Arreta Soziosanitarioa

Herrialde iberoamerikarrak izan dira batez ere euskal herritarren migrazio mugimenduen helmuga, eta, denborarekin, hasierako harreman afektiboak eta kulturakoak aberastu egin dira, harreman ekonomikoak ere sortu baitira. Hortaz, Euskal Herriko eta herrialde horietako herritarren loturak estutu eta sendotu egin dira.

Gaur egun, Iberoamerikak igarotzen duen ekonomia-beheraldiaren eraginez, herrialde horiekin elkartzen gaituzten loturak sendotu egin dira hiru eremu hauetan bereziki: garapenerako lankidetzan, euskal gizataldeei laguntzeko jardueretan eta harreman sozioekonomiko eta kulturaletan.

Euskal gizataldeei laguntzea dela eta, Euskal Autonomia Erkidegoaz kanpoko euskal gizatalde eta etxeekiko harremanei buruzko maiatzaren 27ko 8/1994 Legeak honoko helburu hauek ezarri zituen besteak beste: gizarte, kultura eta ekonomia harremanak instituzionalizatzea eta kanpoan diren euskaldunak erabat babestea eta sustatzea, hainbat eskubide eta zerbitzu aitortuz eta emanez. Legea indarrean jarri zenetik hona ikusi da ezarritako helburuak gauzatzeko nahitaezkoa dela lankidetza eta partaidetzarako bide egokiak ezartzea.

Garapenerako lankidetza dela eta, Garapenerako Nazioarteko Lankidetzaz Estatuak uztailaren 7an emandako 23/1998 Legeak dio giza garapen globala sustatu behar dela, garapenerako lankidetzaren inguruko politikak eraginkorrak eta koherenteak izan daitezen eta, horrela, mundutik txirotasuna desagertu eta garapen bidean dauden herrien hazkunde ekonomikoa iraunkorra izan dadin. Legeak berak dio autonomia erkidegoetatik egiten diren jarduerak gizartearen beraren adierazpen solidarioa direla, eta oinarri hartzen ditu aurrekontu autonomia eta jarduerak garatzeko eta gauzatzeko autoerantzukizuna.

Euskal Autonomia Erkidegoak elkartasunezko konpromiso iraunkorra du garapen bidean dauden herrialdeekin, eta aurrekontu operatiboaren %0,7 ematen die.

Xede horretara bideratutako baliabideen garrantzia ikusirik, beharrezkoa da egitura eta bide egokiak jartzea garapenerako lankidetzaren helburuak gauzatu ahal izateko.

Iberoamerikako herrialdeen artean, Euskal Autonomia Erkidegoak laguntza garrantzitsua ematen dio Venezuelari garapenerako lankidetzaren alorrean eta lurralde horretan burutzen ditu Euskal Autonomia Erkidegoak nazioarteko eragina duten jarduerak, dagozkion eskumen-tituluen eremuaren barruan. Jarduera horien garrantziak eta muntak komenigarri egiten dute Euskal Autonomia Erkidegoaren ordezkaritza bat jartzea, garapenerako lankidetzan eta euskal gizataldeen alorrean erkidego honek Venezuelan burutzen dituen jarduerak eta nazioartean garrantzia dutenak bateratzeko.

Horren ondorioz, Jaurlaritzaren - Lehendakaritzaren proposamenez, eta Jaurlaritzaren Kontseiluak 2003ko otsailaren 11n egindako bilkuran aztertu eta onartu ondoren, hauxe