Arreta Soziosanitarioa

Gobernantza Publiko eta Autogobernuko sailburuak 2022ko maiatzaren 18an emandako Aginduaren bidez, onartu ziren Euskal Autonomia Erkidegoko Administrazioko eta haren organismo autonomoetako kidego eta eskaletan enplegua finkatzeko prozesu bereziak eta enplegua finkatzeko salbuespenezko prozesuak arautuko dituzten oinarri orokorrak.

Era berean, Gobernantza Publiko eta Autogobernuko sailburuak 2022ko azaroaren 18an emandako beste agindu baten bidez, Euskal Autonomia Erkidegoko Administrazio Orokorreko eta haren Organismo Autonomoetako Fakultatiboen Goi-Mailako Kidegoko Meatzeetako Eskalan enplegua finkatzeko prozesu bereziko deialdia egin zen, eta prozesu horretako oinarri espezifikoak onartu ziren.

Herri Arduralaritzaren Euskal Erakundeko zuzendariaren 2023ko otsailaren 9ko Ebazpenaren bidez, Euskal Autonomia Erkidegoko Administrazio Orokorreko eta haren organismo autonomoetako Fakultatiboen Goi-mailako Kidegoko Meatzeetako eskalan enplegua finkatzeko prozesu berezian parte hartzeko onartutako eta baztertutakoen behin betiko zerrendak onartu ziren.

Fakultatiboen Goi-mailako Kidegoko Meatzeetako Eskalako Epaimahaiaren 2023ko uztailaren 21eko Erabakiaren bidez, behin 2023ko ekainaren 2ko Erabakiaren bidez onartutako behin-behineko emaitzen aurka jarritako erreklamazioak ebatzita, 2023ko ekainaren 1ean egindako probaren behin betiko emaitzak 2023ko uztailaren 28an hautaketa-prozesuaren webgunean argitaratzea onartu zen, eta iragarri zen urriaren 23an irekiko zela merezimenduak alegatzeko 20 egun balioduneko epea.

Administrazio Publikoaren Euskal Institutuko zuzendariaren 2024ko ekainaren 18ko Ebazpenaren bidez, Euskal Autonomia Erkidegoko Administrazio Orokorreko eta haren organismo autonomoetako kidego eta eskaletan enplegua finkatzeko prozesu berezietako azken kalifikazioen eta eskainitako lanpostuen behin betiko zerrendak argitaratzeko agindua eman zen.

Oinarri orokorretako 9.3 apartatuan xedatutakoaren arabera, ikusita Fakultatiboen Goi-mailako Kidegoko Meatzeetako eskalan enplegua finkatzeko prozesu berezian parte hartzen duen pertsona baten kasuan IVAPek ezin izan duela egiaztatu hautaketa-prozesu hori arautzen duten oinarri espezifikoetako 2.3 apartatuan eskatzen den «Meatze ingeniaritzako lanbide arautuan jarduteko gaikuntza-titulua» izatearen betekizuna betetzen duela oinarri orokorretako 3.3.e) apartatuan xedatutakoari dagokionez, IVAPek aipatutako Fakultatiboen Goi-mailako Kidegoko Meatzeetako eskalan enplegua finkatzeko prozesu berezian lanpostuak esleitzeko beharrezko titulua duela egiaztatzen duen dokumentazioa aurkezteko eskatu zion aipatutako hautagaiari. Era berean, errekerimendu horretan jakinarazi zitzaion ezen, adierazitako epearen barruan, eta ezinbesteko kasuetan izan ezik, eskatutako dokumentazioa aurkeztuko ez balu, edo dokumentazio hori aztertuta ondorioztatuko balitzateke alegatutako betekizuna ez duela betetzen, ezin izango zaiola esleitu «Meatze ingeniaritzako lanbide arautuan jarduteko gaikuntza-titulua» sarbide-titulua duen lanposturik, hargatik eragotzi gabe eskabidean faltsutzea egiteagatik izan lezakeen erantzukizuna.

Horretarako ezarritako epean hautagaiak aurkeztutako dokumentazioa aztertu ondoren, frogatuta geratu da hautagaiak ez duela betetzen aipatutako oinarri orokorren 3.3 apartatuan aurreikusitako sarbide-titulazioaren baldintza «Meatze ingeniaritzako lanbide arautuan jarduteko gaikuntza-titulua». Oinarri orokor horiek parte hartzeko betekizun orokorrak arautzen dituzte, eta nahitaez bete behar dira deitutako hautaketa-prozesuetan onartua izateko.