriberri eta Zangozako merindadeak; ekialdean eta hegoaldean, Zaragozako herrialdea eta mendebalean, Errioxa. 1.530 km2 (Errege Bardeak barne) eta 80.833 biztanle (1991, 52,8 biztanle km2-ko). 23 udalerrik osatua da Tuterako merindadea. Ebro, Aragoi, Keiles eta Alhama ibaiak eta Tauste, Inperial, Lodosa eta Bardeetako ubideak dira merindadeko ur-laster nagusiak. Nekazaritza (garia, garagarra, mahatsa, olibondoak, esparragoak) da ekonomia jarduera nagusia. Tutera da merindadeko administraziogunea, industriagunea eta zerbitzugunea.
