Arreta Soziosanitarioa

Dekretu honen bidez Euskadiko Sanitate Kontseilua eta Arabako, Bizkaiko eta Gipuzkoako Osasun Barrutietako Kontseiluak arautu nahi dira. Kontseiluak Euskadiko sistema sanitarioaren partaidetza komunitarioko organo gisa sortzen dira, Osasun Sailari atxikita, Euskadiko Antolamendu Sanitarioaren ekainaren 26ko 8/1997 Legeak bere 11. artikuluan xedatzen duenaren arabera.

1. – Hauek dira Euskadiko Sanitate Kontseiluaren eginkizunak, Autonomia Erkidegoaren eremuan:

   1. Kontsultak jasotzea eta aholkuak ematea Euskadiko Osasun Plana formulatzerakoan.

   2. Kontsultak jasotzea eta aholkuak ematea sistema sanitarioaren helburu orokorren gainean: atentzio prebentiboa, osasunaren sustapena, aseguramenduaren kudeaketa eta zerbitzu sanitarioen kontratazioa; bai eta Osasun Sailak jakinaraz diezaiokeen beste edozein alor ere.

   3. Sistema sanitarioaren helburu orokorren inguruan Osasun Sailak aurkezten dizkion gainerako jarduketak ezagutzea.

   4. Osasun Planaren helburuen ebaluazioaren berri izatea, eta bai Osasun Sailak jakinarazten dizkion gainerako jarduketen ebaluazioaren berri ere; eta, behar izanez gero, horien gainean txostenak ematea.

   5. Osasun Sailaren aurrekontu-programen ildo nagusien berri izatea.

   6. Osasun Sailak, orokorrean, arloka edo lurraldeka, egiten dituen programen eta jarduketa-planen betetze mailaren segimendua eta ebaluazioaren berri jakitea.

   7. Indarrean dagoen araudia aplikatuz eslei dakiokeen beste edozein.

2. – Osasun Barrutietako Kontseiluen eginkizunak Euskadiko Sanitate Kontseiluari esleitu zaizkion berak dira, barrutian barrutiko esparruaren barruan, eta, bereziki, bertan ematen diren zerbitzu sanitarioen bereizgarritasunei dagokienez.

1. – Osasun Sailaren Osasun Plangintza eta Antolamenduko sailburuordea izango da bai Euskadiko Sanitate Kontseiluko burua bai Osasun Barrutietako Kontseiluetako burua. Berak ezin duenean ordezko bat izendatuko du, indarrean dauden arauek oro har ezarritako ordezkatze-araubidearen indarrez.

2. – Osasun sailburuaren aginduz izendatuko dira Euskadiko Sanitate Kontseiluko kideak; honako hauek hain zuzen:

   • Foru aldundietako hiru ordezkari, lurralde historiko bakoitzetik bat.

   • Hamabi udal-bazkide, Autonomia Erkidegoko udalen ordezkari gisa. EUDELek (Euskal Udalen Elkartea) izendatuko ditu.

   • Euskadiko elkargo ofizialen lau ordezkari, honako elkargoen ordezkari bana alegia: Medikuen Elkargoa, Erizaintzako Diplomatuen Elkargoa, Botikarien Elkargoa eta Albaitarien Elkargoa.

   • Autonomia Erkidegoan zabalkunde handiena duten kontsumitzaile edo erabiltzaileen erakundeen federazioetako ordezkari bi.

   • Autonomia Erkidegoan ordezkaritza handiena duten sindikatuetako lau ordezkari.

   • Sanitatearen alorrean ordezkaritza esanguratsua duten beste sindikatuetako ordezkari bi.

   • Autonomia Erkidegoan ordezkaritza handiena duten enpresa-erakundeetako sei ordezkari.

   • Osasun Sailaren ordezkari bat. Kontseiluko idazkaria izango da, eta hitza bai baino botorik ez du izango.

3. – Osasun Barrutietako Kontseiluek Euskadiko Sanitate Kontseiluaren osaera bera izango dute; alabaina, ordezkatuta dauden erakundeek pertsona bat edo beste alda ditzakete, lurraldetasunaren irizpidea eta ondoren aipatzen diren bereizgarritasunak kontuan harturik:

   • Lurraldean lurraldeko aldundiak Osasun Barrutiko Kontseiluko hiru foru-ordezkari izendatuko ditu.

   • Hamabi udal bazkideak tokian tokiko osasun barrutiko udaletakoak izango dira.

   • Kontseiluko idazkaria ezberdina izan daiteke osasun barruti batean eta bestean.

4. – Kontseilukide izateko euren ordezkariak aukeratu behar dituzten erakundeek titular eta ordezkoen proposamenak jakinaraziko dizkiete kontseiluetako buruei, Osasun sailburuak agindu bidez izendapena egin dezan.

   Izendapenek lau urte iraungo dute, baina gero berritu ahal izango dira. Hala eta guztiz ere, baldin erakunde batek baino gehiagok euren ordezkariak elkar hartuta hautatu behar badituzte, izendapena urte baterako bakarrik egin ahalko dute, halako moduz non, urtero txandakatuz, erakunde guztiotako ordezkariek jardun baitezakete Kontseiluan.

5. – Kontseiluetako buruek gonbidatuta eta bertako funtzionamendua errazteko bidezko ikusten bada, Osasun Sailaren nahi adina ordezkari egon daitezke bertan, hitzarekin baina botorik gabe.

   Kontseiluak, gainera, buruaren bitartez, bere zereginak egoki betetzeko beharrezkotzat jotzen dituen txostenak edo irizpen teknikoak eska diezazkioke Osasun Sailari.

1. – Kontseiluburuak egingo du kontseiluetako ohiko bilkuren deialdia, urtean bi aldiz gutxienez.

   Deialdia bilkura baino hamabost egun lehenago gutxienez egingo da, premiazko kasuetan izan ezik. Deialdiari aurreko bilkuraren akta eta egun horretarako gai-zerrenda erantsiko zaizkio. Gai-zerrendako aztergaiak 48 ordu lehenago gutxienez aurkeztu beharko dituzte kontseilukideek.

2. – Kontseiluek, halaber, ohiz kanpoko bilkurak egin ditzakete, buruak eskatuta edo kideen %25ek gutxienez eskatuta. Bilkura hori deialdia egin eta hilabete baino lehen egin beharko da.

   Ohiz kanpoko bilkuren gai-zerrenda astebete lehenago gutxienez bidaliko zaie kontseilukideei.

1. – Kontseiluak lehen deialdian eratzeko gutxieneko quoruma kideen gehiengoa izango da. Bigarren deialdian, ordu erdi geroago, aski izango da kideen herena egotea.

2. – Kideek, bilkuretan, ordezkatzen dituzten erakundeen ikuspuntua azaldu dezakete dena delako aztergaiari dagokionez. Azalpena ahozkoa izango da, baina horri laguntzeko txosten idatziak aurkeztu ahalko dira. Txostenak aktan jasota geratuko dira, aurkezten dituztenek berariaz hala eskatzen badute.

   Erabakiak hartzez gerotan, bilkuran dauden kideen gehiengoz hartuko dira; berdinketarik badago, buruaren botoak emango du ebazpena.

3. – Kontseiluko buruak zuzenduko ditu bilkurak, idazkariaren laguntzaz: hitza emango die kideei, haien mintzaldiak bideratuko ditu, eta, behar izanez gero, baita mugatuko ere, kide guztiek parte har dezaten eta bilkurak taxuzkoak izan daitezen.

Bilkura guztietan aktak egingo dira. Bertan hauek jasoko dira: parte-hartzaileak, gai-zerrenda, eztabaidatutako gaiak, kideen mintzaldien laburpena, bozketetako emaitzak eta hartutako erabakiak, horrelakorik badago.

Kideek berariaz eskatuta, aktetan erabakien aurkako haien ezezko botoa jasoko da, eta horrekin batera, aurkezten dituzten txostenak erantsiko dira.

Aktetan idazkariaren izenpea eta buruaren oniritzia agertuko dira. Gainera, bilkuran egiten den egunean bertan edo hurrengo bilkuraren egunean, kontseilukideek euren onarpena eman beharko diote aktari.

Dekretu honetan jasotzen ez den guztiari dagokionean, kide anitzeko organoen gainean Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 22. artikuluan eta hurrengoetan xedatutakoa aplikatuko da.

Kontseiluko kide izateak ez dakar inolako ordainsari berezirik kobratzea, salbu eta indarrean dagoen araudiaren arabera kideei dagozkien bidezko sari eta kalte-ordainak.

Vitoria-Gasteizen, 1999ko ekainaren 22an.

Lehendakaria,

JUAN JOSÉ IBARRETXE MARKUARTU.

Osasun sailburua,

GABRIEL M.ª INCLÁN IRIBAR.