Arreta Soziosanitarioa

Azaroaren 10eko 7/2000 Legeak, Merkataritza Jarduerari buruzko maiatzaren 27ko 7/1994 Legea aldatzen duenak, bigarren xedapen gehigarrian ezartzen duenez, aipaturiko legeak xede dituen merkataritzagune handietako saltokiak irekitzeko eta ixteko ordutegiak antolatzeko arauak eman ahal izango ditu Eusko Jaurlaritzak, Euskal Autonomia Erkidegoak merkataritza-arloan dituen eskumenak baliatuz eta euskal merkataritza-sektoreko eragileei aldez aurretik kontsultatuta, betiere lehia askearen eta leialaren printzipioei jarraiki. Gainera, ordutegi orokorraren gehieneko mugak ezarriko direla dio, behar den lurralde-oreka eta dauden merkataritza-egituren garapena bermatuz.

Bestalde, aipaturiko legearen 13. artikuluaren 2. idatz-zatiak ezartzen duenez, merkataritzagune handitzat hartzeko txikizkako merkataritzaguneek bete behar dituzten baldintzak erregelamendu bidez ezarriko dira, jendaurreko salmentarako duten azaleraren eta dauden edo egongo diren udalerriak duen biztanle-kopuruaren arabera ezarri ere. Idatz-zati horretan xedaturikoa garatuz, merkataritzagune handiak ezarri, aldatu eta handitzeko martxoaren 27ko 58/2001 Dekretua onartu zuen Jaurlaritzaren Kontseiluak; dekretu horretan, txikizkako merkataritzaguneak ezartzearen ondorioz horiei aplikatzekoak zaizkien eskakizunak aplikatzeko merkataritzagune jakin batzuek bete behar dituzten baldintzak ezartzen dira.

Azaroaren 10eko 7/2000 Legearen —Merkataritza Jarduerari buruzko maiatzaren 27ko 7/1994 Legea aldatzen duena— bigarren xedapen gehigarri horretan xedaturikoa garatuz, dekretu honek merkataritzagune handien merkataritza-ordutegiak arautzea du helburutzat, eta, dekretu horretan xedaturikoari dagokionez, txikizkako saltokiek merkataritzagune handitzat hartu ahal izateko bete behar dituzten baldintzak ezartzen ditu horretarako, lege horretan oro har eta aplikatzekoa den gainerako araudian ezarritakoa alde batera utzi gabe.

Euskal merkataritza-sektoreko eragileei aldez aurretik kontsultatuta eta batez ere honako hauek kontuan hartuta egin da araudia: merkataritza-banaketak gaur egun EAEko ekonomian duen zeregin estrategikoa eta hori izaten ari den modernizazio eta eraldaketa prozesu bizia; izan ere, prozesu horren ondorioz, merkataritza-egitura eta horren adierazpide guztiak sakon aldatzen ari dira.

Merkataritza-egituren modernizazio eta eraldaketa hori ekonomiaren globalizazio-prozesuaren zati bat da; prozesu horren ondorioz, kontsumitzaileak jokabidea aldatzen ari dira eta merkatuak kontrolatzeko estrategia berriak garatzen ari dira. Banaketa-merkatu horrentzat saltokiek irekita eman ditzaketen egunen eta orduen kopuruak duen garrantziaz eta eraginaz jabeturik, egokitzat eman da alderdi hori arautzea; nolanahi ere, araudi horrek kontuan izan behar du beharrezkoa dela honako hauek bermatzeko baldintzak sortzea eta aurreikustea: produktuak kalitate, aukera eta prezio baldintza hoberenetan eskaintzea, bai eta horiek dauden baliabideetara —denborari eta biztanleriaren hornidurari dagozkienak— egokitzea ere.

Era berean, hurbileko hiri-merkataritza izenekoak Erkidego honetan duen garrantzia izan du kontuan proposaturiko araudiak; izan ere, merkataritza-mota hori funtsezkoa da gure bizimoduan eta gure gizarte-ereduan, eta horregatik, behar diren neurriak hartu behar ditugu Erkidegoko herri guztietan merkataritza-ekipamendu egokia izatea ziurtatzeko eta enpresen arteko lehia ere bermatzeko, inork merkatua mendera ez dezan.

Horri dagokionez, Europako Kontseiluaren 2003/88/EB Arteztarauak merkataritza-ordutegiak arautzean, besteak beste honako hauek kontuan izateko gomendatzen die estatukideei: kultur, gizarte eta erlijio arloko tradizioak eta herritarren beharrak; era berean, igandeak atseden-egun gisa duen nondik norako soziala onartzeko ere gomendatzen die.

Berme horiek errespetatzearren, dekretu honek Erkidegoko merkataritzaguneek zabalik eman dezaketen gehieneko ordu-kopurua ezartzen du, betiere jarduera horren lan-araudian eta merkataritza-sektoreko langileek aintzat hartuta dituzten eskubideetan sartu gabe, gai horiek gure eskumenen eremutik kanpo baitaude.

Horri jarraiki, Euskadiko Aholku Batzorde Juridikoarekin adostasunez, Industria, Merkataritza eta Turismo sailburuak proposaturik, eta Jaurlaritzaren Kontseiluak 2005eko otsailaren 22ko bilkuran aldez aurretik eztabaidatu eta onarturik, hau