Arreta Soziosanitarioa

1. Arau hauen bidez, abenduaren 29ko 10/2006 Legearen 7.1 artikuluan aipatzen diren Euskadiko Nekazaritza eta Elikadura Ekologikoaren Kontseiluko kideak hautatzeko prozedura ezarri eta hartarako deia egiten da: batetik, lau (4) kontseilukide, ekoizpen-ustiategien jabe direnen ordezkari eta, bestetik, beste lau (4), produktuak egin, inportatu edo merkaturatzen dituzten enpresen jabe direnen ordezkari. Kargu horiek lau urte naturaleko iraupena izango dute, karguaz jabetzeko datatik zenbatzen hasita. Horien artean hautatuko dira, ondoren, Kontseiluko presidentea eta presidenteordea.

2. Hauteskunde-prozesu horrek bete beharreko egutegia arau hauen I. eranskinean ageri da. Ondorio horietarako, baliogabetzat joko dira hauteskunde-prozesu osoko larunbatak. Epea edo jarduketa larunbatean, igandean edo jaiegunean bada, hurrengo egun balioduna gaituko da horretarako.

3. Hauteskunde-egutegiaren ondoreetarako, honako hauek baliogabeak dira:

   1. Maiatzaren 1eko jaieguna, uztailaren 17ko tokiko jaieguna, uztailaren 25eko jaieguna, uztailaren 31ko jaieguna Bizkaian, irailaren 5a eta 6a, urriaren 12a, azaroaren 1a, abenduaren 6a eta 8a.

   2. Abuztu osoa.

   3. 2023ko urriaren 12tik 13ra bitarteko aldia, biak barne.

   4. 2023ko abenduaren 22tik 2024ko urtarrilaren 5era bitarteko aldia, biak barne.

1. Euskadiko Nekazaritza eta Elikadura Ekologikoaren Hauteskunde Batzordea sortzen da.

2. Euskadiko Nekazaritza eta Elikadura Ekologikoaren Hauteskunde Batzordeak zeinaren egoitza Euskadiko Nekazaritza eta Elikadura Ekologikoaren Kontseiluaren egoitzan egongo baita honako kide hauek izango ditu:

   1. Presidentea: Euskal Autonomia Erkidegoko Administrazio Orokorrean elikagaien kalitatearen arloko eskumena duen zuzendaritzako titularrak izendatuko du.

   2. Presidenteordea: Euskal Autonomia Erkidegoko Administrazio Orokorrean elikagaien kalitatearen arloko eskumena duen zuzendaritzako titularrak izendatuko du.

      Kontseilukideak:

      (1) Aholkulari juridiko bat, Euskal Autonomia Erkidegoko Administrazio Orokorrean elikagaien kalitatearen arloko eskumena duen zuzendaritzako titularrak izendatutakoa; idazkari-eginkizunak beteko ditu.

      (1) Ordezkari bat, izaera sindikaleko Nekazaritzako Lanbide Erakundeetako bakoitzak izendatua.

      (3) Ordezkari bat, foru-aldundietako bakoitzak izendatua.

      (1) Kontseiluaren gerentziaren eginkizunak gauzatzen dituen pertsona.

Hona hemen Hauteskunde Batzordearen eginkizunak:

1. Euskadiko Nekazaritza eta Elikadura Ekologikoaren Kontseiluko erregistroetan inskribaturiko hautesleen erroldak argitaratzea eta jendaurrean jartzea, horretarako zehaztuko diren tokietan, hain zuzen ere.

2. Aipatutako erroldei buruzko erreklamazioak lehen auzialdian ebaztea, eta ebazpen horien aurka aurkezten diren errekurtsoen berri ematea elikagaien kalitatearen arloan eskumena duen zuzendaritzari, zuzendaritza horrek ebazpena eman dezan.

3. Behin betiko erroldak onestea.

4. Kontseilukide izateko hautagaiak jasotzea eta izendatzea.

5. Bozketen behin betiko zenbaketa egitea.

6. Hautetsiak izendatzea.

7. Hauteskunde-prozesua arautzeko behar diren arauak proposatzea, araudi honetan aurreikusi gabeko guztiari dagokionez, eta sortzen diren interpretazio-arazoak ebaztea.

8. Hauteskunde-prozesua egoki bideratzeko behar den beste edozein.

1. Euskadiko Nekazaritza eta Elikadura Ekologikoaren Kontseiluak egingo ditu hauteskunde-erroldak, Euskadiko Nekazaritza eta Elikadura Ekologikoari buruzko Legearen (abenduaren 29ko 10/2006) 2. artikuluan ezarritako erregistroan inskribatutako pertsonak oinarri hartuta, arau hauek indarrean jartzen diren egunean. Hala dagokionean, enpresaren titularkideak ere jasoko ditu horietan, betiere erregistroan behar bezala inskribaturik badaude.

2. Abenduaren 29ko 10/2006 Legearen 2.2 artikuluko a) apartatuan ezarritako erregistroaren ekoizleen atalean inskribatutako pertsonek osatuko dute ekoizpen-errolda.

3. Elaborazioaren, hirugarren herrialdetiko inportazioaren edo merkaturatzearen errolda, abenduaren 29ko 10/2006 Legearen 2.2 artikuluaren b), c) eta d) apartatuetan aurreikusitako erregistroaren ataletan inskribatutako pertsonek osatuko dute.

4. Ekoizpen-ustiategien titularren erroldari zein enpresa elaboratzaile, inportatzaile eta merkaturatzaileen titularren erroldari dagozkien kontseilukideen kopurua II. eranskinean finkatuta dago.

5. Ekoizleen erroldak hiru azpierrolda izango ditu, bat Lurralde Historiko bakoitzeko, eta horiek kontseilukide bana hautatuko dute. Hiru azpierrolda horietan boto gehien lortzen dituen hurrengo hautagaia laugarren kontseilukide izendatuko da, Kontseiluko presidentearen edo presidenteordearen funtzioak egiteko hautatuko den pertsonaren postua bete dezan.

6. Gainerako erroldei dagokienez, errolda bakarra egongo da hiru Lurralde Historikoetarako eta, hautesle horietatik guztietatik, lau ordezkari hautatuko dituzte.

1. Erroldetan egon ahal izateko, beharrezkoa izango da:

   1. Arau hauek indarrean jartzen direnean, Euskadiko Nekazaritza eta Elikadura Ekologikoaren Kontseiluaren erregistroetan inskribaturik egon behar dute.

   2. Ezin da egon eskubide zibilez baliatzeko desgaiturik.

      Euskadiko Nekazaritza eta Elikadura Ekologikoaren Kontseiluaren erregistroetan azaltzen den pertsona bera izango da eskubidearen jabea.

2. Elikagaien kalitatearen arloan eskumena duen zuzendaritzak ezarritako ereduaren arabera prestatuko dira erroldak. Errolda horietan, ordena alfabetikoaren arabera azalduko dira titularrak lurralde historiko bakoitzean.

Euskadiko Nekazaritza eta Elikadura Ekologikoaren Kontseiluak Hauteskunde Batzordeari bidaliko dizkio erroldak, jendaurrean jartzeko behar den beste ale bidali ere. Hauteskunde Batzordeak, bestalde, bidezkotzat jotzen dituen egiaztapen guztiak egin ondoren, bete beharreko eginbideak beteko ditu erroldak bideratzeko, betiere, Batzordeko idazkariaren izenpearekin eta presidentearen oniritziarekin. Batzordeak Euskal Autonomia Erkidegoko Administrazio Orokorraren barnean elikagaien kalitatearen arloan eskumena duen sailaren egoitzan, Euskadiko Nekazaritza eta Elikadura Ekologikoaren Kontseiluaren egoitzan eta bere webgunean (www.ekolurra.eus) jarriko ditu erroldak jendaurrean; erreklamazioak eta errekurtsoak egiteko epeak deialdiaren egutegira egokituta egongo dira.

1. Errolda bakoitzeko kontseilukide titularrak hautatzeko orduan, hauek izango dira hautesle: pertsona fisikoak, adin nagusikoak badira, eta pertsona juridikoak, baldin eta abenduaren 29ko 10/2006 Legearen 2. artikuluan ezarritako erregistroaren dagokion atalean behar bezala inskribatuta badaude.

   Hala badagokio, enpresaren titularkideak ere jasoko ditu, betiere erregistroan behar bezala inskribaturik badaude.

2. Pertsona juridikoei dagokienez, haien legezko ordezkaria hartuko da hautesletzat, eta izaera hori egiaztatu beharko du ahalorde-eskritura edo zuzenbidean onartzen den beste edozein frogabide aurkeztuz.

3. Hainbat jarduera egiten dituztelako erregistroaren atal batean baino gehiagotan izena emandako operadoreek beren botoa eman ahalko dute dagokien errolda bakoitzean.

1. Errolda bakoitzaren ordezkariak aukeratzeko prozesuan, errolda eta azpierrolda bakoitzean daudenak izango dira hautesle hautagarri.

2. Ezin izango dituzte hautatu honako zirkunstantzia hauetakoren batean dauden pertsona fisiko edo juridikoak:

   1. Arau hauetan hautagai izateko ezarritako baldintzak ez betetzea.

   2. Ezarritako zehapena bete gabe Kontseiluak zehatuta egotea.

   3. Kontseiluarekiko betebehar ekonomikoak egunean ez izatea.

   4. Hauteskunde-araubide orokorra arautzen duen legeriak ezarritako hautatua izatea eragozten duen kausaren batean egotea.

3. Aurreko zenbakiko baldintzak ere bete beharko ditu pertsona juridikoen ordezkariak, eta bete beharrekoak izango dira, gainera, kontseiluko kidearen izaera edo hautaketaren ondoriozko beste edozein kargu mantentzeko.

1. Errolda bakoitzeko kontseilukideak eta ordezkoak hautatzeko hautagaitzak indibidualak izango dira bozkatu eta zenbatzeari dagokionez, baina zerrendetan elkartu ahalko dira aurkezpena eta hauteskunde-kanpaina egitearren.

2. Talde bakoitzerako aurkeztutako hautagaitzek izendatzeko eskabidea aurkeztu behar dute Hauteskunde Batzordearen aurrean, I. eranskinean zehaztutako epean.

3. Inork, ez norberaren izenean ez besteren baten izenean, ezingo du kidetza bat baino gehiago izan Kontseiluan.

4. Hautagai bakoitzak dagokion erroldan inskribatutako pertsonen bost sinadura aurkeztu beharko ditu gutxienez, betiere nekazaritzako erakunde profesional baten edo legez eratutako nekazaritzako elkarte ekologiko baten abala ez badu. Baldin eta proposatutako elkarteak dagokion erroldan bost kide baino gehiago ez balitu ere, hautagaiak berdin aurkeztu beharko du eskatutako sinadura kopuru hori.

5. Ezein erakunde profesionalek ezin izango du hautagai-zerrenda bat baino gehiago aurkeztu errolda edo azpierrolda bakoitzeko. Hautagaitzak aurkeztean, ezin izango da erabili alderdi politikoen ikur edo bereizgarririk.

6. Baldin eta nekazaritzako erakunde edo lanbide-elkarte bat beste handiago batean sarturik badago, ezin izango du hautagai-zerrendarik aurkeztu, handiago horrek aurkeztuz gero.

   Nekazaritzako erakundeek edo lanbide-elkarteek hautagaitzarik aurkeztuz gero, haien estatutuen arabera ordezkari direnek izenpetu beharko dituzte zerrendok. Gainerako hautagai-zerrenden kasuan, sustatzaileek aurkeztu beharko dituzte.

   Zerrendak hautesleek aurkeztuz gero, izenpetzaileen nortasuna egiaztatu beharko da Hauteskunde Batzordearen aurrean, eta, orduan, proposatutakoak eta atxikimendua adierazi dutenak azaldu beharreko erroldetan azaltzen ote diren egiaztatuko du Batzordeak.

Hautagaiek honako betekizun hauek bete behar dituzte:

1. Euskadiko Nekazaritza eta Elikadura Ekologikoaren Kontseiluko kideak izatea; horretarako, behar bezala inskribatuta egon beharko dute erregistroaren dagokion atalean (titular nahiz titularkide gisa). Pertsona juridikoen legezko ordezkariek hautagai den enpresarekin duten lotura frogatu beharko dute.

2. Hautagaiak inskribatuta dauden erroldara soilik aurkeztu ahal izango dira. Erregistroaren hainbat ataletan inskribatuta badaude eta bi erroldetako kide badira, horietako bakarrean baino ezin izango dira aurkeztu. Titularkide bat baino gehiago dituzten enpresen kasuan, horietako bakarra aurkeztu daiteke hautagaitzara, baldin eta behar bezala inskribatuta badago.

3. Zehatza eta ez nahasteko moduan jaso behar ditu izena, abizenak eta indarren dagoen NAN, baita helbidea eta jakinarazpenetarako beste harreman-bitarteko batzuk ere.

4. Hautagaitzak 2 hautagaiz osatuta egongo dira. Gainera, Emakume Nekazarien Estatutuari buruzko urriaren 15eko 8/2015 Legean ezarritakoa betetzen dela bermatzeko (hots, emakumeen eta gizonen partaidetza orekatua egotea zuzendaritza-organoetan), bikote hautagai bakoitzean gutxienez emakume bat egongo da. Bozketaren ondoren, eta lege hori eta hautagaitzak aurkeztean adierazitako lehentasunak kontuan hartuta, bi hautagaietatik titular eta ordezko nor izango den zehaztuko da. Biek ezingo dute inolaz ere izan enpresa bereko titularkide.

1. Hauteskunde Batzordeari aurkeztuko zaizkio 9,1 artikuluan aurreikusitako hautagaitzak, honako datu hauek argi azalduta:

   1. Proposamena egiten duen erakundearen edo elkartearen izena eta hautagaitzarena.

   2. Hautagaitza osatzen duten 2 pertsonen izen-abizenak.

   3. Hautagaien kokapen-ordena.

   4. Hautagai titularraren eta ordezkoaren lehentasuna.

2. Hauteskunde Batzordearen idazkariak noiz eta zer ordutan aurkeztu duten jasoko du eginbidean, eta ordena-zenbaki bat emango dio zerrenda bakoitzari aurkezteko ordenari jarraikiz.

3. Proposatutako hautagaiek hautagarri izateko baldintzak bete behar dituzte, eta, horrez gain, hautagaitza onartzen dutelako adierazpena izenpetu behar dute, zeina zerrendarekin batera aurkeztu behar baita.

4. Hauteskunde Batzordeak hautagaitzak onartzeko, ezinbestekoa da zerrenda bakoitzak ordezkari bat izendatzea, jakinarazpenak berari bidaltzeko. Ordezkari horrek ez du zertan hautagai izan Zerrenda aurkezten denean, ordezkariaren helbidea adieraziko zaio Hauteskunde Batzordeko Idazkaritzari, aurrerantzean jakinarazpenak ordezkari horri bidaltzeko.

1. Hautagaitzak aurkezteko epea bukatzen denean, hauteskunde-deialdian aurreikusitakoari jarraikiz, irmoak izango dira izatez, eta Hauteskunde Batzordeak hala izendatuko ditu. Batzordeak, halaber, ofizioz, bazter utziko ditu hautagarritasun-baldintzak hausten dituzten hautagaitzak edota aurkezteko nahiz izendatzeko eskatzen diren baldintzak betetzen ez dituztenak.

2. Hautagaitzak izendatutakoan, Hauteskunde Batzordeak jendaurrean jarriko ditu, hautesle-erroldak ikusgai egon diren toki berdinetan, hain zuzen ere.

3. Hautagai-zerrendak izendatu eta jendaurrean jarri ondoren, egokiak diren errekurtsoak aurkeztu ahal izango dituzte horien aurka elikagaien kalitatearen arloan eskuduna den zuzendaritzaren aurrean, I. eranskinean ezarritako epean.

4. Erroldaren edo azpierroldaren batean hautagaitza bakarra aurkezten bada, Hauteskunde Batzordeak aurreko paragrafoan aipatutako errekurtsoak ebatzitakoan, halakorik egonez gero zerrenda horretako hautagaiak izendatuko ditu kide eta haren ordezko, bertaratzen diren kideak esleituz, eta hautagai titularra eta ordezkoa izendatuz, hautagaitzan adierazitako lehentasunaren arabera, eta bozketarik egin gabe esleituko dizkie kideen karguak. Eta kasu guztietan hori bera gertatuz gero, hauteskunde-prozesuak aurrera egingo du: izendatutako hautagaiak karguez jabetuko dira, eta Kontseiluko presidentea eta presidenteordea hautatuko dituzte, Hauteskunde Batzordeak zehaztuko duen egunean.

   Emakume Nekazarien Estatutuari buruzko urriaren 15eko 8/2015 Legean ezarritakoa betetzen dela bermatzeko, hautagaitza bakoitzean adierazitako hautagai titularraren eta ordezkoaren lehentasunak ez badu ziurtatzen 4 emakume titular egongo direla Kontseiluan, kontseilukideak esleitzen direnean eta izendapena egin aurretik, Hauteskunde Batzordeak aldez aurreko bilera baterako deia egingo die hautagaitza guztiei, akordio batera iristeko. Akordiorik egon ezean, Hauteskunde Batzordeak emakume bati esleituko dio hautagaitza bakoitzaren kide titularra, gutxienez 4 emakumeren presentzia bermatu arte, eta operadore gehien dituzten azpierroldetarako hautagaitzetatik hasita.

1. Hautagaitzak izendatuta, Hauteskunde Batzordeak zehaztu egingo ditu zer forma eta baldintza edukiko dituzten hauteskunde-kanpainaren barruan egindako sustapen-ekitaldiek.

2. Hauteskunde-kanpaina, gehienez ere, hamar egun naturalekoa izango da.

1. Hiru hauteskunde-mahai eratuko dira, lurralde historiko bakoitzeko bat, bozketa eta zenbaketa egiteko: Arabako lurralde historikoa, Bizkaiko lurralde historikoa eta Gipuzkoako lurralde historikoa. Kontseiluak dagokion unean izendatuko ditu horietako egoitzak.

2. Hauteskunde-mahai bakoitzak bi hautetsontzi izango ditu, berritu beharreko errolda bakoitzeko bana.

3. Hauek dira Hauteskunde Mahaiaren egitekoak: bozketaren presidente jardutea, botoak zenbatzea eta bozketaren garbitasuna zaintzea.

4. Hauteskunde Mahaiek presidente eta mahaikide bana izango dute. Elikagaien kalitatearen arloan eskuduna den zuzendaritzako funtzionario batek eta Euskadiko Nekazaritza eta Elikadura Ekologikoaren Kontseiluko kide batek beteko dituzte kargu horiek; Hauteskunde Batzordeak izendatuko ditu kideak, aipatutako zuzendaritzako titularrak eta Kontseiluko presidenteak proposatu ondoren, hurrenez hurren. Hauteskunde Batzordeak ordezko bana ere aukeratuko du, halaber, presidente eta ordezko, prozedura berari jarraikiz.

5. Hautagaitzek ikuskatzaileak izendatu ahalko dituzte (Hauteskunde Batzordeari jakinaraziko diote), bozketa eta boto-zenbaketa ikus ditzaten eta Hauteskunde Mahaian parte har dezaten. Ikuskatzaile horiek hauteskunde-erroldan egon beharko dira, eta ezingo dira hautagai izan.

6. Hauteskunde Mahaiko kide izendatuak nahitaez bete beharko du eginkizun hori. Izendapena egin ondoren, interesdunei jakinaraziko zaie, eta horiek, izendapena ez onartzeko desenkusarik izanez gero, desenkusa hori azaldu eta agiri bidez frogatu behar izango dute I. eranskinean ezarritako epean. Hauteskunde Batzordeak ebatzi egongo du, eta ezingo da errekurtsorik aurkeztu.

   Mahaian egotea galarazten duen arrazoia geroago sortzen bada, berehala ohartaraziko da, eta beti Mahaia eratu baino lehenago. Kasu horietan, Batzordeak berehala emango du ebazpena.

   Mahaia osatzeko behar diren kide guztiak agertzen ez badira, agertutako kideren batek hala jakinaraziko dio Hauteskunde Batzordeari; Batzordeak, jarraian, hauteskundeak eta boto-zenbaketa ondo egiteko pertsona egokiak izendatu ahal izango ditu, askatasunez.

1. Hautagaiek ikuskatzaile bana izendatu ahalko dute; horretarako, bozketa egiteko finkatutako data baino 10 egun lehenago, idatziz helarazi beharko dio Hauteskunde Batzordeari izendapena. Hautagaiaren eta ikuskatzailearen izenak, abizenak eta indarrean dauden NANak jasoko ditu idatzi horretan.

2. Hauteskunde Batzordeak, bozketa baino 5 egun lehenago, ikuskatzailea egiaztatzen duen ziurtagiriaren hiru ale egingo ditu (ale bat hautagaiarentzat, beste bat ikuskatzailearentzat eta hirugarrena hauteskunde-mahaiarentzat).

3. Ikuskatzaileak izaera hori egiaztatuko du Mahaiaren presidentearen aurrean ziurtagiri hura aurkeztuz, eta mahaian sartuko da eratzen denean.

4. Mahaia eratutakoan, kide berririk ez da onartuko; hori horrela, berandu iristen den ikuskatzaileak bozkatzeko eskubidea erabili ahalko badu ere, hauteslea bada ezingo du ikuskapen-eginkizunik bete.

1. Bozketa-egunean, Hauteskunde Mahaiko presidentea eta mahaikidea bozketa egingo den tokian bilduko dira, 19.1 artikuluan ezarritako orduan.

2. Hauteskunde Mahaia ezingo da inola ere eratu presidentea edo mahaikidea edo ordezkoak hala badagokio egon ezean.

3. Hauteskunde-deialdian aurreikusitako orduan, presidenteak Mahaiaren eraketa-akta egingo du, eta berak, kideak eta, egotekotan, ikuskatzaileek izenpetuko dute.

4. Aktan honako hauek jasoko dira, gutxienez: Hauteskunde Mahaia osatzen duten pertsonak, ikuskatzaileen zerrenda (halakorik egonez gero), eta zer hautagaitza ordezkatzen duten.

5. Presidenteak, bozketa egiten den lekuan, aginte-ahalmen osoa izango du ordena zaintzeko, hautesleen askatasuna bermatzeko eta legea betetzen dela ziurtatzeko.

1. Hauek dira Hauteskunde Mahaiak bete behar dituen eta Hauteskunde Batzordeari bidali behar dizkion agiriak:

   1. Mahaiaren eraketa-akta.

   2. Ikuskatzaileen zerrenda.

   3. Boto-zenbaketaren akta.

      Agiri horiek gutun-azal itxian igorriko dira.

2. Zerrenden ordezkariek, hautagaitzetako kideek edo mahaiko ikuskatzaileek eskatuz gero, Hauteskunde Mahaiak boto-zenbaketaren aktaren ziurtagiriak egingo ditu.

Hauteskunde-batzordeak eredu ofiziala egingo du hauteskundeetako boto-paper eta gutun-azaletarako, eta egiaztatuko du hautagaiek egindakoak eredu horrekin bat datozela.

1. Hauteskunde Mahaia 09:00etan eratuko da. Mahaia eratzeko akta eginda, 09:30etik 17:00etara arte bozkatu ahalko dute.

2. Ezinbesteko arrazoia beharko da bozketa ez hasteko, edo, hasita badago, bertan behera uzteko; horren erantzulea mahaiburua/presidentea izango da, zeinak, idazki arrazoitu baten bidez, horri buruzko ebazpena emango baitu. Idazki hori berehala bidaliko zaio Hauteskunde Batzordeari, azaldutako arrazoiak azter ditzan eta, bidezkoa bada, erantzukizunak eska ditzan. Aipatutako idazkiaren kopia presidentearen esku geratuko da.

3. Bozketa bertan behera geratuz gero, ordura arte emandako botoak ez dira kontuan hartuko, ezta zenbatuko ere. Presidenteak hautetsontzietako boto-paperak suntsitzeko aginduko du, eta horrela jasoko da aurreko lerrokadan aipaturiko idazkian.

4. Botoa emateko eskubidea egiaztatzeko, beharrezkoa da hauteslea dagokion erroldako zerrendan inskribaturik egon dadin eta bere nortasuna jatorrizko agiriak erabiliz froga dezan. Hautesleak presidenteari nortasuna egiaztatzeko honako agiri hauetako bat aurkeztu behar dio:

   Nortasun Agiri Nazionala (NAN). Izapidetzen ari den NANaren egiaztagiria ez da onartuko.

   Pasaportea (argazki eta guzti).

   Gidabaimena (argazki eta guzti).

5. Bozketa pertsonala eta isilpekoa izango da, eta presidenteak emango dio hasiera «bozketa hasten da» esanez. Hautesleak banan-banan joango dira mahaia, nortasun-agiriarekin. Mahaikideak edo ikuskatzaileek hautesle-erroldak aztertu eta boto-emailearen izena han ageri dela, eta, bere nortasuna benetakoa dela egiaztatu ondoren, botoa ematera joan dela idatziko dute. Ondoren, hautesleak eskutik eskura emango dio boto-papera presidenteari, gutun-azal batean sartuta.

   Presidenteak hauteslearen izena aipatu («xxx/-k bozkatzen du» esanez) eta boto-paper hori sartuko du hautetsontzian.

6. Hautesleek dagokien hauteskunde-mahaian baino ezingo dute bozkatu, ikuskatzaileek izan ezik, akreditatuta dauden mahaian erabili ahalko baitute bozkatzeko eskubidea ikuskatzaileek.

   Hainbat titular erroldatuta dituzten enpresen kasuan, horietako batek soilik eman ahalko du botoa, eta bozkatzen lehena izango da.

7. Bozketak amaitzeko aurreikusitako orduan, presidenteak bozketa bukatzeko dagoela iragarriko du eta ez dio inori sartzen utziko bozketa-tokira.

   Bozketa-tokian hauteslerik geratuz gero, Mahaiko presidenteak galdetuko du ea baten bat botoa eman gabe dagoen, eta hala izanez gero, bozketa-tokiaren barruan dauden horien botoak onartuko ditu.

   Ondoren, mahaia osatzen dutenek eta ikuskatzaileek halakorik egonez gero emango dute botoa, eta aktak horiek guztiek izenpetuko dituzte.

8. Ez bozketa-tokian, ez inguruetan, ezin izango da inolako propagandarik egin ezein hautagaitzaren alde.

1. Errolda bakoitzaren kontseilukideak zuzenean hautatzeko orduan, hautesleek inskribatuta dauden erroldako hautagaitzak bozkatu ahalko dituzte.

   Ekoizleen erroldan, hautesle bakoitzak dagokion lurralde historikoko azpierroldako bi hautagaitzari eman ahalko die botoa gehienez ere.

   Elaborazioaren, hirugarren herrialdetiko inportazioaren edo merkaturatzearen erroldan hautesleek beren lurralde historikoko gehienez lau hautagaitza bozkatu ahalko dituzte.

2. Kontseilukide hautetsiak honela izendatuko dira errolda bakoitzean:

   Ekoizleen errolda: azpierrolda edo lurralde historiko bakoitzeko gehien bozkatutako hiru hautagaitzak eta hiru azpierrolda edo lurralde historikoetako edozeinetan boto gehien dituen hurrengo hautagaitza izendatuko dira.

   Elaborazioaren, hirugarren herrialdeetatiko inportazioaren edo merkaturatzearen errolda: boto gehien lortzen dituzten hautagaitzak izendatuko dira erroldako 4 kide hautetsi izan arte.

   Hautagaitza bakoitzaren titularra hautagaitzan adierazitako lehentasunen arabera zehaztuko da. Emakume Nekazarien Estatutuari buruzko urriaren 15eko 8/2015 Legean ezarritakoa betetzen dela bermatzeko, hautagaitza bakoitzean adierazitako hautagai titularraren eta ordezkoaren lehentasunak ez badu ziurtatzen 4 emakume titular egongo direla Kontseiluan, kontseilukideak esleitzen direnean eta izendapena egin aurretik, Hauteskunde Batzordeak aldez aurreko bilera baterako deia egingo die hautagaitza hautetsi guztiei, akordio batera iristeko. Akordiorik egon ezean, Hauteskunde Batzordeak emakume bati esleituko dio hautagaitza bakoitzaren kide titularra, gutxienez 4 emakumeren presentzia bermatu arte, eta boto-portzentaje txikiena lortu duten hautagaitza hautetsietatik hasita.

1. Bozketaldia amaitutakoan, hautetsontzia irekiko da, eta boto-paperak dituzten gutun-azalak atera eta irekiko dira, edukia ozenki irakurriko da, boto-papera ikuskatzaileei erakutsiko zaie eta hautagai bakoitzari dagokion botoa idatziko da.

2. Boto-paper guztiak irakurtzen eta zenbatzen amaitu ondoren, mahaiko idazkariak bi errolden zenbaketaren eta emaitzaren gaineko akta egingo du. Aktan honako hauek adieraziko ditu: hautagaitza bakoitzak zenbat boto lortu dituen, boto baliogabeak eta boto zuriak, baita bozketan izandako gorabehera guztiak eta ikuskatzaileek jasota nahi dituzten gainerakoak ere.

3. Mahaia osatzen duten guztiek eta ikuskatzaileek sinatuko dute akta hori, eta kopia ziurtatua jasoko dute.

4. Boto-kontaketaren akta gutun-azalean sartuko dute, mahaiaren eraketa-aktarekin batera; mahaia osatzen dutenek sinatuko dute gutun-azal horretan, sinadurak hura ireki beharreko aldean gurutzatuta gelditzeko moduan; ondoren, Hauteskunde Batzordeari bidaliko diote emandako botoen behin betiko kontaketa egin dezan.

5. Hauteskunde-batzordeak hiru hauteskunde-mahaietako akta jaso ondoren, behin betiko zenbaketa hasiko du, eta errolda bakoitzean boto-kopuru handiena lortu duten hautagaiak izendatuko ditu, bai eta izendatutako hautagaien boto-paperetan agertzen diren ordezkoak ere.

   Bi hautagai edo gehiagoren artean berdinketa egonez gero, erregistroan antzinatasun handiena duena gailenduko da.

6. Boto-paperik ez duten gutun-azalak edo boto-paperean hautagaitzarik zehaztuta ez dutenak boto zuri gisa zenbatuko dira.

7. Honako hauek hartuko dira boto balioduntzat:

   1. Sektore bereko hautagaitza berei botoa ematen dieten bi boto-paper edo gehiago biltzen dituzten gutun-azalei dagozkienak. Zenbaketari dagokionez, boto bakartzat zenbatuko da.

   2. Gutun-azaletan zerrendako izenetakoren bat gurutze batez markatuta, biribilduta, nabarmenduta badago edo iraingarria edo laidogarria ez den idazkun edo adierazpenen bat dutenak, betiere idatzitako horrek ez badu galarazten hautagaien izen bakar bat irakurtzea.

8. Honako hauek hartuko dira boto baliogabetzat:

   1. Izen marratuak edo ezabatuak biltzen dituzten gutun-azalei dagozkienak, edo inskripzio iraingarriak edo laidogarriak biltzen dituztenak.

   2. Hautagaitza desberdinei edo errolda desberdinetakoei botoa ematen dieten bi boto-paper edo gehiago dituzten gutun-azalei dagozkienak.

   3. Hauteskunde Batzordeak onarturiko ereduari ez dagozkion boto-paperetan emandakoak.

9. Goiko jarraibideen arabera botoak zenbatuta, presidenteak galdetuko du proposamenik ote dagoen boto-zenbaketaren aurka.

   Proposamenik egiten ez bada, edo egindakoak mahaiko kideen gehiengoz ebatzi ondoren, presidenteak ozenki adieraziko du bozketaren emaitza: boto-emaileen kopurua, boto-paper baliodunena, baliogabeko boto-paperena, boto zuriena eta hautagaitza bakoitzak lortutako botoena.

10. Bertaratutako guztien aurrean apurtuko dira hautetsontzietatik ateratako boto-paperak. Alabaina, baliogabeko bototzat jotakoak edo erreklamazioren bat izan dutenak gorde egingo dira, betiere mahaikide guztiek izenpetuta eta bozketako aktari erantsita.

1. Hauteskunde Mahaiaren hauteskunde-aktak jasota, Hauteskunde Batzordeak kontseilukide-karguak esleituko ditu, irizpide hauen arabera:

   1. Errolda edo azpierrolda bakoitzean boto gehien lortu dituzten hautagaitzei esleituko zaizkie kideen karguak eta ordezkoen postuak.

   2. Bi hautagai edo gehiagoren arteko berdinketa badago, erregistroan inskribatu zen lehena gailenduko da.

   3. Hautagaitza bakoitzaren titularra hautagaitzan adierazitako lehentasunen arabera zehaztuko da.

      Emakume Nekazarien Estatutuari buruzko urriaren 15eko 8/2015 Legean ezarritakoa betetzen dela bermatzeko, hautagaitza bakoitzean adierazitako hautagai titularraren eta ordezkoaren lehentasunak ez badu ziurtatzen 4 emakume titular egongo direla Kontseiluan, kontseilukideak esleitzen direnean eta izendapena egin aurretik, Hauteskunde Batzordeak aldez aurreko bilera baterako deia egingo die hautagaitza hautetsi guztiei, akordio batera iristeko. Akordiorik egon ezean, Hauteskunde Batzordeak emakume bati esleituko dio hautagaitza bakoitzaren kide titularra, gutxienez 4 emakumeren presentzia bermatu arte, eta boto-portzentaje txikiena lortu duten hautagaitza hautetsietatik hasita.

2. Postuak esleitu ondoren, Hauteskunde Batzordeak presidentearen bitartez Nekazaritza eta Elikadura Ekologikoaren Kontseiluko kide hautatuak izendatuko ditu.

3. Izendatutako kideen aurkako errekurtsoak I. eranskineko egutegiari egokituko zaizkio.

4. Kideak izendatu ondoren, dagozkien izendapen-agiriak bidaliko zaizkie I. eranskinean ezarritako daten arabera.

1. Hauteskunde-egutegian adierazitako egunean, Euskadiko Nekazaritza eta Elikadura Ekologikoaren Kontseiluak osoko bilkura egingo du, eta, bertan, hautatutako kideak karguaz jabetuko dira.

2. Bilkura horretan bertan, boto-eskubidea duten kontseilukide hautetsiek presidentea eta presidenteordea gehiengo soil bidez hautatuko dituzte; horiek elikagaien kalitatearen arloan eskuduna den zuzendaritzako titularrari proposatuko dizkiote, hark izenda ditzan, hautagaiek zenbat boto lortu dituzten zehaztuta.

3. Presidente eta presidenteorde izateko proposatutako pertsonak kontseilukide hautetsien artetik aukeratuko dira.

   LEHENENGO XEDAPEN GEHIGARRIA

   Arau hauek aplikatzeko orduan sortzen diren zalantza guztiak ebazteko, oinarritzat hartuko da Ekonomiaren Garapen, Jasangarritasun eta Ingurumeneko sailburuaren 2023ko maiatzaren 31ko Aginduan (Euskadiko Nekazaritza eta Elikadura Ekologikoaren Kontseiluaren barne-araubideko erregelamendu berria argitaratzeko agintzen duena) eta Hauteskunde Araubide Orokorrari buruzko ekainaren 19ko 5/1985 Lege Organikoan ezarritakoa.

   BIGARREN XEDAPEN GEHIGARRIA

   Baldin eta, kontseilukide hautetsien agintaldiko lau urteetan zehar, arau honetan xedatu legez hautatutako pertsonaren batek ordezkatzen duen enpresarekiko lotura hausten badu edo hautagai proposatu duen erakundekoa izateari uzten badio, orduan baja hartuko du kontseilukide moduan, eta dagokion ordezkoak hartuko du bere tokia.

   Irizpide berari jarraituko zaio, zuzenean nahiz ordezkatzen duen enpresa edo izen sozialari dagokionez, kontseilukideren batek karguaren indarraldian baja hartzen badu nekazaritza ekologikoaren arloko zehapen astun edo oso astuntzat jotako kasuetakoren bategatik.

   AZKEN XEDAPENETAKO LEHENENGOA

   Agindu honen aurka, aukerako berraztertzeko errekurtsoa jar diezaiokete interesdunek Ekonomiaren Garapen, Jasangarritasun eta Ingurumeneko sailburuari hilabeteko epean, agindua argitaratu eta hurrengo egunetik hasita, edo, bestela, administrazioarekiko auzi-errekurtsoa jar dezakete Euskal Autonomia Erkidegoko Justizia Auzitegi Nagusiaren administrazioarekiko auzietako salan bi hilabeteko epean, agindua argitaratu eta hurrengo egunetik hasita.

   AZKEN XEDAPENETAKO BIGARRENA

   Agindu honek argitaratu eta hurrengo egunetik aurrera izango ditu ondorioak.

   Vitoria-Gasteiz, 2023ko ekainaren 20a.

   Ekonomiaren Garapen, Jasangarritasun eta Ingurumeneko sailburua,

   MARÍA ARANZAZU TAPIA OTAEGUI.