Euskararen tresnak

Lur hiztegi entziklopedikoa

Kultura eta Hizkuntza Politika Saila

Sarraute, Nathalie

(Natalia Ilyanova Txerniak jaiotza izenaz). Frantses idazlea, jatorriz errusiarra (Ivanovo, Errusia, 1902 - 1999). Nouveau roman («eleberri berria») literatura mugimenduaren teorilari eta bultzatzaile nagusietako bat izan zen. Bi urte zituela amarekin joan zen Geneva aldera eta handik Parisa; frantsesa izan zuen beti lehen hizkuntza. Oxford-ko eta Parisko unibertsitateetan egin zituen zuzenbide ikasketak eta abokatu gisa lan egin zuen 1941. urtea arte. 1938an Tropismes, kontakizun txikien bilduma, idatzi zuen. 1949an Portrait d’un inconnu (Ezezagun baten erretratua) kontakizuna idatzi zuen, Jean-Paul Sartrek “anti-nobelatzat” jo zuena. 1956an kritika zorrotzak egin zizkion nobela tradizionalari L’Ère du soupçon (Susmoaren garaia) teoria lanean, eta handik aurrera nouveau roman higikundearen ingurukoekin elkartu bazuten ere (bat zetozen pertsonaia tradizionalaren kritikan), berak ez zuen eskema itxi batean sar zezaten onartu. Ondorengo lanetan forma tradizionalagoetara jo zuen: Le Planétarium (1959, Planetarioa), Les fruits d’or (1963, Urrezko fruituak), Entre la vie eta la mort (1968, Biziaren eta heriotzaren artean), C’est beau antzerkia (1973, Ederra da), «…disent les imbéciles» (1976, «…ergelek diote») L’Usage de la parole (1980, Hitzaren erabilera) eta Enfance (1982, Haurtzaroa) autobiografia.