Morga
Bizkaiko erdialdeko udalerria (Mungialdea). Garaiera, 248 m. 15,23 km2. 1997ko datuen arabera, 380 biztanle, ia denak euskaldunak (morgarrak). Mugak: iparraldean, Fruiz, Arrieta eta Errigoiti; ekialdean, Errigoiti eta Muxika; mendebalean, Fruiz, Gamiz-Fika eta Larrabetzu eta hegoaldean, Larrabetzu eta Zornotza. Auzo nagusiak: Andra-Mari, Eskerika, Meaka, Meakaur (herriburua), Morgakoena, Morgaondo, Olea eta Oñarte. Butroi ibaiaren adarrak igarotzen dira Morgako udalerritik. Euskara, bizkaiera; euskaldunak, % 98. Ekonomia jarduera nagusiak laborantza (artoa, patata, bazkarako landareak) eta abere hazkuntza (behi, ardi eta zerri azienda) dira. Aipagarri dira San Martin eliza, Zorrotza eta Isasitarren jauregiak, San Joan Bataiatzailearen ermita eta San Esteban Gerekizko ermita.
