Arreta Soziosanitarioa

1. – Euskal Autonomia Erkidegoko Uraren Kontseilua uren esparruan eskumena duen sailari atxikitako organo aholku-emailea da. Kontseilua parte hartzeko organo gisa eratzen da, administrazioek eta EAEn uren esparruan aritzen diren eta gizartearen interesen ordezkari diren sektoreek parte har ditzaten.

2. – Horrez gain, EAEn uren arloan eskumenak dituzten administrazioetako ordezkariek Euskal Autonomia Erkidegoko Uraren Kontseiluan parte hartzen dutenez, kide anitzeko organo hau administrazio arteko koordinazio-tresna ere bada, parte hartzen duten administrazioen lurralde-eremuetan ur-baliabideak eta -aprobetxamenduak kudeatzeko tresna.

1. – Kide hauek izango ditu:

   1. Kontseiluko burua uren esparruan eskumena duen saileko sailburua izango da.

   2. Lehen buruordea Ingurumen-sailburuordea izango da.

   3. Bigarren buruordea Eusko Jaurlaritzako Uren zuzendaria izango da.

   4. Uren Zuzendaritzako Plangintza Hidrologikoaren Unitateko funtzionario arduraduna; hitzarekin baina botorik gabe.

   5. Gainerako kideak.

   6. Idazkaria uren arloan eskumena duen saileko funtzionario bat izango da, kontseiluburuak izendatutakoa; hitzarekin baina botorik gabe.

2. – Gainerako kideak honelaxe banatuko dira:

   1. Sei kide egongo dira Euskal Autonomia Erkidegoko Administrazioaren ordezkaritzan, arlo hauetan eskumena duten sailetatik izendatutakoak: meteorologia eta klimatologia, industria, nekazaritza, herrizaingo, osasun eta lurralde-antolamenduaren arloetan.

   2. Sei kide egongo dira foru-aldundien ordezkaritzan; aldundi bakoitzak bi ordezkari izango ditu.

   3. Bi kide egongo dira toki-administrazioen ordezkaritzan; Euskal Autonomia Erkidegoan ordezkaritzarik gehien duen udalerrien elkarteak izendatuko ditu.

   4. Erabiltzaile moduan, ondorengoak izango dira: ur-honidura egiten duten erakundeek izendatutako lau kide, industriako erabiltzaileen ordezkaritzan aritzen diren bi kide, energia-erabiltzaileen ordezkaritzan aritzen diren bi kide, nekazaritzako erabiltzaileen ordezkaritzan aritzen diren bi kide, eta kontsumitzaileen eta erabiltzaileen elkarteen ordezkaritzan aritzen diren bi kide. Erabiltzaileen ordezkariak izendatzeko prozedura arauen bidez ezarriko da.

   5. Kide bat egongo da Ur eta Itsasaldeen arloko Estatuko Administrazioaren ordezkaritzan.

   6. Naturaren alde aritzen diren elkarteen bi ordezkari egongo dira.

   7. Euskal Herriko Unibertsitateko ordezkari bat egongo da, urarekin zerikusia duten diziplina zientifikoetako irakasleen artetik izendatutakoa.

3. – Kontseiluak eskatu ahal izango du funtzionarioak edota txosteneko agiriak idazten edo aztertzen aritu diren espezialistak eta, era berean, aztergai diren arloetan adituak diren lagunak bertaratzeko, aholkua eman dezaten.

4. – Euskal Autonomia Erkidegoko Uraren Kontseiluak osoko bilkuran eta batzorde iraunkorrean jarduteko ahalmena izango du. Era berean, beste batzorde edo ponentzia batzuk eratzea erabaki ahal izango du, haren ardurako gaiak aztertzeko, prestatzeko eta horien gaineko txostena egiteko. Batzorde edo ponentzia horiek izango dituzten osaera, jarduteko araubidea eta zereginaren iraupena erabakiak finkatu beharko ditu. Jarduteko erak barne-jarduerako araudian ezarriko dira, eta hori Kontseiluak onetsiko du, kontseiluburuak proposaturik.

5. – Buruordeek, hurrenez hurren, kontseiluburua ordezkatuko dute, eta, beraz, buruaren zereginak beteko dituzte postua bete gabe dagoenean, kontseiluburua ez dagoenean, gaixorik denean edo legezko beste arrazoiren bat tartean denean.

Euskal Autonomia Erkidegoko Uraren Kontseiluak honako zeregin hauek izango ditu:

1. Txostena egingo du erkidego barneko arroen Plan Hidrologikoa egiteari eta plan horren geroko berrikuspenei buruz, Gobernu Kontseiluak erkidego barneko arroen Plan Hidrologikorako proposamena onetsi aurretik.

2. Ezagutuko ditu erkidego arteko arroen plan hidrologikoen proiektuak eta, hala behar denean, horiei buruzko txostena egingo du.

3. Txostena egingo du, nahitaez, Dekretu honen xede diren gaiei buruzko xedapen-proiektu orokorrei eta lege-aurreproiektuei buruz, hain zuzen, Euskal Autonomia Erkidegoko instituzio erkideek onetsi behar dituzten horiei buruz.

4. Proposamenak eta eskaerak aurkeztuko dizkie eskumena duten erakundeei, aintzat har ditzaten.

5. Administrazio Orokorrak edo foru- eta toki-administrazioek eskatutako txostenak egingo ditu, hain zuzen, bere ahalmenen arloko gaiei buruzkoak.

6. Uren Zuzendaritzak ebazpena eman aurretik, txostena egingo du gehiegi ustiatutako akuiferoen deklarazioaren eta babes-perimetroen zehaztapenaren espedienteei buruz –horiek uztailaren 20ko 1/2001 Legegintzako Errege Dekretuak onetsitako Uren Legearen Testu Bateginak aipatzen ditu 56. artikuluan–. Halaber, egoki iritzitako txostenak eta proposamenak egingo ditu, jabari publiko hidraulikoaren antolamenduari, administrazioari eta tutoretzari dagokienez.

7. Ezagutuko ditu berari aztertzeko utzitako edo, lege-mailako arau edo erregelamenduzko arau baten bidez, berari emandako gai guztiak, eta horiei buruzko erabakia hartuko du.

1. – Lehenengo fasean, Uren Zuzendaritzako zerbitzu teknikoek Planaren oinarrizko agiriak prestatuko dituzte. Hori egite aldera, hautatu, laburtu eta sistematizatuko dituzte EAEko Administrazio Orokorrak eta Euskal Autonomia Erkidegoko Uraren Kontseiluan esku hartzen duten beste administrazio publiko batzuek egindako oinarrizko ikerketen eta azterlanen datu nagusiak, zehazkiago, Uren Legearen Testu Bateginak –uztailaren 20ko 1/2001 Legegintzako Errege Dekretuak onetsitakoak– 42. artikuluan ezarritako gutxieneko edukiekin zerikusia duten datuak.

2. – Une horretan, eta EAEko erkidego barneko arroen Plan Hidrologikoa Lurralde Antolamenduaren Gida-lerroek eta Lurraldeko Zati Planek zehaztutako lurralde-esparruan era egokian txertatuko dela bermatzeko, aholkua eskatuko zaio lurralde-antolamenduaren arloko sail eskudunari, indarrean dagoen lurralde-antolamenduak erkidego barneko plan hidrologikoaren xede diren obrak, jarduerak edo zerbitzuak kokatzeko eskaintzen dituen hautabideei, irtenbideei eta aukerei buruz.

3. – Txosten hori ikusita, Uren Zuzendaritzak Planaren gida-lerroen proiektua egingo du. Proiektua Euskal Autonomia Erkidegoko Uraren Kontseiluan esku hartzen duten administrazioei bidaliko zaie, bai eta interesa izan dezaketen gainerakoei ere, egoki iruditzen zaizkien proposamenak edo iradokizunak egin ditzaten bi hileko epean.

4. – Aldi berean, jendaurrean jarriko da ikusgai, bi hileko epean.

5. – Izapide horiek bete ondoren, Euskal Autonomia Erkidegoko Uraren Kontseiluari helaraziko zaizkio Planaren gida-lerroen proiektua eta espedienteari egindako ohar eta iradokizun guztiak, horien gainerako txostena egin dezan.

6. – Euskal Autonomia Erkidegoko Uraren Kontseiluari entzun ondoren, Lurralde Antolamendu eta Ingurumen sailburuak EAEko barnealdeko arroen Plan Hidrologikoaren gida-lerroak onetsiko ditu.

7. – EAEko barnealdeko arroen Plan Hidrologikoa egiteko bigarren fasean, Euskal Herriko Lurralde Antolamendurako Batzordeak, Euskal Herriko Ingurumen Batzordeak eta Landaberrik txostena egingo dute onetsitako planaren gida-lerroei buruz.

8. – Aholkularitzako organo horiek planaren gida-lerroei buruz egindako txostenak eta indarrean dagoen araudiari jarraiki eska daitezkeen gainerakoak aztertu ondoren, Uren Zuzendaritzak EAEko barnealdeko arroen Plan Hidrologikorako proposamena idatziko du. Proposamen hori Euskal Autonomia Erkidegoko Uraren Kontseiluari aurkeztuko zaio, horren gaineko txostena egin dezan.

9. – Azken txosten hori egindakoan, Lurralde Antolamendu eta Ingurumen sailburuak Gobernu Kontseiluari aurkeztuko dio EAEko barnealdeko arroen Plan Hidrologikorako proposamena, onets dezan. Eta, onetsitakoan, Estatuko Administrazio Orokorrari bidaliko zaio, EAEko barnealdeko arroen Plan Hidrologikoa onets dezan.

10. – EAEko barneko arroen Plan Hidrologikoak jasota izango ditu plana bera berraztertzeko egoerak, epeak eta prozedura.

EAEko barnealdeko arroen Plan Hidrologikoari eta plan horren geroko berrikuspenei ingurumen-inpaktuaren baterako ebaluazioaren prozedura ezarriko zaie. Prozedura hori Euskal Autonomia Erkidegoko ingurugiroa babesten duen otsailaren 27ko 3/1998 Legeak jasotzen du 43. a) artikuluan.

1. – Uren Zuzendaritzak, jarraian ezarritako prozeduraren arabera, adierazi ahal izango du alderdi bateko lur azpiko baliabideak gehiegi ustiatuta daudela edo gehiegi ustiatzeko arriskua dagoela. Prozedura horrexeri jarraiki, babes-perimetroak zehaztuko dira, Uren Legearen Testu Bateginak –uztailaren 20ko 1/2001 Legegintzako Errege Dekretuak onetsitakoak– 56.2. eta 56.3. artikuluetan arautzen dituenak.

2. – Espedienteak hasiko dira ofizioz, akuiferoaren Erabiltzaileen Elkarteak eskaturik –horrelakorik badago–, edota gutxienez urtean ateratako kopuruaren erdia legez erabiltzen ari direla egiaztatzen duten erabiltzaileek eskaturik.

3. – Uren Zuzendaritzak proposamen bat aurkeztuko du akuiferoa gehiegi ustiatuta dagoela deklaratzeko edo babes-perimetroak zehazteko. Proposamena tartean dauden administrazio publiko guztiei eta interesdun guztiei bidaliko zaie, eta hilabeteko epea emango zaie horren gaineko oharrak, iradokizunak, hautabideak eta proposamenak egiteko.

4. – Uraren Zuzendaritzak, aurreko izapideen emaitzak ikusita, dagokion erabakia hartuko du. Erabaki hori, espedientearekin batera, Euskal Autonomia Erkidegoko Uraren Kontseiluari helaraziko dio, nahitaezko txostena egiteko.

5. – Euskal Autonomia Erkidegoko Uraren Kontseiluak txostena egin ondoren, Uren Zuzendaritzak gehiegi ustiatutako akuiferoaren deklarazioari buruzko eta babes-perimetroak finkatzeari buruzko ebazpena emango du.

Vitoria-Gasteizen, 2003ko otsailaren 18an.

Lehendakaria,

JUAN JOSÉ IBARRETXE MARKUARTU.

Lurralde Antolamendu eta Ingurumen sailburua,

SABIN INTXAURRAGA MENDIBIL.