Arreta Soziosanitarioa

1 artikulua, norberaren beharretarako baimenari buruz diharduena, honela idatzita geratuko da:

Urtean zehar, norberaren beharretarako gehienez bederatzi baimen-egun hartzeko eskubidea izango da (justifikatu gabe), baita norberak hartzeko bi egun ere, zortzigarren hirurtekoa betetakoan, hirurteko bakoitzeko. Baimenak behar adinako aurretiaz eskatu beharko dira, betiere zerbitzuaren beharrak errespetatuta, eta Bulego Judizialeko arduradunaren, fiskalburuaren edo Auzitegiko Medikuntzako Euskal Erakundearen zuzendariaren edo zuzendariordearen aldeko txostena lortu ondoren. Honako irizpide hauei jarraituko zaie:

• Egun horiek ezin izango dira, inola ere, urteko opor ordainduekin metatu.

• Debeku horri jarraiki, oporraldia amaitzen denetik baimen hau hartu arte egutegiko egun bat beharko da gutxienez.

• Langileak bere beharretarako eskubidez hartu ahal izango dituen baimen-egunen urteko kopurua urtearen barruan egiaz lan egindako egunen proportziozkoa izango da.

  Egun osagarri horiek baliatzeko eskubidea adierazitako hirurtekoak bete eta hurrengo urte naturaletik aurrera gauzatuko da.

  Seme edo alaba baten jaiotzagatiko, harreragatiko edo adopzioagatiko baimenari buruz diharduen 1.2 artikulua honela idatzita geratuko da:

  Seme edo alaba baten jaiotzagatik, harreragatik edo adopzioagatik, ezkontideak edo izatezko bikoteak egutegiko segidako hamabost eguneko baimena hartzeko eskubidea izango du; nolanahi ere, egun horiek haurra jaiotzen denetik aurrera edo erabaki administratiboaren edo judizialaren ondoren baliatuko dira.

  Erditze anizkoitzaren kasuan, zirkunstantzia hori ez da arrazoi izango iraupen handiagoko baimen bat emateko.

  Erditzeagatiko eta hamar hilabetetik beherako seme edo alaba baten adopzio edo harreragatiko baimena (1.8 puntuan bilduta dago) honela idatzita geratuko da:

  1. – Erditzearen kasuan, baimenaren iraupena hamazazpi astekoa izango da, etenik gabe hartu beharrekoak. Erditze anizkoitzen kasuan, bigarrenetik aurrerako seme edo alaba bakoitzeko beste bi astetan zabaldu ahal izango da. Baimena funtzionarioak nahi bezala banatuko da (erditzearen aurretik zein ondoren), betiere erditu eta hurrengo sei asteak ezinbestekoak direla kontuan hartuta. Ama hiltzen bada, beste gurasoak baimen osoa hartu ahal izango du, edo, hala dagokionean, baimena bukatzeko geratzen den denbora.

     Aurrekoa gorabehera, erditze-ondoko sei asteko atsedenaldia (nahitaezkoa amarentzat) bazter utzi gabe, bi gurasoek lan egiten badute, amatasunagatiko atsedenaldia hasitakoan, amak aukeratu ahal izango du beste gurasoak baliatzea erditzearen ondorengo atsedenaldiaren zati jakin eta etengabe bat, bai berarekin batera, edo berea amaitutakoan.

     Baliatze partekatuaren kasuan, beste gurasoak laga zaion segidako amatasunagatiko baimenaren zatia baliatu ahal izango du, nahiz eta ama Aldi baterako Ezintasuneko egoeran egon.

     Atsedenaldiak aldi berean hartzen diren kasuetan, aldi horien baturak ez ditu aurreko idatz-zatietan aurreikusitako hamazazpi asteak edo erditze anizkoitzaren kasuan dagozkienak, gaindituko.

     Jaioberriak erditzearen ondoren edo jaio eta 30 eguneko gehieneko epean ospitaleratuta egon behar badu, amatasunagatiko lizentzia jaioberriaren ospitaleratzeak irauten duen denboran luzatuko da, 13 aste gehienez.

     Baimenaren aldi osoa agortu ondoren emakume langilea lanera normal itzultzea eragozten dion osasun-egoeran badago, gaixotasunagatiko baja-egoeran geratuko da, baina horretarako behar diren izapideak bete beharko ditu.

  2. – Sei urte arteko adingabeak adoptatzearen edo etxean hartzearen (adoptatu aurrekoa edo betikoa) kasuetan, baimenak segidako hamazazpi asteko iraupena izango du, eta adopzio edo etxean hartze anizkoitzaren kasuan, bigarrenetik aurrerako seme edo alaba bakoitzeko bi aste gehiago luzatu ahal izango da. Egun horiek nola zenbatu langileak aukeratuko du, bai etxean hartzeko erabaki administratiboaren edo judizialaren ondoren, bai adopzioa gauzatzen duen ebazpen judizialaren ondoren. Halaber, baimenaren iraupena hamazazpi astekoa izango da sei urtetik gorako adingabeen adopzioaren edo harreraren kasuetan, betiere adingabe horiek ezinduak edo minusbaliatuak badira, edota beren zirkunstantzia eta esperientzia pertsonalen ondorioz, edo atzerritarrak izateagatik, gizarteratzeko eta familian txertatzeko zailtasun bereziak –gizarte-zerbitzu eskudunek behar bezala egiaztatuak– badituzte. Bi gurasoek lan egiten badute, baimena egoera horretan daudenek aukeratzen duten bezala banatuko da. Biek aldi berean hartu ahal izango dute baimena, edo batak bestearen ondoren, betiere etenik gabeko denboraldietan.

     Atsedenaldiak aldi berean hartzen diren kasuetan, aldi horien baturak ez ditu aurreko idatz-zatietan aurreikusitako hamazazpi asteak, edo adopzio edo harrera anizkoitzaren kasuan dagozkienak, gaindituko.

     Nazioarteko adopzioaren kasuan, enplegatu publikoek adingabe adoptatuaren jatorrizko herrialdera joan behar badute, bi hilabeteko baimena emango zaie. Denbora horretan, langileek oinarrizko lansariak jasoko dituzte.

  3. – Erditze, adopzio edo harreragatiko baimenak lanaldi osokoak edo lanaldi partzialekoak izango dira (funtzionarioen aukeran), betiere zerbitzuaren beharrek aukera ematen badute, lana eta familia bateragarri egiteko neurriei buruzko urtarrilaren 30eko 180/2004 Errege Dekretuan xedatu bezala.

  4. – Amatasunagatiko baimena bi astez luzatuko da adoptatutako edo harreran hartutako seme edo alaba nahiz adingabe urrituaren kasuan. Baimen hori ere partekatu ahal izango da, bai eta lanaldi osoan edo partzialean hartu ere.

  5. – Halaber, funtzionarioak lanean ordubeteko etenaldia egiteko eskubidea izango du, baldin eta hamar hilabete baino gutxiagoko seme edo alaba bat modu naturalean edo artifizialean edoski behar badu; etenaldi hori bi zatitan banatu ahal izango du. Emakumeak, bere borondatez eta helburu berarekin, lanaldi arruntaren murrizketa batekin ordezkatu ahal izango du eskubide hori (ordu-erdi hartu ahal izango du lanaldiaren hasieran eta amaieran, edota ordubete lanaldiaren hasieran edo amaieran). Biberoia eman behar izanez gero, lanaldia eten edo murrizteko eskubidea beste gurasoari ere eman dakioke, honek eskatu eta honako puntu hauek frogatu ondoren: ama langilea dela eta baimena hartzeari uko egiten diola edo hartu ezin duela.

     Funtzionarioak aurreko paragrafoan azaldutako lizentzia baliatu ahal izango du edo, bestela, denbora hori haurdunaldi eta erditzeagatiko lizentziari gehitzeko aukera izango du. Kontuan hartu behar da lan egin daitekeen egunetako orduak soilik zenbatu daitezkeela ondorio horietarako. Hori dela-eta, funtzionarioak eskaera egiten duenean, hamargarren hilabetea bete arte geratzen den denbora-tartean lizentziak, baimenak, oporrak edo eszedentziak eskatuko dituen jakinarazi beharko du, aldi horiek zenbaketatik salbuesteko.

  6. – Edoskitze naturalak irauten duen bitartean arriskua izatea.

     Edoskitze naturalak irauten duen bitartean arriskurik badago emango da baimena, Gizarte Segurantzako Institutu Nazionalak prestazio ekonomikoa ematen duelako.

     2 artikulua, prestakuntza- eta hobekuntza-ikastaroak egiteko Lizentziari buruzkoa, honela idatzita geratuko da:

     Honako kasu hauetan eman ahal izango dira prestakuntzarako eta hobekuntzarako lizentziak:

     • Eusko Jaurlaritzaren Justizia Sailak antolatuta urtero egiten diren prestakuntza-planen barnean hartutako prestakuntza-ikastaroetara joateko. Lizentziaren iraupena eta modua egin beharreko ikastaroek duten iraupenaren eta programazioaren araberakoak izango dira, eta ez dute inolako mugarik eragingo lansariei dagokienez.

       Auzitegiko Medikuen Kidegoko partaide diren funtzionarioek jasotzen duten prestakuntza espezializatua dela-eta, ulertuko da idatz-zati honen barruan sartuta geratzen direla Justizia Administrazioko Azterlan Juridikoen Zentroak edo beste erakunde publiko edo pribatu batzuek ematen dituzten prestakuntza edo hitzaldiak, betetzen den lanpostuko zereginekin zuzeneko zerikusia dutenak, betiere Giza Baliabideetako Zuzendaritzak onartzen baditu.

     • Kongresu, mintegi, sinposio, lehiaketa, saio, mahai-inguru, konferentzia, bilera, jardunaldi eta bestelako bilera kolektiboetara (zientifikoak, teknikoak edo profesionalak) joateko, betiere funtzionarioa partaide den kidegoko berezko eginkizunekin zerikusia badute eta eginkizun horiek gauzatzeko prestakuntza osatzea badute helburu. Lizentzia hori emateko, zerbitzuaren beharrak eta aurrekontu-baliabideak hartuko dira kontuan; iraupena, berriz, adierazitako ikastaro, kongresu edo jardunaldi horien araberakoa izango da. Lizentzia horiek oinarrizko lansariak eta kargurako seme edo alaba bakoitzeko prestazioak jasotzeko eskubidea emango dute.

       Indarraldia.– Ebazpen hau Euskal Herriko Agintaritzaren Aldizkarian argitaratzen den egunaren biharamunean jarriko da indarrean.

       Vitoria-Gasteiz, 2007ko urriaren 15a.

       Giza Baliabideen zuzendaria,

       MAIDER ZUBIRI GORROTXATEGI.