Irulegi
Nafarroa Behereko hego-mendebaleko udalerria, Baigorriko kantonamenduan (Baigorri-Ortzaize). Mugak: iparraldean Arrosa, ekialdean Azkarate, mendebalean Baigorri eta hegoaldean, Anhauze. Garaiera 204 m. 9,39 km2. 1999ko datuen arabera, 300 biztanle (irulegitarrak). Irouléguy du izen ofiziala. Auzo nagusiak: Irulegi, Moussourils eta Sorhoeta. Euskara, behe-nafarrera; euskaldunak, % 95. Laborantza (mahastiak, garia, patata, barazkiak, bazkarako landareak) eta abere hazkuntza (behi, ardi eta zerri azienda) dira bertako ekonomia jarduera nagusiak. Oso ospetsua da Irulegiko arnoa. Izen honetara biltzen dira Nafarroa Behereko bederatzi herrietako (Irulegi, Baigorri, Anhauze, Azkarate, Izpura, Jatsu, Orzaize, Bidarrai eta Arrosa) mahastietatik eginiko lehen mailako ardoa. Aipagarriak dira Irulegiko hilerria (monasterio beneditar zaharra) eta bertako hilarriak.
