Arreta Soziosanitarioa

Agindu honen xedea Bikain-Euskararen Kalitate Ziurtagiriaren ebaluazio-prozesua arautzea da eta Bikain-Euskararen Kalitate Ziurtagiria 2009an eskuratzeko kanpo-ebaluazioaren zerbitzua eskatu nahi duten erakundeei dei egitea izena eman dezaten.

1. Bikain-Euskararen Kalitate Ziurtagiria eskuratzeko kanpo-ebaluazioaren zerbitzu hau eskatu ahal izango dute entitate publiko eta pribatuek, negozio-unitateek eta entitate handietako lan-zentroek, baldin eta beren jarduera Euskal Autonomia Erkidegoan egiten badute.

2. Aurtengo ekitaldian 35 izango dira, gehienez ere, Bikain kanpo-ebaluazioaren zerbitzuaz baliatu ahal izango diren erakundeak.

1. Beharrezko lege-nortasunez horniturik egon eta, aldi berean, dagokion erroldan izena emanak izatea. Kanpo-ebaluazioaren eskaera, negozio-unitate edota lan-zentro jakin bat ebaluatzeko denean lege-ordezkariak horixe zehaztu egin beharko du eskabidean, 2. eranskinean hain zuzen ere.

2. Ebaluazio-prozesu honetara ezin izango dira aurkeztu: diru-laguntzak edo laguntza publikoak eskuratzea galarazten duen debekuren baten edo administrazio-zehapen edota zehapen penalen baten menpe dauden eskatzaileak, ez eta Emakumeen eta Gizonen Berdintasunerako Legea dela bide debeku horrekin zigortuak ere, beti ere zehapenean finkatutako epe-barrutian.

3. Egunean izan beharko dute zerga-ordainketa.

Honako ebaluazio-prozesu honen kudeaketa Hizkuntza Politikarako Sailburuordetzaren Koordinaziorako Zuzendaritzari dagokio.

1. Eskatzaileek agindu honi lotutako eskaera-orria bete beharko dute, legezko ordezkariak sinatuta eta enpresaren zigiluarekin (1.A eranskina).

2. Aurrekoaz gain, honako agiri hauek ere aurkeztu beharko ditu:

   1. Entitateari buruzko dokumentazioa:

      1) Administrazio honetako Erregistroan dauden fundazioak edo elkarteak badira, Erregistroko ziurtagiri eguneratua. Gainerako kasuetan, dagokion Erregistro Publikoan inskribatua dagoela egiaztatzen duen ziurtagiria. Ziurtagiriaren eguneraketak eskabidea egiten den urtekoa izan behar du. Erregistratzera beharturik ez dauden entitateen kasuan, sortzeko behar izan dituzten dokumentuak aurkeztu beharko dituzte.

      2) Entitate pribatuaren legezko ordezkariari dagokionez, bere NANaren fotokopia eta lege-ahalmena duela egiaztatzen duen ziurtagiria.

      3) IFZren fotokopia.

      4) Dagozkion zerga-ordainketetan egunean daudelako ziurtagiri originala edo kopia konpultsatua, lekuan lekuko Foru Aldundiak edo Ogasun Publikoak sinatua, eta gehienez eskabidea aurkeztu baino hiru hilabete lehenagokoa.

   2. Artikulu honetako a.1), a.2) eta a.3)agirien ordez, 1.B eranskina (Dokumentazioaren ordezko aitorpena) aurkeztu ahal izango da, baldin eta agiriok administrazio honetan aurkeztu izan badira, indarrean jarraitzen badute eta aurkeztu zirenetik bost urte igaro ez badira.

   3. Ebaluazio-guneari (edota negozio-unitateari nahiz lan-zentroari) eta harremanetarako izendatzen den solaskideari buruzko datuak (2. eranskina).

   4. Euskararen presentzia, erabilera eta kudeaketari dagokionez, garapen-mailari buruzko informazioa (3. eranskina).

   5. Beharrezkotzat jotzen denetan, Koordinaziorako Zuzendaritzak entitate eskatzaileari behar beste informazio eta dokumentazio eskatu ahal izango dio, aurkeztutako eskaria egoki baloratzeko. Halaber, Koordinaziorako Zuzendaritzak eskumena izango du informazio osagarria eskuratzeko erakundeak euskara-planak egiteko dirulaguntzak jasotzearren Koordinaziorako Zuzendaritzari aurkeztutako euskara-plan eta gainerako agiri osagarrietatik.

Agindua argitaratzen den egunetik biharamunetik hasita, 20 egun naturaleko epean aurkeztu ahal izango dira eskabideak.

1. Eskabide-orriak entitate eskatzailearen legezko ordezkariak sinatuta egon beharko du.

2. Eskabide-orria eta agiriak, Hizkuntza Politikarako sailburuordeari zuzenduko zaizkionak, azaroaren 26ko 30/1992 Legeak, Herri Administrazioen Araubide Juridikoaren eta Administrazio Prozedura Erkideari buruzkoak, bere 38.4. artikuluan aurre ikusitako tokietakoren batean aurkeztuko da.

   1. Aurrez aurre egin nahi izanez gero, honako toki hauetakoren batean aurkeztuko dira:

      Eusko Jaurlaritza, Kultura Saila, Hizkuntza Politikarako Sailburuordetza, Donostia-San Sebastián kalea 1, 01010 Vitoria-Gasteiz.

      Eusko Jaurlaritza, Bizkaiko Kulturako Lurralde Unitatea, Gran Vía 85, 48011 Bilbao.

      Eusko Jaurlaritza, Gipuzkoako Kulturako Lurralde Unitatea, Andia kalea 13, 20008 Donostia-San Sebastián.

      72/2008 Dekretuak, apirilaren 29koak, Euskal Autonomia Erkidegoko Administrazio Orokorrean eta bere erakunde autonomiadunen erregistroen sorrera, antolaketa eta funtzionamenduari buruzkoak, zehaztutako edozeinetan (EHAA, 2008ko maiatzaren 30ekoa, 102. zk.).

   2. Postaz egin nahi izanez gero, honako helbide honetara bidali beharko dira eskabide-orria eta agiriak: Eusko Jaurlaritza, Kultura Saila, Hizkuntza Politikarako Sailburuordetza, Koordinaziorako Zuzendaritza (Bikain Deialdia), Donostia-San Sebastián kalea 1, 01010 Vitoria-Gasteiz. Horrela egitekotan, eskabide-orria kartazal irekian aurkeztu beharko da posta-bulegoan, posta-funtzionarioak, ziurtapena egin aurretik, data eta zigilua jar diezazkion eskabide-orriari berari(1.A. eranskina).

3. Konpultsak tokian tokiko Kulturako Lurralde Unitatean edo Kultura Sailaren egoitza nagusian egingo dira.

Entitate eskatzaileak aurkeztutako eskabide-orrian zein agirietan hutsik edo akatsik antzemango balitz, organo kudeatzaileak hamar egun emango dio entitate eskatzaileari hutsa zuzendu edota gabezia osa dezan. Epe hori igaro eta egin beharrekoak egin eta aurkeztu ez badira, eskatzaileak eskaeran atzera egin duela ulertuko da. Hori dela-eta, dagokion ebazpena hartuko da.

1. Eskabideak baloratzerakoan 100 puntu lortu ahal izango dira gehienez ere. Aplikatuko diren irizpideak honako hauek dira:

   1. Euskararen presentzia, erabilera eta kudeaketari dagokionez, garapen-maila ohargarria duten erakundeak izatea. Garapen-maila ohargarri gisa ulertu behar da Bikain egiaztagirietako edozein eskuratzeko moduko egoeran egotea (30 puntu gehienez ere).

   2. Bere jarduera ekonomikoa tarteko, hedadura zabala, eragin soziala edota eragin biderkatzaile adierazgarria duten erakundeak izatea, Bikain programari dagokionez (25 puntu gehienez ere).

   3. Esparru sozio-ekonomikoan hizkuntza normalkuntzan ibilbide aitortua duten erakundeak izatea, eta azken 3 urteotan erabilera areagotzeko euskara-planak edota neurriak abian dituztelako, eta horien ebaluazioa nahiz hobekuntza-plana egin izan delako EMEren arabera (25 puntu gehienez ere).

   4. Enpresaren tamaina, langileen kopurua (10 puntu gehienez ere).

   5. Erakunde eskatzailearen izenean, Bikain Ebaluatzaile Klubeko kide izateko prestakuntza berezitua jaso duten pertsonen kopurua eta kanpo ebaluazioak eginak dituzten pertsonen kopurua (10 puntu gehienez ere). Irizpide hau urterik urte sendotzen joan ahala, izena eman ahal izateko baldintza bihurtuko da, hau da, ebaluatua izango den erakundeko kideren batek gutxienez, lehendik beste erakunderen bat ebaluatzen ibilia beharko du izan.

2. Kontuan izanik Bikain-Euskararen Kalitatearen Ziurtagiriaren helbururik behinena EAEko esparru sozio-ekonomikoan euskararen erabilera areagotzeko ekimen dinamiko bat sortzea dela, eta horretarako lurralde historikoen oreka geografikoa edota jarduera ekonomikoen arteko oreka zaintzea komenigarria dela, hala balegokio eta lurralde historiko nahiz erakunde-mota guztiak ez daudela behar bezala ordezkatuta ikusiko balitz, honako bi irizpideok aplikatu ahal izango dira:

   1. Aurreko irizpideak aplikatu ostean, 50 puntu gutxienez lortuak izaki baina hala ere ebaluatuak izateko multzotik at geratzen diren erakundeen artean, mentsik handiena duen EAEko lurralde historikoko erakundeak lehenetsi ahal izango dira, gehienez ere aukeratutakoen multzo osoaren % 10 izan arte.

   2. Aurreko irizpideak aplikatu ostean, 50 puntu gutxienez lortuak izaki baina hala ere ebaluatuak izateko multzotik at geratzen diren erakundeen artean, mentsik handiena duen jarduera ekonomikoko erakundeak lehenetsi ahal izango dira, gehienez ere aukeratutakoen multzo osoaren % 10 izan arte.

1. Aurten kanpo-ebaluazioaren zerbitzua jasoko duten enpresak aukeratzeko, balorazio-batzorde bat eratuko da, Koordinaziorako zuzendariak, Euskara Sustatzeko zuzendariak (edota hark izendatutakoak) eta Koordinaziorako Zuzendaritzako teknikari batek osatua. Batzorde horren eraketan aintzat hartuko dira Emakumeen eta Gizonen Berdintasunerako 4/2005 Legean aurreikusitakoak.

2. Irizpide horiek aplikatu ostean, Koordinaziorako zuzendariaren ebazpen bidez, eskatzaileetako bakoitzari 2009ko kanpo-ebaluazioaren prozesuan parte hartzeko aukeratua izan ote den edo ez jakinaraziko zaio. Izena emateko epea itxi eta handik hilabeterako epean ebazpenik jasoko ez balitz, administrazio-isiltasunak eskaeraren ukapena adierazten duela ulertuko da.

Entitate onuradunak ebaluazio-prozesua jasoko duela onartu egin behar du. Ondorioz, jakinarazpena jaso eta bost egun naturaleko epean idatziz Koordinaziorako Zuzendaritzari ebaluazioa jasotzeari uko egiten diola jakinaraziko ez balio, ebaluazioa onartu egin duela ulertuko da.

1. Ebaluatuak izango diren erakundeak aukeratzeko garaian kontuan izandako edozein baldintza aldatu egiten bada, Ebazpena aldatu egin ahal izango da.

2. Onuradunen batek ebaluazioa egiteari uko egingo balio, irizpideei jarraiki, eskatzaileen artetik, hurrenkeran ondorengoari emango litzaioke aukera ebaluazioa jasotzeko.

1. Ebaluatuak izateko aukeratzen diren erakundeek honako betebehar hauek izango dituzte:

   1. Enpresako pertsona bat, gutxienez, Bikain, Ebaluatzaileen Klubeko kide izateko izendatzea. Pertsona horrek ebaluazioaren organo kudeatzaileak antolatuko duen prestakuntza-modulura joan beharko du nahitaez. Halaber, beste entitate bat ebaluatzen parte hartuko du aurten, baldin eta kudeatzaileek hala eskatzen badiote. Pertsona horrek gainerako ebaluatzaileentzat finkatuko diren baldintza berberak bete beharko ditu.

   2. Enpresako pertsona bat solaskide izendatzea kanpo-ebaluazioaren Bikain organo kudeatzailearekiko harremana bidera dezan. Ahal dela, prestakuntza jasoko duen pertsona berbera izango da.

   3. Aurre-txostena osatzea kudeatzaileek eskuratuko dioten ereduaren arabera. Agiri horren bitartez erakundearen hizkuntza-egoera objektiboaren berri jasoko da, ebaluazio-prozesuarekin hasi aurretik.

   4. Kanpo-ebaluazioaren kudeatzaileek zerbitzu honek iraun bitartean eska diezaioketen informazioa nahiz baliabideak eskuratzea, ebaluazio-prozesua egoki burutu dadin. Eskakizun horiek ez betetzeak kanpo-ebaluazioaren prozesua etetea ekar lezake.

2. Kanpo-ebaluazioaren kudeatzaileek zehaztuko dituzte ebaluatuko diren erakundeekin nahiz ebaluatzaileekin erabiliko diren komunikazio- eta koordinazio-euskarriak.

Bikain-Euskararen Kalitate Ziurtagiria eskuratzeko ebaluatuko diren gaiak edo edukiak, 53/2009 Dekretuak, Bikain-Hizkuntza Konpromisoaren Zigilua eta Euskararen Kalitate Ziurtagiria arautzen dituenak, 4. artikuluan jasotakoak dira, baita lehen eranskinean aipatutakoak ere.

Bikain-Euskararen Kalitate Ziurtagiriaren mailak 53/2009 Dekretuak 5. artikuluan jasotakoak dira.

1. Eusko Jaurlaritzak doako ebaluazio-zerbitzua eskainiko die deialdi honen bidez ebaluatzeko lehenetsiko diren erakundeei.

2. Kanpo ebaluazioaren prozesuan hiru izango dira parte hartuko duten aldeak: ebaluatuko den erakundea, talde ebaluatzailea eta prozesuaren kudeatzaileak. Prozesuaren fase nagusiak honako hauek izango dira:

   Bikain, Ebaluatzaile Klubeko kideentzat antolatuko diren prestakuntza-moduluak egitea. Klub honetako kideek 53/2009 Dekretuak 8. artikuluan zehaztutako baldintzak beteko dituzte.

   Ebaluatuak izateko aukeratzen diren erakundeek Aurre-txostena prestatzea, kudeatzaileek eskuratuko dioten ereduari jarraiki.

   Talde ebaluatzaileen eraketa. Erakunde bakoitzari egokitu zaion talde ebaluatzailea komunikatuko zaio eta bisita-egunak (2 egun gutxienez) hitzartuko dira.

   Ebaluazio-agenda lantzeko bisita burutzea.

   Ebaluazio-bisita bera burutzea.

   Ebaluazio-txostena idaztea, talde ebaluatzailearen eskutik.

   Ebaluazio-txostenaren bidalketa erakundeei.

   Ebaluazio osteko bilera egitea (hautazkoa).

   Ziurtagirien banaketa.

3. Kanpo ebaluazioaren prozesuaren kudeatzaileek aipatu fase nagusi horien gaineko informazio osagarria unean-unean helaraziko diete alde guztiei, prozesua egoki burutu dadin.

53/2009 Dekretuaren 9. artikuluak finkatutakoaren araberakoa izango da.

Agindu honen 15. artikuluan kanpo-ebaluazioaren azken fase gisa aipatzen den «ziurtagirien banaketa» horren ostean, Hizkuntza Politikarako sailburuordeak argitara emango du 2009an Bikain-Euskararen Kalitate Ziurtagiria eskuratuko duten erakundeen zerrenda eta dagokien maila, bere ondorioak izan ditzan. Hori 53/2009 Dekretuaren 7. artikuluak finkatutakoa betez egingo du.

Hau guztia prozesu osoan aldeek gorde beharreko konfidentzialtasun-printzipioa betetzeko egin da, 53/2009 Dekretuko 7.5 artikuluak dioenari jarraiki.